សកម្មភាពសមត្ថកិច្ចចម្រុះធ្វើការបង្ក្រាបសម្ភារប្រព្រឹត្តបទល្មើសនេសាទខុសច្បាប់នៅថ្ងៃទី ១១ សីហា។ រូបថត នគរបាល
កំពង់ឆ្នាំងៈ កម្លាំងសមត្ថកិច្ចនៃអធិការដ្ឋាននគរបាលស្រុកកំពង់លែង និងស្រុកកំពង់ត្រឡាច សហការជាមួយកម្លាំងខណ្ឌរដ្ឋបាលជលផល នៅថ្ងៃទី ១១ សីហានេះ បានចុះបង្ក្រាបបទល្មើសនេសាទដោយបានរុះរើ និងកម្ទេចចោលរបាំងស្បៃមុងជាង៧០០ម៉ែត្រ និងបង្គោលជាង ២០០ ដើម។
យោងតាមអគ្គស្នងការដ្ឋាននគរបាលជាតិ កម្លាំងអធិការនគរបាលស្រុកកំពង់លែង សហការជាមួយកម្លាំងចម្រុះ ដោយប្រើមធ្យោបាយបាឡាស្មាច់ចំនួន២គ្រឿង ដឹកនាំដោយ លោក ឌុល ចាន់ឌី សង្កាត់រដ្ឋបាលជលផលកំពង់លែង បានសហការចុះល្បាតត្រួតពិនិត្យបង្ក្រាបបទល្មើសនេសាទ នៅចំណុច បឹងស្ទឹងរដ្ឋ, ព្រែកចង្កៀង, ប៉ោងឡោមានជ័យ, បឹងល្ពាក់, បឹងរាំងទិល ស្ថិតនៅក្នុងភូមិសាស្ត្រ ឃុំសំរោងសែន និងឃុំដារ ស្រុកកំពង់លែង។
ជាលទ្ធផល រុះរើរបាំងស្បៃមុង បានចំនួន ២កន្លែង ប្រវែង ៤០០ម៉ែត្រ លបលូចំនួន ៣លប។ សម្ភារទាំងនេះ ត្រូវបានកម្ទេចចោលនៅនឹងកន្លែង។
ចំណែកកម្លាំងអធិការដ្ឋាននគរបាលស្រុកកំពង់ត្រឡាច សហការជាមួយកម្លាំងចម្រុះ និងកម្លាំងរដ្ឋបាលជលផល ក៏បានចុះបង្ក្រាបបទល្មើសនេសាទ នៅចំណុចឃុំកំពង់ត្រឡាចផងដែរ។
ជាលទ្ធផល បានធ្វើការរុះរើរបាំងស្បៃមុងបានចំនួន១៦កន្លែង ប្រវែង៣២០ម៉ែត្រ, លបលូចំនួន១៦លប, បង្គោលចំនួន២១០ដើម, ចាក់លែងត្រីចម្រុះ ចំនួន៤០គីឡូ។ សម្ភារដែលរឹបអូសបានទាំងនេះ ត្រូវបានកម្ទេចចោលនៅនឹងកន្លែង៕
