រដ្ឋបាលក្រុងសែនមនោរម្យ នាថ្ងៃទី២៨ ខែកក្កដា បានជូនដំណឹងប្រជាពលរដ្ឋ ដែលចិញ្ចឹមសត្វពាហនៈ (គោ ក្របី សេះ ជ្រូក ពពែ...) នៅក្នុងទីប្រជុំជន។
មណ្ឌលគិរីៈ រដ្ឋបាលក្រុងសែនមនោរម្យ ព្រមានចាត់វិធានការចុះចាប់សត្វពាហនៈរបស់ប្រជាពលរដ្ឋណា ដែលបន្តលែងចោលដើររហេតរហូតពាសវាលពាសកាល ដើម្បីធ្វើកិច្ចសន្យានិងផាកពិន័យចាប់ពីថ្ងៃទី៧ ខែសីហា ខាងមុខនេះ។
រដ្ឋបាលក្រុងសែនមនោរម្យ នាថ្ងៃទី២៨ ខែកក្កដា បានជូនដំណឹងប្រជាពលរដ្ឋ ដែលចិញ្ចឹមសត្វពាហនៈ (គោ ក្របី សេះ ជ្រូក ពពែ...) នៅក្នុងទីប្រជុំជនក្រុងសែនមនោរម្យថា កន្លងមករដ្ឋបាលក្រុង បានសង្កេតឃើញថា សត្វគោ ក្របី សេះ ជ្រូក ពពែ ជាដើមត្រូវបានលែងចោលដើររហេតរហូត ពាសវាលពាសកាលតាមដងផ្លូវនិងទីសាធារណៈក្នុងទីប្រជុំជន បំផ្លិចបំផ្លាញទ្រព្យសម្បត្តិសាធារណៈ និងស៊ីដំណាំរបស់ប្រជាពលរដ្ឋផ្សេងទៀត ហើយធ្វើឱ្យប៉ះពាល់ដល់សណ្តាប់ធ្នាប់របៀបរៀបរយ អនាម័យ បរិស្ថាន និងសោភ័ណភាពនៅក្នុងក្រុង។
ដើម្បីរួមចំណែកក្នុងការបង្ការគ្រោះថ្នាក់ចរាចរលើផ្លូវសាធារណៈដោយសារសត្វពាហនៈ និង ចូលរួមថែរក្សាសណ្តាប់ធ្នាប់ របៀបរៀបរយ លើកកម្ពស់អនាម័យ បរិស្ថាន សោភ័ណភាពតាមដងផ្លូវនិងទីសាធារណៈនៅក្នុងទីប្រជុំជនក្រុង រដ្ឋបាលក្រុង បានស្នើ ប្រជាពលរដ្ឋ ដែលចិញ្ចឹមសត្វពាហនៈទាំងនោះ ត្រូវចិញ្ចឹមក្នុងទ្រុង ឬក្រោលឱ្យបានត្រឹមត្រូវ និងហាមព្រលែងដើររហេតរហូតពាសវាលពាសកាលតាមដងផ្លូវនិងទីសាធារណៈ បំផ្លិចបំផ្លាញទ្រព្យសម្បត្តិ សាធារណៈ និងស៊ីដំណាំរបស់បងប្អូនប្រជាពលរដ្ឋ។
រដ្ឋបាលក្រុងបានទុករយៈពេល ១០ ថ្ងៃ ដោយគិតចាប់ពីថ្ងៃទី២៨ ខែកក្កដា ឆ្នាំ២០២៣ ដល់ថ្ងៃទី៦ ខែសីហា ឆ្នាំ២០២៣ ដើម្បីឱ្យចិញ្ចឹមសត្វពាហនៈក្នុងទីប្រជុំជនក្រុងអនុវត្តតាមការរៀបរាប់ខាងលើនេះ។
រដ្ឋបាលក្រុងបានបញ្ជាក់ថា៖«ចាប់ពីថ្ងៃទី៧ ខែសីហា ឆ្នាំ២០២៣ រដ្ឋបាលក្រុង នឹងមានវិធានការចុះចាប់ និងប្រមូលសត្វ ពាហនៈ (គោ ក្របី សេះ ជ្រូក ពពែ...) របស់លោក លោកស្រី ដែលលែងចោលដើររហេតរហូតពាសវាលពាសកាល ព្រមទាំងធ្វើកិច្ចសន្យានិងផាកពិន័យតាមការកំណត់ដោយដីការបស់រដ្ឋបាលក្រុង។
ការជូនដំណឹងនេះគឺធ្វើឡើងដោយយោងទៅតាមច្បាប់ស្តីពីចរាចរណ៍ផ្លូវគោក ជំពូកទី៥ មាត្រា៣៣ ចុះថ្ងៃទី២៦ ខែមករា ឆ្នាំ២០១៧ និងស្មារតីនៃកិច្ចប្រជុំសាមញ្ញលើកទី៥០ ឆ្នាំទី៥ អាណត្តិទី៣ របស់ក្រុមប្រឹក្សាក្រុង នាថ្ងៃទី២៨ ខែកក្កដា ឆ្នាំ២០២៣៕
