អ្នកសង្កេតការណ៍អន្តរជាតិធ្វើសន្និសីទសារព័ត៌មាន ស្ដីពីការបោះឆ្នោតជ្រើសតាំងតំណាងរាស្ត្រនីតិកាលទី៧ កាលពីថ្ងៃម្សិលមិញ។ រូបថត FN
ភ្នំពេញៈ ក្រុមអ្នកសង្កេតការណ៍ចិនដែលបានមកសង្កេតការណ៍បោះឆ្នោតនៅកម្ពុជា ក្នុងអាណត្តិទី៧ នេះ បានលើកឡើងថា ការបោះឆ្នោតនេះមានសន្តិភាព យុត្តិធម៌ បរិយាប័ន្ននិងតម្លាភាព ដោយប្រកាន់ខ្ជាប់នូវស្តង់ដាអន្តរជាតិ ខណៈក្រុមអ្នកសង្កេតការណ៍រុស្ស៊ី អះអាងថា ការបោះឆ្នោតប្រកបដោយវិជ្ជាជីវៈដំណើរការទៅដោយសុវត្ថិភាព និងមានតម្លាភាព។
លោកស្រី ជូ ហ្គួយជឺ (Zhu Guije) អគ្គនាយិការងមកពីបណ្តាញអង្គការក្រៅរដ្ឋាភិបាលចិនសម្រាប់ការផ្លាស់ប្តូរអន្តរជាតិ (CNIE) លែងក្នុងសន្និសីទកាសែតរបស់អ្នកសង្កេតការណ៍អន្តរជាតិនាថ្ងៃទី ២៤ ខែកក្កដាថា ក្នុងនាមជាអ្នកសង្កេតការណ៍អន្តរជាតិ គណៈប្រតិភូ CNIE មានការចាប់អារម្មណ៍ ដោយឃើញថា ប្រជាពលរដ្ឋកម្ពុជាមានការសាទរក្នុងការចូលរួមបោះឆ្នោត ជាឧទាហរណ៍ នៅក្នុងការិយាល័យបោះឆ្នោត ដែលគណៈប្រតិភូ CNIE បានទៅសង្កេត ហើយឃើញថា មានការចាប់អារម្មណ៍ខ្លាំងពីអ្នកបោះឆ្នោតក្នុងនោះក៏មានស្ត្រីដែលមានកូនតូច និងអ្នកបោះឆ្នោតដែលមានវ័យចំណាស់ផងដែរបានទៅដល់ការិយាល័យបោះឆ្នោតទាំងព្រឹកព្រលឹម។
លោកស្រីថ្លែងថា ការចូលរួមបែបនេះបង្ហាញពីទំនុកចិត្តរបស់សាធារណជន ចំពោះដំណើរការនៃការបោះឆ្នោត និងការគ្រប់គ្រងរបស់គ.ជ.ប និងភ្នាក់ងារគាំទ្រផ្សេងទៀតនៅក្នុងការបង្កើតបាននូវបរិយាកាសអំណោយផលសម្រាប់ដំណើរការបោះឆ្នោតប្រកបដោយជោគជ័យ។ គណៈប្រតិភូ CNIE កោតសរសើរយ៉ាងខ្លាំងចំពោះវិជ្ជាជីវៈការងារ របស់ គ.ជ.ប។ប្រជាជនកម្ពុជាបានត្រៀមខ្លួនរួចជាស្រេចក្នុងការបោះឆ្នោតជ្រើសរើសថ្នាក់ដឹកនាំរបស់ខ្លួន។ ប្រជាជនកម្ពុជារីករាយនឹងសន្តិភាព និងការអភិវឌ្ឍយ៉ាងឆាប់រហ័សនៅក្នុងប្រទេស។
លោកស្រី ជូ ហ្គួយជឺ ថ្លែងតាមរយៈការបកប្រែថា៖ «តាមការសង្កេត និងលទ្ធផលនៃការបោះឆ្នោតនេះ គណៈប្រតិភូ CNIE បានចាត់ទុកថា ការបោះឆ្នោតជ្រើសតាំងតំណាងរាស្ត្រនីតិកាលទី៧ នៅព្រះរាជាណាចក្រកម្ពុជាមានសន្តិភាព យុត្តិធម៌ និងតម្លាភាព ដោយប្រកាន់ខ្ជាប់នូវស្តង់ដាអន្តរជាតិ យុត្តិធម៌ សន្តិភាព តម្លាភាព និងបរិយាប័ន្ន»។
លោកស្រីបន្ថែមថា៖ «គណៈប្រតិភូ CNIE សូមអបអរសាទរដល់ប្រជាជនកម្ពុជាចំពោះការបោះឆ្នោត ប្រកបដោយជោគជ័យ ជាប្រវត្តិសាស្ត្រ និងលើកទឹកចិត្តដល់ប្រជាជនកម្ពុជា និងគណបក្សនយោបាយទាំងអស់ឱ្យធ្វើការរួមគ្នា ដើម្បីការអភិវឌ្ឍសេដ្ឋកិច្ចសង្គមរបស់ប្រទេសកម្ពុជា ឱ្យកាន់តែរីកចម្រើន»។
អ្នកសង្កេតការណ៍អន្តរជាតិ កំពុងសង្កេតពីដំណើរការបោះឆ្នោត នៅថ្ងៃទី ២៣ ខែកក្កដា។ ហេង ជីវ័ន
លោកស្រី ជូ ហ្គួយជឺ បានថ្លែងថាប្រទេសកម្ពុជា ជាមួយនឹងបណ្ដាប្រទេសអាស៊ីផ្សេងទៀត ជាពិសេសយុវជន បានដើរតួនាទីយ៉ាងសកម្មនៅក្នុងដំណើរការនយោបាយ និងការអភិវឌ្ឍលទ្ធិប្រជាធិបតេយ្យនៅក្នុងប្រទេសកម្ពុជា។ យុវជនកម្ពុជាបានយកបទពិសោធន៍ពីអ្នកជំនាន់មុនប្រកបដោយទំនុកចិត្ត ជាមួយនឹងការប្តេជ្ញាចិត្ត និងសេចក្ដីប្រាថ្នាដ៏មុតមាំនៅក្នុងការកសាងសង្គមមួយដ៏ត្រឹមត្រូវ និងការពារកេរដំណែលរបស់ អ្នកជំនាន់មុនរបស់ខ្លួន។
លោក Andrey Maximov ប្រធានគណៈកម្មការនៃសភាពលរដ្ឋនៃសហព័ន្ធរុស្ស៊ី (Civic Chamber of Russian Federation) ទទួលបន្ទុកអភិវឌ្ឍន៍ដែនដី បរិស្ថានទីក្រុង និងហេដ្ឋារចនាសម្ព័ន្ធ ថ្លែងក្នុងសន្និសីទកាសែតនេះថា Civic chamber នៅមុនការបោះឆ្នោត ១ ថ្ងៃ មិនមានការបំពានទៅលើច្បាប់ និងវិធាននោះទេ។ ដូច្នេះ យុទ្ធនាការឃោសនាបោះឆ្នោតរបស់គណបក្សនយោបាយគឺមានដំណើរការល្អ។
លោកថ្លែងតាមរយៈការបកប្រែថា៖ «នៅក្នុងអំឡុងថ្ងៃបោះឆ្នោត ចំពោះអ្នកដែលបានចុះឈ្មោះបោះឆ្នោត គឺបានទៅបោះឆ្នោត។យើងមិនឃើញមានបណ្ដឹង។ យើងមិនឃើញមានអំពើហិង្សាណាមួយ។ អ្នកបោះឆ្នោតគឺថារីករាយ សប្បាយទៅចូលរួមបោះឆ្នោត ហើយយើងឃើញបោះឆ្នោតនៅចំពោះមុខអ្នកសង្កេតការណ៍នៅតាមស្ថានីយនីមួយៗ។យើងមិនបាន ឃើញមានសញ្ញាណាមួយនៃការគំរាមកំហែង ការសម្លុតទេ»។
លោកលោក Andrey Maximov បានថ្លែងបន្តទៀតថា៖ «ការបោះឆ្នោតនេះគឺបានដំណើរការទៅដោយសុវត្ថិភាព ហើយយើងសន្និដ្ឋានថា ការបោះឆ្នោត ដែលបានរៀបចំ គឺប្រកបដោយវិជ្ជាជីវៈ និងមានការផ្តួចផ្តើមដ៏ល្អ ដែលរៀបចំដោយគ.ជ.ប។ ចំនួនអ្នកដែលបានចូលរួមបោះឆ្នោត គឺមានច្រើន។ យើងឃើញដំណើរការដោយមានតម្លាភាព»៕
.jpg)
