កីឡាករ ព្រំ សំណាង អុកជង្គង់លើកីឡាកររុស្ស៊ី Firdauszhon Nayimov ពេលប្រកួតនៅថ្ងៃទី១៣ សីហា ។ រូបថត សហការី
ភ្នំពេញៈការធ្វើដំណើរមកកាន់កម្ពុជា ជាលើកដំបូង ដើម្បីប្រកួតសងសឹកជាមួយជើងខ្លាំង ព្រំ សំណាង របស់អ្នកប្រដាល់រុស្ស៊ី Firdauszhon Nayimov មិនទទួលបានលទ្ធផលដូចការរំពឹងទុកទេ ព្រោះរូបគេនៅតែគេចមិនផុតពីការសន្លប់ ក្រោមជង្គង់របស់ ព្រំ សំណាង ដដែល ចំណែកកីឡាករអ៊ីរ៉ង់ និងថៃ ចំនួន៣នាក់ទៀត ព្រមទាំងកីឡាករ ចក់ សាវិន ក៏បានចាញ់ដោយសន្លប់ ក្នុងព្រឹត្តិការណ៍ប្រកួត Kun Khmer Grand Champion នៅលើសង្វៀនថោន កាលពីថ្ងៃទី១៣ ខែសីហា ផងដែរ។
គេនៅចាំបានថា Firdauszhon Nayimov ធ្លាប់បានជួប ព្រំ សំណាង នៅThai Fight កាលពីថ្ងៃទី២៦ ខែកុម្ភៈ ឆ្នាំ២០២៣ ម្តងហើយ ដោយកាលនោះ ព្រំ សំណាង បានផ្តួលកីឡាកររុស្ស៊ីម្នាក់នេះឱ្យសន្លប់នៅត្រឹមទី១ ដើម្បីក្លាយជាកីឡាករកម្ពុជាដំបូងគេ ដែលបានឈ្នះការប្រកួត នៅ Thai Fight ចំនួន២លើកជាប់ៗគ្នា ព្រោះកាលពីថ្ងៃទី៥ ខែកុម្ភៈ ព្រំ សំណាង ក៏បានផ្តួលម្ចាស់ខ្សែក្រវាត់៣ស្ថាប័នរបស់អង់គ្លេស Thomas Carpenter ឱ្យសន្លប់ត្រឹមទឹកទី១ដើម្បីឈ្នះបានខ្សែក្រវាត់ នៅ Thai Fight ផងដែរ។
យ៉ាងណាមិញ សម្រាប់ការធ្វើដំណើរមកប្រកួតសងសឹក ព្រំ សំណាង នៅលើសង្វៀនថោនកាលពីថ្ងៃទី១៣ ខែសីហា Firdauszhon Nayimov បានបង្ហាញការប្រុងប្រយ័ត្នខ្លាំងក្នុងការវាយសងទៅលើ ព្រំ សំណាង ដែលធ្វើឱ្យការប្រកួតទឹកទី១ បានបញ្ចប់ ដោយគ្មានហេតុការណ៍អាក្រក់ណាមួយកើតមានឡើង ដូចពេលអ្នកទាំង២ ជួបគ្នាកាលពីថ្ងៃទី២៦ ខែកុម្ភៈ នោះទេ។
ទោះបីជាយ៉ាងណា ឈានចូលទឹកទី២ ព្រំ សំណាង បានព្យាយាមទាត់ម្តងហើយម្តងទៀតទៅលើ Firdauszhon Nayimov។ ថ្វីបើកីឡាកររុស្ស៊ីម្នាក់នេះ មានជំនាញក្នុងការចាប់ជើង ព្រំ សំណាង ដែលបានទាត់ទៅលើរូបគេក្ដី ប៉ុន្តែទម្ងន់ជើងទាត់ចូលធ្ងន់ៗរបស់ សំណាង នេះ បានធ្វើឱ្យ Firdauszhon មានការធ្លាក់កម្លាំង ហើយឃើញស្ថានភាពបែបនេះ ព្រំ សំណាង បានចូលចាប់បុកជង្គង់ផ្ទួនៗចំនួន១០ជង្គង់ ធ្វើឱ្យកីឡាកររុស្ស៊ីម្នាក់នេះ កាន់តែធ្លាក់កម្លាំង។
ជាមួយគ្នានោះ ព្រំ សំណាង បានម៉ាត់បន្ថែម រួចបានចូលចាប់បុកជង្គង់ជាថ្មីចំនួន១១ជង្គង់ទៀត ព្រមទាំងម៉ាត់ថែម៣ដៃ និងស្ទុះចូលបុកជង្គង់ឆ្វេងចូលពោះពេញបណ្តាលឱ្យកីឡាករ Firdauszhon អស់ខ្យល់តែម្តង។ ពេលនោះលោកអាជ្ញាកណ្តាលបានរាប់ទៅលើ Firdauszhon ភ្លាមៗ ប៉ុន្តែកីឡាករវ័យ២១ឆ្នាំរបស់រុស្ស៊ីរូបនេះ មិនបានងក់ក្បាលយល់ព្រមប្រកួតបន្តទៀតទេ គឺមានន័យថា រូបគេបានបន្តចាញ់ ព្រំ សំណាង ដោយសន្លប់ជាថ្មីម្តងទៀត។
សម្រាប់ការប្រកួតលើកនេះផងដែរ កីឡាករ Firdauszhon មិនបានបន្សល់របួសស្នាមណាមួយទុកឱ្យ ព្រំ សំណាង ដូចការប្រកួតនៅប្រទេសថៃទេ ដែល ព្រំ សំណាង បានសារភាពមុនការប្រកួតលើកនេះថា ការទាត់១ជើងចំផ្ទៃមុខរបស់ Firdauszhon បានធ្វើឱ្យរូបគេចត់បាយជិត១សប្តាហ៍។
ដោយឡែកម្ចាស់មេដាយមាសស៊ីហ្គេម ឆ្នាំ២០២៣ ឈឿង ល្វៃ ដែលបានបាត់មុខពីសង្វៀនអស់ពេលជាង១ខែ បន្ទាប់ពីរូបគេបានចាញ់កីឡាករថៃ សាមី បេនឆាមេក ក្នុងទឹកទី១ នៅលើសង្វៀនទទក កាលពីថ្ងៃទី២៦ ខែមិថុនានោះ គឺបានទាញយកការចាប់អារម្មណ៍ពីអ្នកគាំទ្រជាថ្មី ដោយរូបគេបានប្រើពេលត្រឹម១ទឹក ក្នុងការផ្តួលកីឡាករថៃ Sothanfa ឱ្យសន្លប់ធំ តាមរយៈការវាយកែងស្តាំ។
ជាមួយគ្នានេះជើងខ្លាំង និងជាម្ចាស់មេដាយមាសស៊ីហ្គេម ផ្នែកកីឡាវ៉ូវីណាម ម៉ឺន មេឃា ក៏បានបង្ហាញការប្រកួតយ៉ាងល្អផងដែរ ដោយរូបគេបានទាត់កីឡាករអ៊ីរ៉ុង Yousefi ឱ្យមានរបួសជើងក្រោមនៅចុងទឹកទី២ ហើយនៅទឹកទី៣ ដៃគូម្នាក់នេះ បានសុំចាញ់ ដោយមិនបានឡើងប្រកួតទៀតទេ។ ចំណែក មឿន សុខហ៊ុច បានវាយកែងស្តាំ បណ្តាលឱ្យកីឡាករថៃ Wansonkran បែកលើថ្ងាសយ៉ាងធំនៅទឹកទី២ ហើយគ្រូពេទ្យប្រចាំសង្វៀន បានសម្រេចបញ្ឈប់ការប្រកួតរបស់កីឡាករថៃនេះតែម្តង ដោយសារមុខរបួសនេះ មានឈាមហូរច្រើនពេក។
ផ្ទុយពីនេះ កីឡាករ ចក់ សាវិន បានក្លាយជាបេក្ខភាពតំណាងឱ្យកម្ពុជាតែម្នាក់គត់ដែលបានសន្លប់នៅក្នុងការប្រកួត Kun Khmer Grand Champion នេះ ដោយរូបគេត្រូវបានកីឡាករប្រេស៊ីល Alexsandro ដែលកំពុងហ្វឹកហាត់ប្រដាល់នៅកម្ពុជាបុកកែងឆ្វេង បណ្តាលឱ្យបែកបបូរមាត់ខាងស្តាំយ៉ាងធំ ប៉ុន្តែនៅមុនជួបហេតុការណ៍ដ៏អាក្រក់នេះ សាវិន ក៏បានវាយកែងបណ្តាលឱ្យ Alexsandro ពកនៅលើក្បាលចំហៀងខាងឆ្វេង១កន្លែងផងដែរ ខណៈការប្រកួតរបស់អ្នកទាំង២មានការវាយប្តូរគ្នាខ្លាំងនិងទទួលបានការចាប់អារម្មណ៍ច្រើនពីអ្នកទស្សនាផ្ទាល់៕
