អ្នកជំនាញកំពុងបន្តជួសជុលតួប៉មខាងជើង នៃប្រាសាទត្រពាំងល្ពៅ។ រូបថត អាជ្ញាធរជាតិអប្សរា
សៀមរាបៈ មន្ត្រីជំនាញនាយកដ្ឋានអភិរក្សប្រាសាទ និងបុរាណវិទ្យា កំពុងបន្តធ្វើការជួសជុលតួប៉មខាងជើង នៃប្រាសាទត្រពាំងល្ពៅ ដែលមកដល់ដើមខែសីហានេះ សម្រេចបាន ៧០ ភាគរយហើយ បន្ទាប់ពីបានធ្វើការជួសជុល តួប៉មផ្នែកខាងត្បូង កាលពីខែវិច្ឆិកា ឆ្នាំ ២០២២ និងបានបញ្ចប់ការជួសជុលក្នុងខែមីនា ឆ្នាំ ២០២៣ កន្លងមក។ នេះបើយោងតាមអាជ្ញាធរជាតិអប្សរា។
លោកស្រី ឈុន រតនា មន្ត្រីនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា បានឱ្យដឹងថា ប្រាសាទត្រពាំងល្ពៅ មានតួប៉មចំនួន ៣ ដែលនៅឈរមានរូបរាង។
លោកស្រីបន្តថា៖ «ដូច្នេះក្រុមអ្នកជំនាញបានចំណាយពេលវេលាប្រមាណ ៥ ខែ ដើម្បីជួសជុលតួប៉មផ្នែកខាងត្បួងរួចរាល់»។
បន្ទាប់មកក្នុងខែមេសា ឆ្នាំ ២០២៣ ក៏បន្តការងារជួសជុលតួប៉មផ្នែកខាងជើងវិញម្តង ដើម្បីពង្រឹងរចនាសម្ព័ន្ធប្រាសាទឱ្យរឹងមាំឡើងវិញ បន្ទាប់ពីពិនិត្យឃើញថា រចនាសម្ព័ន្ធនៃប្រាសាទបានបែកបាក់ ហែកចេញពីគ្នា ស្ទើរតែមិនសល់រូបរាងដើម ដោយសារកត្តាជាច្រើន។
ក្នុងដំណើរការជួសជុលប្រាសាទឥដ្ឋមួយនេះ អ្នកជំនាញបានចាប់ផ្តើមធ្វើការសិក្សា សម្រង់ប្លង់នៃប្រាសាទ និងធ្វើការពង្រឹងខឿនជញ្ជាំងឱ្យមានលំនឹង ដើម្បីទប់ស្កាត់ការរលុះធ្លាក់ធ្វើឱ្យបាត់បង់រូបរាងដើមរបស់ប្រាសាទ។
បន្ទាប់មក ធ្វើការសម្អាត បិទបាយអភ្ជាប់តាមស្រទាប់រហែក ដើម្បីការពារការជ្រាបទឹកធ្វើយ៉ាងណាឱ្យតួប៉មនៃប្រាសាទនេះ មានភាពរឹងមាំឡើងវិញ។
លោកស្រី ឈុន រតនា បានឱ្យដឹងថា មកដល់ដើមខែសីហា ឆ្នាំ ២០២៣ នេះ ដំណើរការជួសជុលប្រាសាទត្រពាំងល្ពៅ សម្រេចបានលទ្ធផលប្រមាណ ៧០ ភាគរយហើយ ដោយគ្រោងនឹងបញ្ចប់គម្រោងជួសជុល នាចុងឆ្នាំ ២០២៣ ខាងមុខនេះ៕
