លោកស៊ូ ចំរើន (ឆ្វេង) ជាមួយប្រធានសមាគមអ្នកនិពន្ធខ្មែរ ( KWA) លោក ព្រឿង ប្រណីត និងអ្នកស្រី ប៉ិច សង្វារវ៉ាន (ស្តាំ) ទទួលពានរង្វាន់កវីនិពន្ធអាស៊ីអាគ្នេយ៍ បានរៀបចំឡើងនៅទីក្រុងបាងកក កាលពីថ្ងៃទី១០ សីហា ឆ្នាំ២០២៣ ក្រោមអធិបតី សម្ដេចព្រះនាងចៅហ្វា សិរីវណ្ណ វរនារីរតនរាជកញ្ញា ព្រះរាជតំណាងព្រះមហាក្សត្រនៃព្រះរាជាណាចក្រថៃ។ រូបថត សហការី
ភ្នំពេញ: ក្នុងពិធីដ៏ធំមួយប្រារឰធ្វើនៅកណ្តាលទីក្រុងបាងកក អ្នកសរសេរអក្សរសាស្ត្រខ្មែរ ៣ រូប គឺលោក វ៉ែន សុន លោកស៊ូ ចំរើន និងអ្នកស្រី ប៉ិច សង្វារវ៉ាន បានទទួលពានរង្វាន់កវីនិពន្ធអាស៊ីអាគ្នេយ៍ ក្នុងការបង្ហាញស្នាដៃតែងនិពន្ធអក្សរសិល្ប៍ខ្មែរចាប់ពីឆ្នាំ២០១៩ ដល់ឆ្នាំ២០២១។
ពិធីលើកទី៤១ នេះ ត្រូវបានរៀបចំឡើងនៅទីក្រុងបាងកក កាលពីថ្ងៃទី១០ សីហា ក្រោមអធិបតី សម្ដេចព្រះនាងចៅហ្វា សិរីវណ្ណ វរនារីរតនរាជកញ្ញា ព្រះរាជតំណាងព្រះមហាក្សត្រនៃព្រះរាជាណាចក្រថៃ នៅវាំងតុសិត។
ការប្រគល់ពានរង្វាន់ជំនួបផ្ទាល់លើកដំបូងចាប់តាំងពីឆ្នាំ២០១៩ ជាព្រឹត្ដិការណ៍ដ៏មានកិត្យានុភាពបំផុតដែលផ្តល់ដល់អ្នកនិពន្ធមកពីបណ្តាប្រទេសអាស៊ាន។
ពានរង្វាន់ S.E.A. Write បង្កើតឡើងក្នុងឆ្នាំ ១៩៧៩ ដោយគំនិតផ្តួចផ្តើមរបស់លោក Kurt Wachtveitl ជាសហគ្រិនជនជាតិអាល្លឺម៉ង់ និងអ្នកគ្រប់គ្រងសណ្ឋាគារ Mandarin Oriental ដែលចង់គាំទ្រអ្នកនិពន្ធជំនាន់ថ្មីមកពីបណ្តាប្រទេសអាស៊ានដែលមានស្នាដៃឆ្នើម ព្រោះសណ្ឋាគារ Oriental មានប្រវត្តិយូរអង្វែងក្នុងការទាក់ទងជាមួយអ្នកនិពន្ធល្បីៗលើពិភពលោក។
ប្រធានសមាគមអ្នកនិពន្ធខ្មែរ ( KWA) លោក ព្រឿង ប្រណីត បានកោតសរសើរចំពោះការទទួលស្គាល់នេះដោយបញ្ជាក់ថាការជ្រើសរើសអ្នកនិពន្ធតាមរដូវកាលទាំងនេះ បញ្ជាក់ពីគុណភាពពិសេសនៃស្នាដៃរៀងៗខ្លួន។
លោក ប្រណីត បានប្រាប់ភ្នំពេញប៉ុស្តិ៍ថា៖«ជាមួយការផ្ដល់បានរង្វាន់ពានស្នាដៃកំណាព្យរឿងខ្លី និងប្រលោមលោក ដល់កវីនិពន្ធវ័យចំណាស់ទាំងនោះ គឺជាស្នាដៃល្អជាងគេ ដែលស័ក្ដិសមទទួលបានពានរង្វាន់ល្អប្រចាំតំបន់។
ជារៀងរាល់ឆ្នាំ ប្រទេសជាម្ចាស់ផ្ទះដែលថៃ ជាអ្នករៀបចំជាអចិន្ដ្រៃយ៍ ត្រូវបានជ្រើសរើស សម្រាប់ពិធីប្រគល់ពានរង្វាន់នេះ ដោយមានវត្តមានរបស់រាជវង្សថៃ ដែលបញ្ជាក់ពីសារៈសំខាន់នៃព្រឹត្តិការណ៍នេះ។
អ្នកនិពន្ធ និងកវីនិពន្ធខ្មែរដែលធ្លាប់បានទទួលពានរង្វាន់កវីនិពន្ធអាស៊ីអាគ្នេយ៍S.E.A Write Award នេះដែលគិតចាប់តាំងពីឆ្នាំ១៩៩៩ មកត្រឹមឆ្នាំ២០១៨។
យោងតាមសមាគមអ្នកនិពន្ធខ្មែរ ឆ្នាំ១៩៩៩ កវីនិពន្ធ ពេជ្រ ទុំក្រវិល (ស្លាប់) ក្នុងឆ្នាំ២០០០ កវីនិពន្ធ គង្គ ប៊ុនឈឿន (ស្លាប់) នៅឆ្នាំ២០០១ កវីនិពន្ធ ម៉ៅ អាយុទ្ធ (ស្លាប់) ឆ្នាំ២០០២ អ្នកនិពន្ធ សេង សំអាន និងក្នុងឆ្នាំ២០០៣ អ្នកនិពន្ធ គឹម ពេជ្រពីនន់។
ប្រភពបានបន្ដថា កវីនិពន្ធ ជ័យ ចាប អ្នកនិពន្ធ មៀច ប៉ុណ្ណ អ្នកនិពន្ធ ប៉ាល់ វណ្ណារីរក្ស អ្នកនិពន្ធ អ៊ុំ សុផានី (ស្លាប់) បានទទួលជយលាភីចាប់ពីឆ្នាំ២០០៤ ដល់ឆ្នាំ២០០៨។
ចាប់ពីឆ្នាំ២០១៣ ដល់ឆ្នាំ២០១៨ មានដូចជា កវីនិពន្ធ ស៊ិន ទូច កវីនិពន្ធ សុខ ចាន់ផល អ្នកនិពន្ធ វ៉ា សំអាត អ្នកនិពន្ធ ខូ តារារិទ្ធ កវីនិពន្ធ ព្រឿង ប្រណីត និងអ្នកនិពន្ធ ឡឹក ជំនោរ។
លោក វ៉ែន សុន ស្នាដៃកំណាព្យ «អនិច្ចាជីវិត» លោក ស៊ូ ចំរើន ស្នាដៃរឿង «ឈើលាព្រៃត្រីលាបឹង» និងអ្នកស្រី ប៉ិច សង្វារវ៉ាន ស្នាដៃប្រលោមលោករឿង «ជើងមេឃថ្មី» បានទទួលពានរង្វាន់កវីនិពន្ធអាស៊ីអាគ្នេយ៍ ត្រូវបានចាត់ទុកជាកវីរៀមច្បង ដែលមានទេពកោសល្យ និងស្នាដៃល្អ។
លោកបានឱ្យដឹងថា ប្រទេសសាមីជាអ្នកជ្រើសរើស ដែលមានគុណសម្បត្ដិគ្រប់គ្រាន់ ហើយខាងភាគីថៃ ចាំតែឯកភាពក្នុងការផ្ដល់ពានរង្វាន់។
ប្រទេសថៃ ដែលបានរៀបចំកម្មវិធីពានរង្វាន់កវីនិពន្ធអាស៊ីអាគ្នេយ៍ (S.E.A Write Award) ផ្ដាច់មុខ មិនមានគណៈកម្មការវាយតម្លៃស្នាដៃទេ ដោយគ្រាន់តែរៀបចំប្រគល់ពានរង្វាន់ និងចំណាយលើការស្នាក់នៅ ឬអាហារផ្សេងៗ។
ចំពោះស្នាដៃដែលជាប់ជយលាភីនឹងត្រូវបកប្រែ ឬសង្ខេបពីភាសាខ្មែរ ទៅជាភាសាថៃ និងអង់គ្លេស ដើម្បីឱ្យអ្នករៀបចំនិងអ្នកចូលរួមដទៃទៀតបានអាន និងស្វែងយល់។
លោកបានបន្ដថា៖ «ការសម្រេចរបស់សមាគមគឺផ្ដល់ឱកាសជូនចាស់ទុំជាមុន និងជាឱកាសចុងក្រោយសម្រាប់ពួកគាត់។ កវីចាស់ទុំខ្លះមិនមានកម្លាំងធ្វើដំណើរទៅទទួលពានផង។ កវីនិពន្ធនៅប្រទេសគេខ្លះ ក៏ត្រូវបានសែង ឬគ្រាហ៍ទៅទទួលពានរង្វាន់ពីព្រះរាជបុត្រ តំណាងព្រះមហាក្សត្រថៃ»។
លោក Conor Nestor បានសម្លឹងមើលការបញ្ជូនបាល់របស់ សំអឿន ពិដោរ ពេលប្រកួតកន្លងមក។ CNCC
លោក ស៊ូ ចំរើន បានឱ្យដឹងថា រឿងខ្លី «ឈើលាព្រៃត្រីលាបឹង» របស់លោក ត្រូវបានបោះពុម្ពជាភាសាថៃនិងអង់គ្លេសដោយក្រសួងវប្បធម៌ថៃ តាំងពី ១៣ ឆ្នាំមុន ហើយសមាគមអ្នកពិន្ធខ្មែរបានជ្រើសរើសយកស្នាដៃនេះក្នុងការដណ្ដើមយកជយលាភីឆ្នាំ២០២០។
លោកបានសង្ខេបសាច់រឿងថា ព្រៃឈើ និងមច្ឆាត្រូវបានបំផ្លិចបំផ្លាញក្រោយពេលដួលរំលំនៃរបបប៉ុលពត។ លោកបានលើកឡើងថា អំឡុងពេលទសវត្សរ៍ឆ្នាំ១៩៨០ នៅតាមទន្លេបឹងបួ សូម្បីទៅដោយត្រី ដែលក្រោយៗ សម្បត្ដិធម្មជាតិទាំងនេះត្រូវឆក់។
លោក ចំរើន បានប្រាប់ភ្នំពេញប៉ុស្ដិ៍ថា៖«យើងរួចពីអាពតមិនទាន់បានប៉ុន្មានឆ្នាំផងយើងចាប់ផ្ដើមបំផ្លិចបំផ្លាញ។ យើងផ្ដោតសំខាន់លើការសោកស្ដាយព្រៃឈើត្រីដោយមិនដាក់បន្ទុកលាយឡំជាមួយរឿងនយោបាយអ្វីឡើយ»។
អតីតម្ចាស់ជយលាភីពានរង្វាន់ទន្លេមេគង្គលើកទី១ ប្រមាណ ១០ ឆ្នាំ បានឱ្យដឹងថា ការទទួលជយលាភីនេះ មិនមែនជាមោទនភាពចំពោះរូបលោកផ្ទាល់នោះទេ ដោយសារលោកមានអាយុចាស់ណាស់ទៅហើយ។ ប៉ុន្ដែលោកចង់ឱ្យស្នាដៃនេះបានជ្រួតជ្រាបដល់អ្នកអានអំពីគោលគំនិត។
អ្នកស្រី សង្វារវ៉ាន បានសិក្សានៅមហាវិទ្យាល័យច្បាប់ និងសេដ្ឋកិច្ចហើយបានចូលរៀនមហាវិទ្យាល័យអក្សរសាស្ត្រ និងមនុស្សសាស្ត្រ ក្នុងឆ្នាំ១៩៧០។
អ្នកស្រី ស្រឡាញ់អក្សរសាស្ត្រខ្មែរតាំងពីតូចមកម្ល៉េះ ហើយអ្នកស្រីតែងតែគិតនិងស្រមៃចង់ក្លាយជាអ្នកនិពន្ធស្រីនៃប្រទេសកម្ពុជា ក៏ដូចជា មានបំណងប្រាថ្នាចង់ក្លាយជាសមាជិកនៃ«សមាគមអ្នកនិពន្ធខ្មែរ»។
នៅឆ្នាំ១៩៦៨ អ្នកស្រី មិនអាចមានបំណងប្រាថ្នាចង់ក្លាយជាអ្នកនិពន្ធទៀតទេ ក៏បានចាប់ផ្តើមសរសេររឿងដំបូង«តើនេះឬចិត្ដប្រុស?»បំផុសគំនិតដោយការស្នើសុំពីស្ត្រី ៣ នាក់ ដែលមានវិបត្តិផ្ទាល់ខ្លួន។
លោក វ៉ែន សុន ជាអ្នកនិពន្ធខ្មែរដ៏ឆ្នើម តាំងពីឆ្នាំ១៩៧៩ ដោយផ្ដើមពីការនិពន្ធរឿងល្ខោននិយាយរឿង«ចំណងដៃទឹកភ្នែក»រឿង«ផ្កាដុះលើថ្ម»កំណាព្យបណ្តាំកវី ដែលទទួលជយលាភីលេខ១ ពីក្រសួងវប្បធម៌ និងវិចិត្រសិល្បៈក្នុងមហោស្រពប្រឡងតែងនិពន្ធទូទាំងប្រទេសឆ្នាំ១៩៩១។
លោកបាននិពន្ធរឿង«ឋានសួគ៌ក្នុងសុបិន»ជាប្រលោមកំណាព្យទទួលបានពានរង្វាន់ «៧មករា»ពីសមាគមអ្នកនិពន្ធខ្មែរឆ្នាំ១៩៩៧និងនិពន្ធរឿង«ភ្នំព្រះនាងកែវ»ជាកំណាព្យបែបប្រវតិ្តសាស្ត្រទទួលបានពានរង្វាន់អក្សរសិល្ប៍ទន្លេមេគង្គក្នុង ឆ្នាំ២០១០៕
និមិត្តសញ្ញារបស់ក្រុមហ៊ុន Twitter និង Facebook។ រូបថត AFP
