ការហែរបស់គណបក្សនយោបាយក្នុងយុទ្ធនាការឃោសនាបោះឆ្នោតដែលនឹងបញ្ចប់នៅថ្ងៃនេះ។ រូបថត ហេង ជីវ័ន និងសហការី
ភ្នំពេញៈ យ៉ាងហោចណាស់មានគណបក្សនយោបាយធំៗចំនួន ៣ គឺគណបក្សប្រជាជនកម្ពុជា គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ នឹងហែក្បួនបិទយុទ្ធនាការឃោសនាបោះឆ្នោតនៅក្នុងរាជធានីភ្នំពេញនាថ្ងៃទី ២១ ខែកក្កដានេះ ដោយមានអ្នកចូលរួមរហូតជាង៣ម៉ឺននាក់ ខណៈលោកនាយករដ្ឋមន្ដ្រី ហ៊ុន សែន បានចាត់ទុកការបោះឆ្នោតលើកនេះថាល្អ ក្នុងពេលដែលការឃោសនាពុំមានអំពើហិង្សាទាំងកាយវិការ និងពាក្យសម្ដី។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ គណបក្សប្រជាជនកម្ពុជានឹងរៀបចំជួបជុំសមាជិក សមាជិការបស់ខ្លួននៅតំបន់មជ្ឈមណ្ឌលសន្និបាត និងពិព័រណ៍កោះពេជ្រ ដើម្បីដង្ហែក្បួនឃោសនាដែលមានអ្នកចូលរួម ៣០ ០០០ នាក់ នឹងចាប់ហែក្បួនពីម៉ោង ៧៖៣០ នាទីព្រឹកទៅរហូតបិទបញ្ចប់។
ចំណែកគណបក្សហ្វ៊ុនស៊ិនប៉ិចនឹងរៀបចំជួបជុំសមាជិក សមាជិការបស់ខ្លួនលើចិញ្ចើមមហាវិថីសម្តេច ហ៊ុន សែន (ផ្លូវ ៦០ ម៉ែត្រ) ដោយមានអ្នកចូលរួមចំនួន ២ ៥០០ នាក់ ដោយចាប់ហែក្បួនពីម៉ោង ៨ ព្រឹកតទៅ។ រីឯគណបក្សខ្មែររួបរួមជាតិនឹងរៀបចំជួបជុំសមាជិក សមាជិការបស់ខ្លួនចំនួន ១ ២០០ នាក់ នៅលើចិញ្ចើមផ្លូវមុខក្រសួងរៀបចំដែនដី នគរូបនីយកម្ម និងសំណង់ ដោយចាប់ហែក្បួនឃោសនាពីម៉ោង ២ រសៀលតទៅ។
តាមរយៈសេចក្តីជូនដំណឹងនេះ លោក ឃួង ស្រេង អភិបាលរាជធានីភ្នំពេញ បានបញ្ជាក់ថា ក្នុងអំឡុងពេលបិទយុទ្ធនាការនេះ អាចមានចរាចរមមាញឹកជាខ្លាំងដោយសារមធ្យោបាយធ្វើដំណើររបស់សមាជិកសមាជិកាដែលបានចូលរួម។
លោកថា៖ «ដើម្បីចៀសវាងការកកស្ទះ រដ្ឋបាលរាជធានីភ្នំពេញនឹងបញ្ចៀសចរាចរចំពោះយានយន្តគ្រប់ប្រភេទនៅតាមទីតាំងជួបជុំរបស់គណបក្សនីមួយៗ និងតាមតម្រាយផ្លូវនានាដែលគណបក្សនយោបាយហែក្បួនឃោសនា នាថ្ងៃទី ២១ ខែកក្កដា ចាប់ពីម៉ោង៥ព្រឹក រហូតដល់ការដង្ហែក្បួនបានបញ្ចប់»។
ទាក់ទងនឹងការបោះឆ្នោតជ្រើសតាំងតំណាងរាស្ត្រនីតិកាលទី៧ នេះ លោកនាយករដ្ឋមន្ត្រី ហ៊ុន សែន បានបញ្ជាក់ថា លោកមិនមានកង្វល់ពីការទិតៀនទេ តែបញ្ហាដែលសំខាន់គឺប្រជាជនទៅបោះឆ្នោតស្របទៅតាមរដ្ឋធម្មនុញ្ញរបស់ខ្លួន។
លោកបានលើកឡើងដូចនេះ តាមរយៈកិច្ចសម្ភាសន៍ជាមួយទូរទស្សន៍ហុងកុង Phoenix TV ដែលត្រូវបានផ្សព្វផ្សាយពីថ្ងៃទី ១៩ ខែកក្កដា ដោយលោកបានបញ្ជាក់ថា ប្រជាជនកម្ពុជាមានភាពចាស់ទុំខាងនយោបាយអំពីដំណើរការប្រជាធិបតេយ្យដោយលោកសង្ឃឹមផងដែរថានឹងមានលទ្ធផលល្អ។
គណបក្សប្រជាជនកម្ពុជាពេលហែក្បួនឃោសនានៅភ្នំពេញកាលពីថ្ងៃទី ១ កក្កដា។ ហេង ជីវ័ន
លោក ហ៊ុន សែន មានប្រសាសន៍ថា ៖ «មកដល់ពេលនេះ យើងនៅសល់តែប៉ុន្មានថ្ងៃទៀតការបោះឆ្នោតនឹងចាប់ផ្តើម ហើយនេះជាការបោះឆ្នោតមួយដ៏ល្អដែលមកដល់ពេលនេះមិនទាន់ឃើញមានហិង្សាណាមួយកើតឡើង ទោះបីជាហិង្សាកាយវិការ ឬជាពាក្យសម្តី»។
លោកបានបន្តថា៖ «ពិតហើយមានប្រទេសខ្លះឬក្រុមខ្លះធ្វើការទិតៀនចំពោះយើងខ្ញុំ តែយើងមិនខ្វល់ទេ អ្វីដែលជា បញ្ហាធំរបស់យើងគឺប្រជាជនទៅបោះឆ្នោតស្របទៅតាមរដ្ឋធម្មនុញ្ញរបស់ខ្លួន គឺគ្រប់គ្រាន់ ហើយមិនចាំបាច់ឱ្យប្រទេសនេះ ប្រទេសនោះ ត្រូវទទួលស្គាល់ការបោះឆ្នោតរបស់ប្រទេសយើងខ្ញុំនោះទេ»។
លោក ហ៊ុន សែន បានបន្ថែមថា ការបោះឆ្នោតនៅក្នុងប្រទេសឯករាជ្យមួយ ប្រទេសដែលមានអធិបតេយ្យមួយ ត្រឹមតែប្រជាជនទទួលស្គាល់ និងចូលរួមការបោះឆ្នោតគឺគ្រប់គ្រាន់ដើម្បីកំណត់ឈ្នះហើយ។ទាក់ទងនឹងការបោះឆ្នោតនេះដែរ ក្នុងជំនួបជាមួយគណៈប្រតិភូបេសកកម្មសង្កេតការណ៍បោះឆ្នោត ហ្រ្វង់កូហ្វូនី (MEF) នាថ្ងៃទី ១៩ ខែកក្កដា លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានបញ្ជាក់ថា ការបោះឆ្នោតកន្លងមក ក៏មានការចូលរួមឃ្លាំមើលពីក្រុមអ្នកសង្កេតការណ៍ជាតិ និងអន្តរជាតិ និងអ្នកសារព័ត៌មាន ហើយសម្រាប់ការបោះឆ្នោតជាតិនៅឆ្នាំ ២០២៣ នេះ គិតមកដល់ថ្ងៃទី ១៩ ខែកក្កដា ឆ្នាំ ២០២៣ ស្ថានភាពទូទៅក៏មានភាពល្អប្រសើរដែរ។
លោក ស ខេង បានថ្លែងផងដែរពីការត្រៀមលក្ខណៈរបស់រាជរដ្ឋាភិបាលកម្ពុជា ក្នុងនោះក្រសួងមហាផ្ទៃក៏មានតួនាទីស្នូលក្នុងការថែរក្សាសន្តិសុខ សណ្ដាប់ធ្នាប់ បម្រើឱ្យដំណើរការបោះឆ្នោតនេះ។
តាមរយៈក្រសួងមហាផ្ទៃ លោក Desire NYARUHIRIRA ទីប្រឹក្សាពិសេសទទួលបន្ទុកកិច្ចការនយោបាយ និងការទូតនៃអគ្គលេខាធិការអង្គការអន្តរជាតិនិយាយភាសាបារាំងបានលើកឡើងថា នៅពេលប្រទេសសមាជិកក្រុមប្រទេសនិយាយភាសាបារាំងរៀបចំការបោះឆ្នោត អង្គការអន្តរជាតិ ហ្រ្វង់កូហ្វូនី តែងតែបានចាត់បញ្ជូនគណៈប្រតិភូចូលរួមសង្កេតការណ៍ និងបានជួបជាមួយបណ្ដាតួអង្គពាក់ព័ន្ធនឹងការបោះឆ្នោតនៅប្រទេសទាំងនោះ ហើយបេសកកម្មនេះគឺដើម្បីជួយពង្រឹងនីតិរដ្ឋ និងសន្តិភាព៕
.jpg)
