សៀមរាបៈ សាលាដំបូងខេត្តសៀមរាបសម្រេចឃុំខ្លួនជនសង្ស័យជាមេខ្លោងប្រព្រឹត្តបទល្មើសឆបោកចំនួនចំនួន ២ នាក់ ដាក់ពន្ធធនាគារខេត្តជាបណ្តោះអាសន្ន ក្រោយពួកគេបានដើរបោកប្រាស់ឱ្យប្រជាពលរដ្ឋឱ្យដាក់លុយទិញវត្ថុបុរាណ អថ័នសំរឹទ្ធ នៅភូមិឃុំផ្សេងៗ ក្នុងស្រុកស្វាយលើ ខេត្តសៀមរាបបានរយៈពេល ២០ ថ្ងៃ ហើយត្រូវសមត្ថកិច្ចស្រាវជ្រាវដឹងនិងចាប់ឃាត់ខ្លួនបាននៅថ្ងៃទី ៧ ខែសីហា ឆ្នាំ ២០២៣។
លោក យ៉ីន ស្រាង អ្នកនាំពាក្យសាលាដំបូងខេត្តសៀមរាប បានឱ្យដឹងថ្ងៃទី ១០ ខែសីហាថា ជនសង្ស័យទាំង ២ ទី១ មានឈ្មោះ ទេព សុវណ្ណ ភេទប្រុស អាយុ ៥២ ឆ្នាំ មានលំនៅបច្ចុប្បន្ននៅភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ និងទី២ ឈ្មោះ ចុត វេក ភេទប្រុសអាយុ ៥៥ ឆ្នាំ មានលំនៅបច្ចុប្បន្ននៅភូមិជប់លើ ឃុំស្វាយលើ ស្រុកស្វាយលើ ខេត្តសៀមរាប។ ពួកគេត្រូវបានតុលាការខេត្តសៀមរាបចោទប្រកាន់ពីបទ ឆបោក តាមមាត្រា ៣៧៧ នៃក្រមព្រហ្មទណ្ឌ។
លោកបញ្ជាក់ថា៖ «លោក យូ ធារិទ្ធ ចៅក្រមស៊ើបសួរនៃសាលាដំបូងខេត្តសៀមរាប បានសម្រេចឃុំខ្លួនអ្នកទាំង២នោះហើយ ពីបទឆបោក»។
លោក នួន ស័ក្ដិចំរើនរិទ្ធ ស្នងការរងទទួលផែនការងារនគរបាលព្រហ្មទណ្ឌនៃស្នងការដ្ឋាននគរបាលខេត្តសៀមរាបបានឱ្យដឹងថា នៅថ្ងៃទី១៨ ខែកក្កដា ឆ្នាំ២០២៣ ឈ្មោះ ទេព សុវណ្ណ ភេទប្រុស និងឈ្មោះ ចុត វេក ភេទប្រុស បានចុះមកផ្សព្វផ្សាយនៅក្នុងទឹកដីស្រុកស្វាយលើ ខេត្តសៀមរាប ដល់ប្រជាពលរដ្ឋរស់នៅក្នុងទឹកដីស្រុកស្វាយលើថា មានក្រុមហ៊ុនវត្ថុបុរាណថ្មសំរឹទ្ធ ត្រូវការប្រាក់រៀបអាសនៈដើម្បីយកអថ័នសំរឹទ្ធមកលក់ដោយតម្រូវឱ្យប្រជាពលរដ្ឋដាក់ប្រាក់ចំនួន ៥០ ០០០រៀល និងបានប្រាក់ចំណេញមកវិញចំនួន ៥០ ០០០ដុល្លារអាមេរិក ។
លោកបន្តថា រហូតដល់ថ្ងៃទី១ ខែសីហា ឆ្នាំ២០២៣ ឈ្មោះ ទេព សុវណ្ណ និងឈ្មោះចុត វេក ចាប់ផ្តើមប្រមូលប្រាក់ពីប្រជាពលរដ្ឋ ដោយបានបែងចែកជាក្រុមដើម្បីប្រមូលនៅក្នុងឃុំស្វាយលើមានចំនួន៦នាក់ និងឃុំតាសៀមមានចំនួន៣នាក់ ហើយមានប្រជាពលរដ្ឋដែលបានចាញ់បោកសរុបចំនួន១៥៩នាក់ស្មើនឹង៩ភូមិ ក្នុងឃុំទាំង២ ខាងលើ ។
លោកបញ្ជាក់ថា៖«វិធីឆបោកដែលគាត់ធ្វើគឺគាត់ទៅខ្សឹបចំពោះតែបងប្អូនមិត្តភក្តិណាដែលជិតស្និទ្ធទេឱ្យយកថវិកាមក។ចង់និយាយថា អ្នកណាចូល៥ម៉ឺនខ្មែរនឹងបាន៥ម៉ឺនដុល្លារ អ្នកណាចូល១០ម៉ឺនខ្មែរ នឹងបាន១០ម៉ឺនដុល្លារ ២០ម៉ឺន នឹងបាន២០ម៉ឺនដុល្លារ អ៊ីចឹងជាការរៀបចំរបស់គាត់»។
លោកស្នងការរងបានឱ្យដឹងទៀតថា តាមការបំភ្លឺរបស់ប្រជាពលរដ្ឋនៅភូមិបិទផ្កា និងភូមិរលំទូក ក្នុងឃុំស្វាយលើ ស្រុកស្វាយលើ ខេត្តសៀមរាប និងតាមចម្លើយសារភាពរបស់ជនសង្ស័យទាំង២នាក់ថា ពួកគេពិតជាបានផ្សព្វផ្សាយនិងប្រមូលប្រាក់ពីប្រជាពលរដ្ឋបែបនោះមែន។ជនសង្ស័យទាំង២នាក់ត្រូវបានកម្លាំងនគរបាលព្រហ្មទណ្ឌនៃស្នងការដ្ឋាននគរបាលខេត្តសៀមរាប កសាងសំណុំរឿងបញ្ជូនទៅតុលាការកាលពីថ្ងៃទី៨ ខែសីហា ដើម្បីចាត់ការតាមផ្លូវច្បាប់ ។
ជាមួយនេះដែរ លោក តេង ច័ន្ទណាត ស្នងការនគរបាលខេត្តសៀមរាប បានអំពាវនាវដល់បងប្អូនប្រជាពលរដ្ឋដែលរស់នៅក្នុងខេត្តសៀមរាបក៏ដូចជាប្រជាពលរដ្ឋទាំងអស់នៅកម្ពុជាសូមកុំចាញ់បោកលើរូបភាពឆបោក ពីសំណាក់ជនខិលខូច និងប្រុងប្រយ័ត្នខ្ពស់ ដើម្បីចៀសវាងធ្លាក់ចូលក្នុងឧបាយកលរបស់ជនបោកប្រាស់ដូចក្នុងករណីនេះ៕
