អង្គការសត្វព្រៃ និងរុក្ខជាតិកម្ពុជា ប្រមូលទិន្នន័យនៅទីតាំងសំរាមសមុទ្រចំនួន ២៤៣ កន្លែងដែលបង្កគ្រោះថ្នាក់ដល់ប្រព័ន្ធជីវចម្រុះ។ រូបថត អង្គការសត្វព្រៃ និងរុក្ខជាតិកម្ពុជា
ព្រះសីហនុៈ គិតមកដល់បច្ចុប្បន្នពីឆ្នាំ២០២២ មក ក្រុមការងាររបស់អង្គការសត្វព្រៃ និងរុក្ខជាតិកម្ពុជាបានចុះប្រមូលទិន្នន័យពីទីតាំងសរុបចំនួន ២៤៣ កន្លែងនៃសំរាមសមុទ្រ ដែលកំពុងតែបង្កការព្រួយបារម្ភជាខ្លាំងដល់ប្រព័ន្ធជីវចម្រុះកម្ពុជា។
អង្គការសត្វព្រៃ និង រុក្ខជាតិកម្ពុជា(Fauna & Flora - Cambodia Programme)បានឱ្យដឹងថា ក្រុមការងារ បានបន្តការចុះប្រមូលទិន្នន័យសំរាមសមុទ្រជាថ្មីម្តងទៀត ដែលក្នុងនោះ ក្រុមការងារគម្រោងប្លាស្ទិកសមុទ្ររបស់អង្គការសត្វព្រៃ និងរុក្ខជាតិកម្ពុជា និងមន្ត្រីតំណាងក្រសួងបរិស្ថានចំនួន ៤ រូបបានចុះបេសកកម្មប្រមូលទិន្នន័យសំរាមសមុទ្រ នៅទីតាំងសេសសល់ជុំវិញកោះរ៉ុងសន្លឹមនាពេលថ្មីៗនេះ ដើម្បីបញ្ចប់សកម្មភាពប្រមូលទិន្នន័យបន្ទាត់មូលដ្ឋានមួយនេះ។
អង្គការបានបញ្ជាក់ថា៖«គិតមកដល់បច្ចុប្បន្ន ក្រុមការងារយើងបានប្រមូលទិន្នន័យពីទីតាំងសរុបទាំងអស់ចំនួន ២៤៣ កន្លែង ក្នុងឆ្នាំ២០២២ និង ២០២៣ ដែលជារួម សំរាមបា្លស្ទិក ជាពិសេសប្រភេទប្រើម្តងចោលដែលក្រុមការងារបានរកឃើញ ដូចជា ដបទឹកសុទ្ធនិងភេសជ្ជៈ កម្ទេចស្នោតូចៗ ថង់ កែវជ័រ ជាដើម ផ្តល់ការព្រួយបារម្ភជាខ្លាំងដល់ប្រព័ន្ធជីវចម្រុះរបស់ប្រទេសកម្ពុជា»។
អង្គការសត្វព្រៃ និងរុក្ខជាតិកម្ពុជាបានអំពាវនាវឱ្យសាធារណជនចូលរួមដោះស្រាយបញ្ហាបំពុលដោយប្លាស្ទិកនេះ ហើយបានរំឭកថា៖«យ៉ាងណាមិញ យើងម្នាក់ៗគួរចងចាំថា ជម្រើសនៃការប្រើប្រាស់ប្រចាំថ្ងៃរបស់យើង ពិតជាមានសារៈសំខាន់។ តាមរយៈការកាត់បន្ថយ ប្រើប្រាស់ប្រភេទបា្លស្ទិកម្តងចោល ហើយងាកមកប្រើ ថង់ ដប ឬកែវ ទាំងឡាយណាដែលអាចប្រើបានច្រើនដង ដើម្បីច្រក ម្ហូបអាហារ កាហ្វេ ភេសជ្ជៈ និង អីវ៉ាន់ផ្សេងៗដែលយើងទិញរៀងរាល់ថ្ងៃ គឺសបញ្ចាក់ឱ្យឃើញថា យើងកំពុងដើរក្នុងជំហានដ៏សំខាន់មួយ ក្នុងការចូលរួមដោះស្រាយបញ្ហាបំពុលដោយប្លាសិ្ទកនេះទាំងអស់គ្នា»៕
