ភ្នំពេញៈ ចាប់ពីខែសីហាខាងមុខនេះទៅ រាជរដ្ឋាភិបាលកម្ពុជានឹងចាប់ផ្តើមផ្តល់ប្រាក់ឧបត្ថម្ភពី ១ ៥២០ ០០០ រៀល ដល់ ២ ៧២០ ០០០ រៀលជូនស្ត្រីមានផ្ទៃពោះ និងកូនអាយុក្រោម ២ ឆ្នាំ ដើម្បីលើកកម្ពស់សុខុមាលភាពមាតា និងកុមារតូច និងបន្តដោះស្រាយបញ្ហាកង្វះអាហារូបត្ថម្ភ។
អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម លោកចន ណារិទ្ធបានមានប្រសាសន៍ថា រាជរដ្ឋាភិបាលនឹងពង្រីកកិច្ចគាំពារសង្គមបន្ថែមដល់ស្ត្រីមានផ្ទៃពោះ និងកូនអាយុក្រោម ២ ឆ្នាំ មកពីផ្នែកពាក់ព័ន្ធ ក្នុងគោលបំណងលើកកម្ពស់សុខុមាលភាពមាតា និងកុមារតូច ព្រមទាំងរួមចំណែកដោះស្រាយបញ្ហាកង្វះអាហារូបត្ថម្ភរបស់កុមារ ចាប់ពីក្នុងផ្ទៃ រហូតអាយុ ២ ឆ្នាំ និងជំរុញការលូតលាស់ទាំងកាយសម្បទា ទាំងបញ្ញាស្មារតីក្នុងរយៈពេល ១ ០០០ ថ្ងៃដំបូងនៃជីវិត។ នេះបើយោងតាមអគ្គលេខាធិការដ្ឋានក្រុមប្រឹក្សាជាតិគាំពារសង្គម។
លោកបានបន្តថា រាជរដ្ឋាភិបាលតែងតែគិតគូរជាប់ជានិច្ច លើការអភិវឌ្ឍមូលធនមនុស្ស ស្របតាមគោលនយោបាយជាតិគាំពារសង្គម និងផែនការអភិវឌ្ឍជាតិ ក្រោមការដឹកនាំរបស់លោកនាយករដ្ឋមន្ត្រីហ៊ុន សែន តាមរយៈការដាក់ឱ្យអនុវត្តកម្មវិធី ឬរបបនានាដើម្បីគាំពារដល់ពលរដ្ឋកម្ពុជា ជាពិសេសស្ត្រីមានផ្ទៃពោះ។ ក្នុងនោះរួមមានកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំ កម្មវិធីផ្តល់ប្រាក់ឧបត្ថម្ភបន្ថែមជូនកម្មករនិយោជិតជាស្ត្រីនៅពេលសម្រាលកូន និងការផ្តល់ប្រាក់ឧបត្ថម្ភមាតុភាពជូនមន្ត្រីរាជការជាស្ត្រីសម្រាលកូនជាដើម។
លោកចន ណារិទ្ធបានបញ្ជាក់ថា ចាប់ពីដើមខែសីហាខាងមុខនេះទៅ រាជរដ្ឋាភិបាលនឹងផ្តល់ប្រាក់ឧបត្ថម្ភបន្ថែមដល់ស្ត្រីដែលជាមន្ត្រីរាជការ មន្ត្រីកិច្ចសន្យា មន្ត្រីកម្មសិក្សា កម្មករនិយោជិតជាសមាជិក ប.ស.ស.និងស្ត្រីមកពីគ្រួសារក្រីក្រ ក្នុងអំឡុងពេលមានផ្ទៃពោះ ពេលសម្រាល និងក្រោយពេលសម្រាល រហូតដល់កូនមានអាយុ ២ ឆ្នាំ។ បើសរុបជាសាច់ប្រាក់មានចំនួនប្រមាណ ១ ៥២០ ០០០ រហូតដល់ ២ ៧២០ ០០០រៀលដោយនឹងគិតតាមចំនួនកូន និងលក្ខខណ្ឌចាំបាច់មួយចំនួនទៀត ដើម្បីបន្តគាំពារស្ត្រីមានផ្ទៃពោះ និងកុមារតូច ក៏ដូចជាជំរុញការអភិវឌ្ឍមូលធនមនុស្សបន្ថែមទៀតស្របតាមគោលនយោបាយជាតិគាំពារសង្គម។
លោកបានពន្យល់ពីនីតិវិធីនៃការបើកផ្តល់ថា ការបើកផ្តល់ចែកចេញជា ៣ ដំណាក់កាល ដោយដំណាក់កាលទី ១ ជាដំណាក់កាលមកពិនិត្យផ្ទៃពោះមុនសម្រាល ៤លើក។ ដំណាក់កាលទី ២ ពេលសម្រាល និង ដំណាក់កាលទី ៣ ជាដំណាក់កាលយកកូនមកពិនិត្យសុខភាព និងទទួលវ៉ាក់សាំងបង្ការបន្ទាប់ សរុបចំនួន ១០ ដង ដោយគោរពតាមលក្ខខណ្ឌផ្សេងៗមួយចំនួនទៀត។ នេះបើយោងតាមប្រភពដដែលនេះ៕
