ថ្នាក់ដឹកនាំគណបក្សភ្លើងទៀនធ្វើសន្និសីទសារព័ត៌មាននៅទីស្នាក់ការគណបក្ស កាលពីថ្ងៃទី ៧ ខែសីហា ឆ្នាំ ២០២៣។ រូបថត សហការី
ភ្នំពេញៈ គណបក្សភ្លើងទៀន បានទទូចចង់ជួបជាមួយនឹងមន្ត្រីនៃក្រសួងមហាផ្ទៃជាថ្មីម្តងទៀត ដើម្បីពិភាក្សាស្វែងរកដំណោះស្រាយជុំវិញលិខិតរដ្ឋបាល ក្រោយពីគណបក្សប្រឆាំងមួយនេះ ត្រូវបានបដិសេធដោយគណៈកម្មាធិការជាតិរៀបចំការបោះឆ្នោត (គ.ជ.ប) សម្រាប់ការចុះបញ្ជីគណបក្សសម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៧ កាលពីថ្ងៃទី ២៣ ខែកក្កដា ឆ្នាំ ២០២៣។
លោក ហុង សុខសួរ នាយកខុទ្ទកាល័យគណបក្សភ្លើងទៀន បានថ្លែងនៅក្នុងសន្និសីទសារព័ត៌មាននាទីស្នាក់ការគណបក្ស កាលពីថ្ងៃទី ៧ ខែសីហា ឆ្នាំ ២០២៣ ដោយលោកបានបញ្ជាក់ដែរថា ការធ្វើសន្និសីទសារព័ត៌មាននៅពេលនេះ ដើម្បីឱ្យសាធារណជនដឹងពីកិច្ចខិតខំប្រឹងប្រែងរបស់គណបក្សភ្លើងទៀន នៅក្នុងការបោះឆ្នោតកាលពីថ្ងៃទី ២៣ ខែកក្កដា ប៉ុន្តែមិនទទួលបានជោគជ័យស្របតាមបំណងដែលបានគ្រោងទុកនោះទេ ដោយសារតែគណបក្សមានបញ្ហាឯកសាររដ្ឋបាលក្នុងការចុះបញ្ជី នៅ គ.ជ.ប។
លោកបានបន្តថា៖ «កន្លងមកនេះ គណបក្សយើងបានជួបជាមួយក្រសួងមហាផ្ទៃ និង គ.ជ.ប ដើម្បីស្វែងរកដំណោះស្រាយលើរដ្ឋបាល ប៉ុន្តែដំណោះស្រាយនេះមិនជោគជ័យ។ គណបក្សបានជួបម្តងរួចហើយកាលពីមុនបោះឆ្នោត ក្រោយមកគណបក្សបានស្នើសុំជួបម្តងទៀត ប៉ុន្តែចម្លើយរបស់ក្រសួងមហាផ្ទៃ ឱ្យរង់ចាំការបោះឆ្នោត និងបង្កើតរដ្ឋាភិបាលថ្មីរួចរាល់»។
លោក ហុង សុខសួរ បានបន្ថែមថា គណបក្សភ្លើងទៀន រហូតមកនៅតែបន្តរង់ចាំដើម្បីរកដំណោះស្រាយនេះ ហើយនៅតែសង្ឃឹមថា រដ្ឋាភិបាល ពិសេសក្រសួងមហាផ្ទៃដែលជាអាណាព្យាបាលរបស់គណបក្សនយោបាយទាំងអស់ដែលចុះបញ្ជីនៅក្រសួង នឹងជួបដោះស្រាយលិខិតរដ្ឋបាលរបស់គណបក្សភ្លើងទៀន ព្រោះគណបក្សនេះមានឆន្ទៈក្នុងការចូលរួមការបោះឆ្នោតនៅពេលខាងមុខៗទៀត។
លោកបញ្ជាក់ថា៖ «រដ្ឋាភិបាលថ្មី នឹងមានឆន្ទៈដោះស្រាយ បញ្ហាគណបក្សភ្លើងទៀន ដើម្បីឱ្យគណបក្សបានចូលរួមចលនាប្រជាធិបតេយ្យ។ យើងចង់ជួបក្រសួងមហាផ្ទៃនេះ គឺដើម្បីរកដំណោះស្រាយបញ្ហាដែលកើតមានកន្លងមក»។
លោក គឹមសួរ ភិរិទ្ធ អ្នកនាំពាក្យគណបក្សភ្លើងទៀន ក៏បានថ្លែងនៅក្នុងសន្និសីទសារព័ត៌មាននោះដែរថា ការខិតខំរបស់គណបក្សភ្លើងទៀន ក្នុងជំនួបពិភាក្សាជាមួយក្រសួងមហាផ្ទៃនេះគឺដើម្បីឆ្លើយតបទៅនឹងផ្លូវច្បាប់ និងរដ្ឋបាល ព្រោះគណបក្សបានបញ្ជាក់រួចហើយថា ការបាត់បង់លិខិតបញ្ជាក់ច្បាប់ដើមនេះ វាបណ្តាលមកពីអ្វីមួយនោះហើយឯកសារក៏មានតម្កល់នៅក្រសួងមហាផ្ទៃថែមទៀត។
លោក គឹមសួរ ភិរិទ្ធ បញ្ជាក់ថា ក្រសួងមហាផ្ទៃអាចធ្វើវិសោធនកម្មច្បាប់ ឬចែងនៅក្នុងអនុក្រឹត្យ ដើម្បីដោះស្រាយ បានពីព្រោះរឿងនេះ គឺជារឿងរដ្ឋបាល។ ជាងនេះទៅទៀត ក្រសួងមហាផ្ទៃដែលជាអាណាព្យាបាលក៏បានអះអាងយ៉ាងច្បាស់ដែរថា គណបក្សភ្លើងទៀនចុះបញ្ជីបានត្រឹមត្រូវ។
លោកថ្លែងថា៖ «អ៊ីចឹង! យើងនៅតែទទូចសុំក្រសួងមហាផ្ទៃ ដោះស្រាយរឿងហ្នឹងតទៅទៀត ដើម្បីធានាថា ទៅថ្ងៃមុខ គណបក្សមិនថា គណបក្សភ្លើងទៀនទេវាអាចមានគណបក្សផ្សេងទៀត នឹងអាចជួបបញ្ហា នឹងអាចដោះស្រាយបញ្ហាបានដូចគ្នា ដើម្បីចៀសវាងកើតបញ្ហាដូចបានកើតឡើងកាលពីកន្លងទៅ»។
អ្នកនាំពាក្យដដែលបានបន្តថា៖ «នេះជាជំហររបស់គណបក្សភ្លើងទៀន តែមិនមែនដើម្បីតែគណបក្សភ្លើងទៀនតែមួយនោះទេ គឺដើម្បីគណបក្សទាំងអស់ដែលមានបំណងកសាងលទ្ធិប្រជាធិបតេយ្យនៅក្នុងសង្គម»។
បើតាម លោក គឹមសួរ ភិរិទ្ធ ការចង់ជួបក្រសួងមហាផ្ទៃ មិនមែនដើម្បីទៅដាក់សម្ពាធនោះទេ គឺដើម្បីជជែក ចរចា ក្នុងការអនុគ្រោះផ្លូវច្បាប់ ជូនដល់គណបក្សភ្លើងទៀន ដើម្បីមានលទ្ធភាពក្នុងការចូលរួមការបោះឆ្នោតនៅពេលខាងមុខទៀត។
លោកក៏បានបញ្ជាក់ដែរថា លិខិតច្បាប់ដើមដែលបានបាត់បង់ហើយនោះ ក៏បានបញ្ជាក់ដោយតុលាការដែរថាបានបាត់បង់ដែរ ប៉ុន្តែបើគេថាលិខិតច្បាប់ដើមនោះនៅកន្លែងនេះឬនៅជាមួយអ្នកណានោះលោកមិនដឹងនោះទេ ព្រោះកន្លងមកថ្នាក់ដឹកនាំគណបក្សដឹងតែថា បាត់ប៉ុណ្ណោះ។
លោក ខៀវ សុភ័គ អ្នកនាំពាក្យក្រសួងមហាផ្ទៃ មិនអាចទាក់ទងសុំការធ្វើអត្ថាធិប្បាយបានទេនៅថ្ងៃទី ៧ ខែសីហា ឆ្នាំ ២០២៣។
ចំណែក លោក ឈឹម កាន អគ្គនាយករងនៃអគ្គនាយករដ្ឋបាលក្រសួងមហាផ្ទៃនៅថ្ងៃទី ៧ ខែសីហានេះ បានថ្លែងប្រាប់យ៉ាងខ្លីថា លោកមិនទាន់ទទួលបានលិខិត ឬព័ត៌មានក្នុងការចង់ជួបក្រសួងមហាផ្ទៃរបស់គណបក្សភ្លើងទៀននោះទេ លុះត្រាតែលោកមានលិខិតទាំងអស់នេះ ទើបលោកអាចធ្វើអត្ថាធិប្បាយបាន។
លោកបន្តថា៖ «មួយវិញទៀត ចំពោះការសម្រេចជួបឬមិនជួបជាមួយគណបក្សភ្លើងទៀននោះ ក៏ខ្ញុំមិនហ៊ានធ្វើអត្ថាធិប្បាយដែរ អាស្រ័យលើថ្នាក់ដឹកនាំប៉ុណ្ណោះ»៕
