ក្រចេះ៖ អាជ្ញាធរ សហគមន៍ និងអង្គការមិនមែនរដ្ឋាភិបាលក្នុងខេត្តក្រចេះ និងខេត្តមណ្ឌលគិរី បានជួបប្រជុំគ្នាដើម្បីពិភាក្សាអំពីបង្កើនប្រសិទ្ធភាពនៃការល្បាតព្រៃឈើ។
ខណ្ឌរដ្ឋបាលព្រៃឈើខេត្តក្រចេះ នាថ្ងៃទី២៨ ខែកក្កដា បានរៀបចំកិច្ចប្រជុំពិគ្រោះយោបល់ស្តីពី «គោលការណ៍ណែនាំល្បាតព្រៃឈើដោយប្រសិទ្ធភាព» ក្រោមវត្តមាន លោក នួន ពៅរតនា នាយខណ្ឌរដ្ឋបាលព្រៃឈើក្រចេះ នៅខេត្តក្រចេះ។
កិច្ចប្រជុំពិគ្រោះយោបល់នេះធ្វើឡើងដោយសហការជាមួយគម្រោងស្តីពី «ការបង្កើនសមត្ថភាពមន្ត្រីរដ្ឋបាលព្រៃឈើ និង សហគមន៍មូលដ្ឋាន ដើម្បីអនុវត្តឱ្យមានប្រសិទ្ធភាពកម្មវិធី សហគមន៍ព្រៃឈើក្នុងខេត្តមណ្ឌលគិរី និងខេត្តក្រចេះ» របស់រដ្ឋបាលព្រៃឈើ ក្រោមជំនួយគាំទ្ររបស់អង្គការ ITTO ។
កិច្ចប្រជុំនេះមានការចូលរួមមកពីមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ និងខេត្តមណ្ឌលគិរី សាលាឃុំកន្ទួត អង្គការមិនមែនរដ្ឋាភិបាល និងតំណាង សហគមន៍ព្រៃឈើស្ថិតនៅក្នុងខេត្តក្រចេះ និង ខេត្តមណ្ឌលគិរីសរុបចំនួន ២៦នាក់ (ស្ត្រី២នាក់) ក្នុងគោលបំណងដើម្បីកែសម្រួល និងប្រមូលធាតុចូលលើសេចក្តីព្រាងគោលការណ៍ណែនាំល្បាតព្រៃឈើដោយប្រសិទ្ធភាព៕
