ស្ថានទូតកូរ៉េប្រារព្ធកម្មវិធីតម្រង់ទិសសម្រាប់និស្សិតអាហារូបករណ៍ចំនួន ២៨ នាក់។ សហការី
ភ្នំពេញៈ ស្ថានទូតកូរ៉េប្រចាំកម្ពុជា នាថ្ងៃទី១៧ ខែសីហានេះ បានរៀបចំកម្មវិធីតម្រង់ទិសសម្រាប់និស្សិតអាហារូបករណ៍ ដែលឧបត្ថម្ភដោយរដ្ឋាភិបាលកូរ៉េ ថ្នាក់ក្រោយឧត្តមសិក្សាឆ្នាំ២០២៣ នៅសាលពហុបំណង នៃស្ថានទូតក្នុងរាជធានីភ្នំពេញ។
ឆ្នាំនេះនិស្សិតកម្ពុជាចំនួន ២៨ នាក់ ដែលរួមមានថ្នាក់អនុបណ្ឌិត ២៧ នាក់ និងបណ្ឌិត ១ នាក់ផងនោះ ត្រូវបានជ្រើសរើសជានិស្សិតសម្រាប់កម្មវិធីអាហារូបករណ៍ឧបត្ថម្ភដោយរដ្ឋាភិបាល កូរ៉េថ្នាក់ក្រោយឧត្តមសិក្សាហើយពួកគេគ្រោងនឹងចេញដំណើរទៅសិក្សានៅកូរ៉េនៅចុងខែសីហានេះ។
កម្មវិធីតម្រង់ទិសនេះមានការចូលរួមពីនិស្សិតកម្ពុជា ដែលជាប់អាហារូបករណ៍ថ្នាក់អនុបណ្ឌិត និងបណ្ឌិត និងតំណាងអតីតនិស្សិតសិក្សានៅ កូរ៉េប្រចាំនៅកម្ពុជាដែលបានធ្វើមាតុភូមិនិវត្តន៍ហើយកំពុងបំពេញការងារក្នុងវិស័យផ្សេងៗបន្ទាប់ពីបានបញ្ចប់ការសិក្សានៅសាកលវិទ្យាល័យក្នុងសាធារណរដ្ឋកូរ៉េ។
លោក PARK Jung-Wook ឯកអគ្គរដ្ឋទូតកូរ៉េប្រចាំកម្ពុជា បានចូលរួមក្នុងកម្មវិធីនេះនិងបានអបអរសាទរចំពោះនិស្សិតដែលបានជាប់អាហារូបករណ៍នេះ។ ក្នុងឱកាសនោះលោកបានសម្ដែងក្តីរំពឹងថាពួកគេនឹងកសាងចំណេះជំនាញនិងបទពិសោធន៍នៅសាធារណរដ្ឋកូរ៉េ ហើយដោយផ្អែកលើចំណុចទាំងនេះពួកគេនឹងបំពេញការងារយ៉ាងសកម្មទៅថ្ងៃអនាគត។
ពលរដ្ឋក្រីក្រនៅកំពង់ធំពេលទទួលអំណោយកន្លងមក។ រូបថត ក្រសួងសង្គមកិច្ច
ដោយឡែកលោក Noeum Sokvichhai ជាអតីតនិស្សិតអាហារូបករណ៍ឧបត្ថម្ភដោយរដ្ឋាភិបាលកូរ៉េថ្នាក់អនុបណ្ឌិតឆ្នាំ២០១០-១៤ ក្នុងនាមលោកជាសិស្សច្បងបានលើកទឹកចិត្តដល់និស្សិតអាហារូបករណ៍ជាសិស្សប្អូនទាំងអស់។
ទិដ្ឋភាពមុខរោងចក្រថ្ងៃទី ១៥ ធ្នូដែលត្រូវបានតុលាការរឹបអូសចលនទ្រព្យលក់ឡាយឡុងនៅខេត្តកណ្តាល។ហ៊ាន រង្សី
លោកបានស្នើដល់ពួកគេថា៖«សូមចងចាំថាអ្នកតំណាងឱ្យព្រះរាជាណាចក្រកម្ពុជានៅសាធារណរដ្ឋកូរ៉េនិងតំណាងឱ្យព្រះរាជាណាចក្រកម្ពុជានិងសាធារណរដ្ឋកូរ៉េនៅពេលអ្នកត្រឡប់មកវិញ»។
លោក Mork Chansokol ដែលជាប់អាហារូបករណ៍នេះនូវថ្នាក់អនុបណ្ឌិត បាននិយាយដែរថា៖«ខ្ញុំមានគម្រោងចូលរៀនផ្នែកគ្រប់គ្រងពាណិជ្ជកម្មនៅសាកលវិទ្យាល័យ Soongsilក្នុងសាធារណរដ្ឋកូរ៉េហើយបន្ទាប់ពីទទួលបានសញ្ញាបត្រអនុបណ្ឌិតខ្ញុំសង្ឃឹមថានឹងចូលរួមចំណែកក្នុងការអភិវឌ្ឍទំនាក់ទំនងទ្វេភាគីរវាងសាធារណរដ្ឋកូរ៉េនិងព្រះរាជាណាចក្រកម្ពុជាតាមរយៈការជំរុញការវិនិយោគរបស់សាធារណរដ្ឋកូរ៉េនៅព្រះរាជាណាចក្រកម្ពុជានិងរួមចំណែកបង្កើតការងារថ្មីៗនៅព្រះរាជាណាចក្រកម្ពុជា»។
កម្មវិធីអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ មានគោលបំណងជំរុញការផ្លាស់ប្តូរការអប់រំជាអន្តរជាតិនិងលើកកម្ពស់មិត្តភាពរវាងប្រទេសនានាដោយការផ្តល់ឱកាសឱ្យនិស្សិតបរទេសបានសិក្សានៅគ្រឹះស្ថានឧត្តមសិក្សានៅក្នុងសាធារណរដ្ឋកូរ៉េ។
កម្មវិធីអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ មានថ្នាក់បរិញ្ញាបត្រ និងថ្នាក់ក្រោយឧត្តមសិក្សាហើយអត្ថប្រយោជន៍ផ្សេងៗជាច្រើនត្រូវបានផ្តល់ជូនដល់និស្សិតអាហារូបករណ៍ដែលជាប់ក្នុងកម្មវិធីនេះ។ ក្នុងនោះរួមមានសំបុត្រយន្តហោះទៅមក ថ្លៃបណ្តុះបណ្តាលភាសាកូរ៉េ ថ្លៃសិក្សា ថ្លៃធានារ៉ាប់រងផ្នែកវេជ្ជសាស្ត្រ និងប្រាក់ឧបត្ថម្ភសម្រាប់ការរស់នៅជាដើម។
រដ្ឋាភិបាលកូរ៉េក្នុងរយៈពេលកន្លងមកនេះបានជ្រើសរើសនិស្សិតអាហារូបករណ៍ប្រហែល ៣០០ នាក់ពីកម្ពុជា។ ស្ថានទូតកូរ៉េប្រចាំកម្ពុជានៅឆ្នាំ២០២២ និងឆ្នាំ២០២៣ បានរៀបចំកម្មវិធីជួបជុំអតីតនិស្សិតសិក្សានៅសាធារណរដ្ឋកូរ៉េដើម្បីគាំទ្រដល់ការកសាងបណ្តាញទំនាក់ទំនងរវាងអតីតនិស្សិតដែលបានត្រឡប់មកកម្ពុជាវិញហើយកំពុងបំពេញការងារក្នុងវិស័យផ្សេងៗដូចជារដ្ឋាភិបាលធុរកិច្ចនិងការអប់រំជាដើមបន្ទាប់ពីបានបញ្ចប់ការសិក្សានៅសាកលវិទ្យាល័យក្នុងសាធារណរដ្ឋកូរ៉េ៕
