លោកនាយករដ្ឋមន្ត្រី ហ៊ុន សែន ថ្លែងកាលពីថ្ងៃម្សិលមិញ។ រូបថត SPM
កណ្តាលៈ លោកនាយករដ្ឋមន្ត្រី ហ៊ុន សែន ដែលនឹងផុតអាណត្តិនៅចុងខែសីហានេះ បានប្រកាសថា មានហេតុផលចំនួន ៤ ដែលធ្វើឱ្យលោកសម្រេចចិត្តចាកចេញពីតំណែងជានាយករដ្ឋមន្ត្រី បន្ទាប់ពីលោកបានកាន់កាប់តំណែងនេះ អស់រយៈពេលជាង ៣៨ ឆ្នាំមកហើយ។
លោកបញ្ជាក់ថា មូលហេតុ ៤ ដែលធ្វើឱ្យលោកសម្រេចលាលែងពីតំណែងជានាយករដ្ឋមន្ត្រី គឺ៖ ១ ការផ្ទេរតំណែងនៅពេលនេះគឺមានស្ថិរភាព និងសុវត្ថិភាព ជាងពេលដែលលោកចាស់ ឬស្លាប់, ២ ក្រុមយុវជនបន្តវេនបានត្រៀមខ្លួនយ៉ាងល្អ ដើម្បីទទួលអំរែកបន្តពីថ្នាក់ដឹកនាំជំនាន់មុន។ ៣ ជំនាន់ចាស់ចាកចេញពីតំណែងដឹកនាំ ប៉ុន្តែមិនមែនចាកចេញពីឆាកនយោបាយទេនិងហេតុផលទី ៤ ចុងក្រោយ គឺសភាពការណ៍គ្រប់ផ្នែក អនុគ្រោះឱ្យក្រុមបន្តវេនអាចចេញ ដំណើរបាន។
ការលើកឡើងពីហេតុផលទាំងនេះត្រូវបានលោក ហ៊ុន សែន ធ្វើឡើងក្នុងឱកាសលោកធ្វើជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូការនូវផ្លូវក្រវាត់ក្រុងទី៣ នាព្រឹកថ្ងៃទី ៣ សីហា ឆ្នាំ ២០២៣។
លោកបានថ្លែងថា៖ «ខ្ញុំសូមបញ្ជាក់បន្តិចថា តើមានមនុស្សប៉ុន្មាននាក់នៅក្នុងប្រទេសកម្ពុជាតាំងពីសម័យដើម រហូតមកដែលធ្លាប់បានលះបង់អំណាចដូចខ្ញុំ នៅពេលដែលខ្ញុំអាចមានលទ្ធភាពធ្វើជានាយករដ្ឋមន្ត្រី បាន ៥ ឆ្នាំឬ ១០ ឆ្នាំទៀត ប៉ុន្តែមិនមែនជាការល្អទេ បើសិនជាដល់ពេលយើងចាស់ពេក ឬដល់ពេលយើងស្លាប់»។
ទោះយ៉ាងណាលោកបានបន្តថា ជំនាន់ចាស់មិនទាន់ចាកចេញពីវិស័យនយោបាយរបស់កម្ពុជានោះទេ ខណៈលោកនឹងនៅតែបន្តធ្វើជាប្រធានគណបក្សប្រជាជនកម្ពុជា ចំណែកមន្ដ្រីចាស់ៗមួយចំនួនទៀតក៏នឹងបន្តធ្វើការងារលើវិស័យនយោបាយនេះដែរនៅក្នុងជួរគណបក្សប្រជាជនកម្ពុជា។ ប៉ុន្តែលោកក៏បានបញ្ជាក់ជាថ្មីផងដែរថា លោកនឹងមិនព្យាយាមធ្វើឱ្យប៉ះពាល់ដល់ការដឹកនាំរបស់នាយករដ្ឋមន្ដ្រី ឬគណៈរដ្ឋមន្ដ្រីថ្មីនៅពេលឡើងកាន់អំណាចនោះទេ។
លោក ហ៊ុន សែន ថ្លែងថា៖ «ប៉ុន្ដែបើនាយករដ្ឋមន្ដ្រី និងរដ្ឋមន្ដ្រីធ្វើខុសពីគោលការណ៍គណបក្សប្រជាជនកម្ពុជា នោះនឹងត្រូវអញ្ជើញមកប្រជុំដោះស្រាយភ្លាម»។
អគ្គលេខាធិការរាជបណ្ឌិត្យសភាកម្ពុជា លោក យង់ ពៅ បានថ្លែងនៅថ្ងៃទី ៣ ខែសីហាថា ការផ្ទេរការដឹកនាំគឺស្របពេលវេលាដែលត្រូវធានាស្ថិរភាពនយោបាយហើយជាគោលការណ៍គ្រឹះ បើមិនមានស្ថិរភាពនយោបាយ លំនឹងនយោបាយទេ នោះការដឹកនាំសង្គមប្រទេសនឹងធ្វើឱ្យមានបញ្ហា ឬជួបវិបត្តិអ្វីមួយជាបន្តទៀត។
លោកបន្តថា នេះជាអ្វីដែលគណបក្សប្រជាជនកម្ពុជាបានធ្វើដែលពីមុនមកមិនដែលមានការផ្ទេរតំណែង ឬផ្ទេរអំណាចប្រកបដោយស្ថិរភាពដូចនេះទេ។ អ៊ីចឹង! នេះគឺជាគំរូមួយដែលធានាសុខសន្តិភាពជូនប្រទេសជាតិ។ លោក យង់ ពៅ បញ្ជាក់ថា៖ «ក្នុងបរិការណ៍នេះ ថ្នាក់ដឹកនាំដែលជាអ្នកជំនាន់ក្រោយបានចូលរួមក្នុងសង្គម និងនយោបាយកន្លងទៅទាំងចំណេះដឹង បទពិសោធន៍ និងការងារសង្គមបានរួចរាល់ដែលភាគច្រើនបំផុតពួកគាត់បានដឹកនាំតាមមន្ទីរ ក្រសួង ស្ថាប័នរួចជាស្រេច និងកិច្ចការសង្គមផ្សេងៗទៀត។ ដូចនេះ ជាពេលវេលាមួយសមស្របដែលគាត់អាចធ្វើកិច្ចការងារនេះបាន»។
ម្យ៉ាងទៀតទាន់នៅមានអ្នកជំនាន់មុន នៅមានថាមពលតម្រែតម្រង់ជួយមើលការដឹកនាំប្រទេសជាតិនេះបន្ត ប៉ុន្តែប្រសិនបើចាំមើលអ្នកដឹកនាំជំនាន់មុនអស់ថាមពលនោះ នឹងមិនមានអ្នកចង្អុលបង្ហាញ ឬជាអ្នកដែលជួយបង្វឹក ឬបង្រៀនបានទេ។ នេះបើយោងតាមលោក យង់ ពៅ បន្ថែម។
លោកបញ្ជាក់ឱ្យដឹងផងដែរថា៖ «អ្នកនយោបាយជាន់មុននេះ ទោះតែចេញពីការដឹកនាំផ្ទាល់ ប៉ុន្តែនៅតែជាអ្នកគូសវាសនយោបាយ នៅតែជាអ្នកចង្អុលបង្ហាញនយោបាយទាំងនៅក្នុងឋានានុក្រមបក្ស និងថ្នាក់ដឹកនាំកំពូលៗរបស់ជាតិ និងថ្នាក់កំពូលៗរបស់បក្សផងដែរ»។
សូមរំឭកផងដែរថា នៅថ្ងៃទី ២៦ ខែកក្កដា កន្លងទៅនេះ លោក ហ៊ុន សែន ក៏បានថ្លែងសារដោយប្រកាសជាសាធារណៈថា លោក ហ៊ុន ម៉ាណែត នឹងក្លាយជានាយករដ្ឋមន្ត្រីក្នុងអាណ្តិតថ្មី អាណត្តិទី៧ នាល្ងាចថ្ងៃទី ២២ ខែសីហា ឆ្នាំ ២០២៣ បន្ទាប់ពីរដ្ឋសភា បើកកិច្ចប្រជុំលើកដំបូងរបស់ខ្លួន៕
