ខេត្តរតនគិរីៈ ក្មេងប្រុសអាយុ ១១ ឆ្នាំម្នាក់ បានរងរបួសធ្ងន់ធ្ងរដាច់ជើងម្ខាងនៅក្នុងករណីផ្ទុះមីនមួយស្ថិតក្នុងភូមិសោមត្រក ឃុំសោមធំ ស្រុកអូរយ៉ាដាវនាថ្ងៃទី ១០ ខែសីហា ឆ្នាំ ២០២៣។
យោងតាមអាជ្ញាធរមីនបានឱ្យដឹងនៅថ្ងៃទី១១ ខែសីហាថា ឧប្បត្តិហេតុនេះបានកើតឡើងនៅពេលដែលជនរងគ្រោះឈ្មោះ សេវ លីចទៅឃ្វាលគោនៅក្នុងចម្ការចន្ទីមួយកន្លែង។ ជនរងគ្រោះត្រូវបានអាជ្ញាធរមូលដ្ឋាន និងក្រុមគ្រួសារបញ្ជូនមកព្យាបាលនៅមន្ទីរពេទ្យបង្អែកខេត្តរតនគិរី ហើយត្រូវបានបញ្ជូនបន្តទៅព្យាបាលនៅមន្ទីរពេទ្យខេត្តសៀមរាប។
អាជ្ញាធរមីនបានអំពាវនាវដល់បងប្អូនប្រជាពលរដ្ឋទាំងអស់ សូមកុំចូលទៅតំបន់ណាដែលមិនដឹងប្រវត្តិច្បាស់លាស់ និងត្រូវសាកសួរអាជ្ញាធរមូលដ្ឋានមុនចូលតំបន់នោះ។ លើសពីនេះសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកម្ទេចចោល៕
