ផ្លូវជាតិលេខ ៧៦A ដែលបានបាក់ស្រុត នាពេលកន្លងមក។ រូបថត រដ្ឋបាលខេត្ត
មណ្ឌលគិរីៈ រដ្ឋបាលខេត្តមណ្ឌលគិរី បានសម្រេចឱ្យអ្នកដំណើរធ្វើដំណើរតាមផ្លូវវាងពីផ្លូវជាតិលេខ ៧៦A ត្រង់ចំណុចអូរងើយដែលបាក់ស្រុត ចាប់ពីថ្ងៃទី ៧ ខែសីហា តទៅបន្ទាប់ពីក្រុមការងារ នៃមន្ទីរសាធារណការ និងដឹកជញ្ជូនខេត្ត បានធ្វើការឈូសឆាយផ្លូវវាងថ្មីនេះបញ្ចប់រួចរាល់ជាស្ថាពរ។
យោងតាមមន្ទីរព័ត៌មានខេត្តមណ្ឌលគិរី លោក រស់ គីមធន ប្រធានមន្ទីរសាធារណការ និងដឹកជញ្ជូនខេត្ត បានលើកឡើងថា ផ្លូវជាតិលេខ ៧៦A ដែលតភ្ជាប់ពីស្រុកស្នួល ខេត្តក្រចេះ ឆ្ពោះមកខេត្តមណ្ឌលគិរី ត្រង់ចំណុចបាក់ស្រុត អូរងើយ ក្នុងភូមិសាស្ត្រស្រុកអូររាំង កាលពីប៉ុន្មានថ្ងៃមុន រហូតមកដល់វេលាម៉ោង ៦ ល្ងាចថ្ងៃទី ៦ ខែសីហា ក្រុមការងារបានឈូសឆាយផ្លូវវាងរួចរាល់ជាបណ្តោះអាសន្ន ដែលអាចឱ្យរថយន្តបើកឆ្លងកាត់បានហើយ។
លោកបានបញ្ជាក់ថា៖ «ផ្លូវវាងដែលបានស្ថាបនារួចរាល់ជាស្ថាពរនេះ មានប្រវែងប្រមាណ ១ ០០០ ម៉ែត្រ ហើយយើងនឹងរៀបចំចាក់ថ្មម៉ិចកិនបង្ហាប់ដែលអាចអនុញ្ញាតឱ្យប្រជាពលរដ្ឋ និងភ្ញៀវទេសចរជាតិ និងអន្តរជាតិ ដែលមានបំណងធ្វើដំណើរកម្សាន្តមកកាន់ខេត្តមណ្ឌលគិរីអាចធ្វើដំណើរឆ្លងកាត់បណ្តោះអាសន្នបាន»។
លោក នាង វណ្ណៈ នាយករងទីចាត់ការខេត្តមណ្ឌលគិរី បានប្រាប់ឱ្យដឹងនៅថ្ងៃទី ៧ ខែសីហាថា ទីតាំងផ្លូវដែលបានស្រុតបាក់នេះ ត្រូវបានក្រុមការងារក្រសួងសាធារណការ និងដឹកជញ្ជូន បានចុះពិនិត្យ និងធ្វើការវាយតម្លៃផលប៉ះពាល់ ប៉ុន្តែកម្រិតណានោះ លោកមិនមានរបាយការណ៍ទេ។
លោកបន្តថា បើតាមអភិបាលខេត្តមណ្ឌលគិរីលោក ថង សាវុន ដែលបានចុះទៅពិនិត្យជាមួយនឹងក្រុមការងារក្រសួងសាធារណការ អាចនឹងមានការសម្រេចជ្រើសរើសយកទីតាំងថ្មីនៃជម្រាលភ្នំដើម្បីសាងសង់ផ្លូវថ្មី ដោយទុកទីតាំងដែលបាក់ស្រុតនោះចោល ព្រោះទីតាំងនោះមានជម្រាលដីស្រុតតែមិនទាន់ដឹងថា យ៉ាងម៉េចនៅឡើយទេ។
រីឯថាតើនឹងមានការចាប់ផ្តើមជួសជុល និងស្ថាបនាផ្លូវថ្មីនាពេលណានោះ ក៏លោក នាង វណ្ណៈ មិនទាន់ដឹងពីព័ត៌មាននេះច្បាស់ដែរ ព្រោះផ្លូវនេះ គ្រប់គ្រងដោយក្រសួងសាធារណការ។
ចំពោះការបើកឱ្យធ្វើចរាចរណ៍បណ្តោះអាសន្ន លើផ្លូវដែលឈូសឆាយថ្មីនោះ លោក នាង វណ្ណៈ បានប្រាប់ថា៖ «ការអនុញ្ញាតឱ្យធ្វើចរាចរណ៍នេះ គឺឱ្យតែរថយន្តទេសចរណ៍ និងរថយន្តធ្វើដំណើរ តូចៗប៉ុណ្ណោះ រីឯរថយន្តធុនធំ ឬរថយន្តដឹកទំនិញធំៗមិនទាន់អនុញ្ញាតនៅឡើយទេ ដោយរង់ចាំមួយរយៈពេលសិន បើសិនជាស្ថានភាពផ្លូវដែលឈូសឆាយថ្មីនោះ មានលក្ខណៈល្អប្រសើរ រដ្ឋបាលខេត្តនឹងអនុញ្ញាត ឱ្យធ្វើចរាចរណ៍ឡើងវិញ»។
សូមរំឭកដែរថា រដ្ឋបាលខេត្តមណ្ឌលគិរីកាលពីថ្ងៃទី ១ ខែសីហា បានប្រកាស ផ្អាកជាបណ្ដោះអាសន្ននូវការធ្វើចរាចរណ៍យានយន្តគ្រប់ប្រភេទនៅលើកំណាត់ផ្លូវជាតិលេខ ៧៦A ចន្លោះ គីឡូម៉ែត្រលេខ ៩១ ដល់គីឡូម៉ែត្រលេខ ៩៩ ក្នុងភូមិសាស្ត្រខេត្តមណ្ឌលគិរី បន្ទាប់ពីមានជំនន់ទឹកភ្លៀង ដោយទឹកបានហូរ បណ្តាលឱ្យមានការបាក់ស្រុតផ្លូវ និងដាច់ផ្លូវនៅចន្លោះ ពីស្រុកអូររាំង ទៅស្រុកកែវសីមា ចំណុចអូរងើយនេះ៕
