លោកមាស វិរិទ្ធ ពេលចូលរួមក្នុងពិធីដុតកម្ទេចគ្រឿងញៀននៅថ្ងៃទី១១ កក្កដា ។ រូបថត NACD
ភ្នំពេញៈ នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានលើកឡើងថា ការងារប្រយុទ្ធប្រឆាំងគ្រឿងញៀនត្រូវតែបន្តពង្រឹងនិងលើកកម្ពស់ឱ្យកាន់តែមានប្រសិទ្ធភាពស្របទៅនឹងប្រមុខរាជរដ្ឋាភិបាលកម្ពុជាដែលបានដាក់ចេញប្រធានបទថ្នាក់ជាតិក្នុងឆ្នាំ ២០២៣ គឺ «អ្វីៗដើម្បីប្រជាជនជាចម្បងបញ្ឈប់ការរើសអើងនិងមាក់ងាយចំពោះអ្នកញៀនគ្រឿងញៀន ពង្រឹងការងារអប់រំបង្ការ»។
ការថ្លែងរបស់មាស វិរិទ្ធ បែបនេះធ្វើឡើងនៅក្នុងពិធីដុតបំផ្លាញគ្រឿងញៀនជិត៤០គីឡូក្រាមដែលបានប្រមូលមកពីខេត្តបាត់ដំបង និងខេត្តពោធិ៍សាត់កាលពីថ្ងៃទី១១ ខែកក្កដា ក្នុងក្រុងបាត់ដំបង ខេត្តបាត់ដំបង។
យោងតាមអាជ្ញាធរជាតិប្រយុទ្ធប្រឆាំងគ្រឿងញៀនលោកបានថ្លែងថា៖«ការជួយគ្នាទៅវិញទៅមក ការលុបបំបាត់ការរើសអើងនិងមាក់ងាយចំពោះអ្នកញៀនគ្រឿងញៀន ជួយសង្គ្រោះអ្នកញៀនគ្រឿងញៀន រួមគ្នាបង្ក្រាបបទល្មើសគ្រឿងញៀន និងលុបបំបាត់ភាពអសកម្មនានានៅក្នុងមូលដ្ឋានជាសុខដុមនីយកម្មក្នុងសហគមន៍»។
យោងតាមព្រះរាជអាជ្ញាសាលាដំបូងខេត្តបាត់ដំបងលោក កែវ សុជាតិ បានឱ្យដឹងថា មន្ត្រីអនុវត្តច្បាប់បានបង្ក្រាបដកហូតវត្ថុតាងនិងបំផ្លាញចោលតាមអំណាចសាលក្រមស្ថាពររបស់សាលាដំបូងខេត្តទាំង២ដែលមានសំណុំរឿងសរុបរបស់សាលាដំបូងខេត្តចំនួន២មានចំនួន២៨៦សំណុំរឿងដែលមានគ្រឿងញៀនទម្ងន់សរុប៣៩ ៦៧៧,៨៣ក្រាម។
លោកបានបន្តថា សាលាដំបូងនិងអយ្យការអមសាលាដំបូងខេត្តបាត់ដំបងមានចំនួន២២១សំណុំរឿងដែលមានគ្រឿងញៀនសរុបទម្ងន់៣៨ ៥៧០,០៨ក្រាម និងសាលាដំបូង និងអយ្យការអមសាលាដំបូងខេត្តពោធិ៍សាត់មានចំនួន៦៥សំណុំរឿងមានបរិមាណគ្រឿងញៀនសរុបចំនួន១ ១០៧,៧៥ក្រាម។
លោកសុខ លូ អភិបាលខេត្តបាត់ដំបងបានឱ្យដឹងដែរថា បច្ចុប្បន្នខេត្តនេះមានកន្លែងបន្សាបគ្រឿងញៀនចំនួន២កន្លែងដែលទី១ ជាមជ្ឈមណ្ឌលបន្សាបគ្រឿងញៀនក្ដីសង្ឃឹម ស្ថិតក្នុងស្រុកបវេល និងទី២ជាមជ្ឈមណ្ឌលបន្សាបគ្រឿងញៀន កែ ស៊ីនួន ស្ថិតក្នុងស្រុករតនមណ្ឌលដែលទើបនឹងបង្កើតថ្មីៗហើយនឹងត្រៀមសម្ពោធនាពេលខាងមុខផងដែរ។
លោកបានបញ្ជាក់ថា៖«មជ្ឈមណ្ឌលទាំង២នេះមានសារៈសំខាន់ខ្លាំងណាស់ដល់ខេត្តបាត់ដំបងក្នុងការចូលរួមចំណែកក្នុងការព្យាបាលជនញៀនគ្រឿងញៀនឱ្យត្រឡប់មកសភាពដើមវិញបូកផ្សំជាមួយនឹងការបណ្ដុះបណ្ដាលវិជ្ជាជីវៈដល់ជនរងគ្រោះទាំងនោះផងដែរ»។
លោកសុខ លូ បានឱ្យដឹងទៀតថា៖«ដោយសារការពន្លឿននីតិវិធីច្បាប់ពីស្ថាប័នតុលាការខេត្ត ព្រះអាជ្ញាខេត្ត ទើបធ្វើឱ្យយើងអាចធ្វើការដុតបំផ្លាញគ្រឿងញៀនបាននាពេលនេះ បើពុំមានការជួយជ្រោមជ្រែងពីស្ថាប័នតុលាការទេ យើងនឹងត្រូវពន្យារការបំផ្លាញគ្រឿងញៀនដែលមិនទាន់ធ្វើនីតិវិធីច្បាប់រួចរហូតដល់ឆ្នាំក្រោយៗទៀត»។
សូមរំឭកផងដែរថាក្នុងឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀនកាលពីថ្ងៃទី២៨ ខែមិថុនា កន្លងមក មានសារធាតុញៀននិងសារធាតុគីមីផ្សំផ្សេងទៀតសរុបជាង៥តោន៧១៣គីឡូក្រាមត្រូវបានដុតបំផ្លាញចោល ក្រោមអធិបតីភាពលោកឧបនាយករដ្ឋមន្ដ្រី ស ខេង រដ្ឋមន្ត្រីក្រសួងមហាផ្ទៃ។
យោងតាមរបាយការណ៍សង្ខេបបូកសរុបលទ្ធផលប្រយុទ្ធប្រឆាំងគ្រឿងញៀនខុសច្បាប់លើកទី៧របស់អាជ្ញាធរជាតិប្រយុទ្ធប្រឆាំងគ្រឿងញៀនបានឱ្យដឹងថា ក្នុងឆ្នាំ២០២២ កងកម្លាំងអនុវត្តច្បាប់បានបង្ក្រាបបទល្មើសគ្រឿងញៀនបានចំនួន៦ ៣៩០ករណី ឃាត់ខ្លួន១៥ ០០២នាក់ ក្នុងនោះចាប់យកសារធាតុញៀនគ្រប់ប្រភេទទម្ងន់ ១៤ ៩១៩,៤៧គីឡូក្រាម៕
