ក្រសួងប្រៃសណីយ៍និងទូរគមនាគមន៍ (ក.ប.ទ.) បានណែនាំនូវមុខងារយ៉ាងសំខាន់ថ្មីមួយទៀត គឺមុខងារការដាក់ពាក្យបណ្ដឹងតវ៉ា ដែលអនុញ្ញាតឱ្យអតិថិជនរាយការណ៍ពីបញ្ហាគុណភាពសេវា ដែលកំពុងជួបប្រទះ និងទទួលបានដំណោះស្រាយលើបញ្ហាទាំងនេះពីនិយតករទូរគមនាគមន៍កម្ពុជា។
សេចក្តីជូនដំណឹងរបស់ ក.ប.ទ. ចុះថ្ងៃទី ២០ ខែកក្កដា បានឱ្យដឹងថា ដើម្បីការពារសិទ្ធិនិងផលប្រយោជន៍របស់អ្នកប្រើប្រាស់ក្នុងការទទួលបានសេវាទូរគមនាគមន៍ប្រកបដោយគុណភាព និងដើម្បីលើកកម្ពស់តម្លាភាពនៃការផ្តល់ទិន្នន័យនិងព័ត៌មានជាក់លាក់អំពីស្ថានភាពនៃការប្រើប្រាស់ នៅឆ្នាំ ២០២២ ក.ប.ទ. បានដាក់ឱ្យប្រើប្រាស់ កម្មវិធីវាស់ស្ទង់គុណភាពសេវាទូរស័ព្ទ និងល្បឿនអ៊ីនធឺណិត ដែលមានឈ្មោះថា “MPTC Speed Test ” នៅលើទូរស័ព្ទដៃ។ លទ្ធផលនៃការវាស់ស្ទង់របស់អ្នកប្រើប្រាស់នឹងក្លាយជាទិន្នន័យចាំបាច់ សម្រាប់យកទៅវិភាគ និងរកដំណោះស្រាយ សំដៅពង្រឹងគុណភាពសេវាទូរគមនាគមន៍ឱ្យកាន់តែប្រសើរ។
ក.ប.ទ. ឱ្យដឹងថា៖ «បច្ចុប្បន្ននេះ ក្រៅអំពីមុខងារចម្បងសម្រាប់វាស់ស្ទង់កម្រិតសេវាទូរស័ព្ទ និងដំណើរការអ៊ីនធឺណិតនៅគ្រប់ទីកន្លែង និងគ្រប់ពេលវេលា កម្មវិធី MPTC Speed Test នេះ មានមុខងារយ៉ាងសំខាន់មួយទៀតគឺ មុខងារការដាក់ពាក្យបណ្ដឹងតវ៉ា ដែលអនុញ្ញាតឱ្យអតិថិជនរាយការណ៍ពីបញ្ហាគុណភាពសេវាដែលកំពុងជួបប្រទះ និងទទួលបានដំណោះស្រាយលើបញ្ហាទាំងនេះពីនិយតករទូរគមនាគមន៍កម្ពុជា»។
បើតាម ក.ប.ទ. អតិថិជនអាចធ្វើការដាក់ពាក្យបណ្តឹងបានតាមរយៈកម្មវិធី MPTC Speed Test ដែលមាននៅលើ App Store ឬ Play Store និងអំពាវនាវជាថ្មីម្ដងទៀត ដល់សាធារណជនទាំងអស់ចូលរួមទាញយក (Download) កម្មវិធីនេះ ដើម្បីចូលរួមលើកកម្ពស់គុណភាពសេវាទូរគមនាគមន៍ឱ្យកាន់តែប្រសើរ។
ក.ប.ទ ជម្រាបជូនថា ប្រសិនបើមានបញ្ហាក្នុងការបំពេញពាក្យបណ្តឹង សូមទំនាក់ទំនងលេខ ៦៧៨៩ (រៀងរាល់ម៉ោងធ្វើការដោយឥតគិតថ្លៃ)។
គួរជម្រាបថា ការដាក់ឱ្យដំណើរការកម្មវិធីវាស់ស្ទង់គុណភាពសេវានេះ បន្ទាប់ពីលោកនាយករដ្ឋមន្ត្រី ហ៊ុន សែន បានប្រាប់ឱ្យក្រុមហ៊ុនផ្គត់ផ្គង់សេវាទូរស័ព្ទ ក៏ដូចជាក្រសួងប្រៃសណីយ៍ សហការគ្នាបង្កើនគុណភាពសេវានៅតាមតំបន់នានា ជាពិសេសនៅតំបន់ទេសចរណ៍៕
