លោកនាយករដ្ឋមន្រ្តី ហ៊ុន សែន ថតរូបអនុស្សាវរីយ៍ជាមួយនឹងក្រុមយុវជនកាយរឹទ្ធិជាតិកម្ពុជា។ រូបថត៖ ក្រសួងអប់រំ យុវជន និងកីឡា
ភ្នំពេញៈកាយរឹទ្ធិជាតិកម្ពុជាបានអនុម័តជាផ្លូវការនូវសេចក្តីព្រាងផែនការយុទ្ធសាស្ត្ររយៈពេល ៥ ឆ្នាំ ពីឆ្នាំ២០២៣ ដល់ឆ្នាំ២០២៧ ក្នុងការជំរុញសកម្មភាពនៃសមាជិករបស់ខ្លួន ក្នុងសហគមន៍លើការអនុវត្តគោលដៅអភិវឌ្ឍ ន៍ប្រកបដោយចីរភាព (SDGs) របស់អង្គការសហប្រជាជាតិ ដើម្បីឱ្យសមាជិកខ្លួនបានចូលរួមចំណែកយ៉ាងផុសផុលក្នុងស្មារតីកសាងសង្គមជាតិ និងពិភពលោក។
ការអនុម័តនេះ ត្រូវបានធ្វើឡើង ដើម្បីអបអរទិវាកន្សែងកាយរឹទ្ធិពិភពលោក (World Scouts Scarf Day) នាថ្ងៃទី១ ខែសីហា ឆ្នាំ២០២៣ នេះ ដែលអង្គការពិភពលោកនៃចលនាកាយរឹទិ្ធ បានប្រារព្ធទិវាកន្សែងកាយរឹទិ្ធពិភពលោកដែលខ្លួនបានកំណត់យកក្នុងការប្រារព្ធជារៀងរាល់ឆ្នាំ។
លោក ឯម ពិសិដ្ឋ ប្រធានលេខាធិការនៃកាយរឹទ្ធិជាតិកម្ពុជា បានប្រាប់ឱ្យដឹងនាថ្ងៃទី១ ខែសីហា ថា កាយរឹទ្ធិជាតិកម្ពុជានៅក្រោមការគ្រប់គ្រងរបស់ក្រសួងអប់រំ យុវជន និងកីឡា ក៏បានចូលរួមអបអរទិវានេះដែរ ដោយបានអនុម័តជាផ្លូវការនូវផែនការយុទ្ធសាស្រ្តសកម្មភាព៥ឆ្នាំ ដែលខ្លួនបានធ្វើសេចក្តីព្រាងកាលពីដើមឆ្នាំ២០២៣ ដើម្បីឱ្យសមាជិករបស់ខ្លួន កាន់តែបានចូលរួមចំណែកក្នុងសកម្មភាពកសាងសង្គមជាតិ។
លោក ឯម ពិសិដ្ឋ បានបន្តថា ចលនាកាយរឹទ្ធិជាតិកម្ពុជា នឹងជំរុញសកម្មភាពរបស់សមាជិកខ្លួន នៅតាមសហគមន៍ដូចជា កម្មវិធីអ្នកនាំសារសន្តិភាព កម្មវិធីកាយរឹទ្ធិបៃតងតាមរយៈការលើកកម្ពស់បរិស្ថាន កម្មវិធីកាយរឹទ្ធិកកើតឡើងវិញតាមរយៈការលើកកម្ពស់ប្រើប្រាស់សម្ភារឡើងវិញ (recycle) និងការប្រើប្រាស់ថាមពលកកើតឡើងវិញជាដើម។
លោកបានលើកឡើងពីសារៈសំខាន់នៃចលនាកាយរឹទ្ធិ ថា៖«កន្លងមក យើងបានជួយចូលរួមចំណែកអភិវឌ្ឍកុមារ យុវជនឱ្យមានបំណិនកាយសម្បទា និងការអភិវឌ្ឍបញ្ញាស្មារតី។ យើងចូលរួមចំណែកអភិវឌ្ឍកុមារ និងយុវជន ដូចជាកាយសម្បទា ផ្លូវចិត្ត បញ្ញា និងផ្លូវសង្គម។ យើងណែនាំសមាជិកយើងឱ្យក្លាយទៅជាបុគ្គលដែលការទទួលខុសត្រូវចំពោះសង្គមជាតិ»។
ជារៀងរាល់ថ្ងៃទី១ ខែសីហា សមាជិកទាំងអស់នៃអង្គការពិភពលោកនៃចលនាកាយរឹទិ្ធ ក្នុងនោះមាន កាយរឹទ្ធិជាតិកម្ពុជានិងសមាគមកាយឫទ្ធិនារីកម្ពុជា ផងដែរ តែងតែប្រារព្ធរួមគ្នាចំពោះទិវាកន្សែងកាយរឹទិ្ធពិភពលោក តាមរយៈការធ្វើសកម្មភាពផ្សេងៗ ក្នុងគោលដៅជួយសហគមន៍ និងសង្គម។ នេះបើតាមការបញ្ជាក់បន្ថែមពីលោកឯម ពិសិដ្ឋ។
នៅថ្ងៃទី១ សីហា ឆ្នាំ២០២៣ នេះ អង្គការពិភពលោកនៃចលនាកាយរឹទិ្ធ បានប្រារព្ធទិវាកន្សែងកាយរឹទិ្ធពិភពលោក ក្រោមប្រធានបទ«ស្មារតីកាយរឹទិ្ធកម្ម" ជាកាយរឹទិ្ធ ១ ថ្ងៃ កាយរឹទិ្ធ ១ ជីវិត (the "Spirit of Scouting" visible:Once a Scout)។ កន្សែងកាយរឹទិ្ធ គឺជានិមិត្តរូបនៃចលនាកាយរឹទិ្ធពិភពលោក និងចលនាកាយឫទ្ធិនារីពិភពលោក សម្រាប់ពាក់សម្គាល់អត្តសញ្ញាណកាយរឹទិ្ធ ការគោរពច្បាប់កាយរឹទិ្ធ និងអនុវត្តតាមពាក្សសច្ចាប្រណិធាន នៅពេលដែលបំពាក់កន្សែងចូលជាសមាជិកពេញសិទ្ធិរបស់ចលនាកាយរឹទិ្ធ។
កាយរឹទ្ធិជាតិកម្ពុជា ជាស្ថាប័នស្ថិតក្រោមការគ្រប់គ្រងរបស់ក្រសួងអប់រំ យុវជន និងកីឡា ដែលបានក្លាយជាសមាជិកនៃចលនាកាយរឹទិ្ធពិភពលោកនៅថ្ងៃទី១ ខែកក្កដា ឆ្នាំ២០០៨ កន្លងទៅ៕
