កំពតៈ មន្ត្រីជំនាញជលផល និងសហគមន៍នេសាទត្រពាំងសង្កែ ឃុំត្រពាំងសង្កែ ស្រុកទឹកឈូ ខេត្តកំពតនារាត្រីថ្ងៃទី ៣ ខែសីហា ឆ្នាំ ២០២៣ បានរកឃើញឈឹបឆក់ និងបានរុះរើឧបករណ៍ឆក់ចេញពីឈឹបរបស់អ្នកនេសាទនៅកំពង់ទូកតែម្តង។
ការចុះបង្ក្រាបនេះត្រូវបានធ្វើឡើងក្នុងអំឡុងពេលចុះសកម្មភាពល្បាតបទល្មើសនេសាទក្នុងដែននេសាទរបស់សហគមន៍នេសាទត្រពាំងសង្កែ ដោយមានការចូលរួមសហការពីសមត្ថកិច្ចជំនាញ មន្ត្រីរដ្ឋបាលជលផល៦រូប សមាជិកនិងគណៈកម្មការសហគមន៍១៤រូប។
ទាក់ទងនឹងបទល្មើសនេសាទនេះដែរ សង្កាត់រដ្ឋបាលជលផលសន្ទុកនាពេលថ្មីៗនេះ និងកងរាជអាវុធហត្ថស្រុកសន្ទុក ដែលដឹកនាំដោយលោក ស្រី សំណាង មេបញ្ជាការកងរាជអាវុធហត្ថស្រុកសន្ទុកបានចុះទប់ស្កាត់ និងបង្ក្រាបបទល្មើសជលផល នៅចំណុច តាមដងស្ទឹងតាំងក្រសាំង ដងស្ទឹងជីនិត បឹងខែលរមាស បឹងខ្វែក បឹងលីវ បឹងព្រោះ បឹងក្រៃស្នោធំ បឹងកណ្ដោលតូច បឹងតាមុន និងតំបន់កោះលត ឃុំតាំងក្រសាំង ស្រុកសន្ទុក។
ជាលទ្ធផលអនុវត្តបាន១ករណី ដែលនេសាទដោយឧបករណ៍ឆក់ តែជនសង្ស័យរត់គេចខ្លួនបាត់។ វត្ថុតាងដែលរកឃើញរួមមាន ដុំភ្លើងឆក់ចំនួន២គ្រឿង ដងឆក់ចំនួន៤គ្រឿង អាគុយចំនួន២គ្រឿង ខ្សែភ្លើងប្រវែង១០ម៉ែត្រ និងកានដាក់ត្រីចំនួន២គ្រឿងផងដែរ។នេះបើយោងតាមខណ្ឌរដ្ឋបាលជលផលខេត្តកំពង់ធំ៕
