លោក ស សុខា នៅក្នុងពិធីបិទការប្រកួតកីឡាសិស្សបឋមសិក្សាថ្នាក់ជាតិនៅថ្ងៃទី ២០ សីហា ។ រូបថត Sar Sokha FB
ភ្នំពេញៈ រដ្ឋលេខាធិការក្រសួងអប់់រំ យុវជន និងកីឡាលោក ស សុខា ដែលត្រូវប្តូរតួនាទីទៅកាន់មុខតំណែងជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃក្នុងអាណត្តិទី៧ នេះ បានបង្ហាញការជឿជាក់លើនាយករដ្ឋមន្ត្រីថ្មី លោក ហ៊ុន ម៉ាណែត ក្នុងការបន្តលើកកម្ពស់វិស័យអប់រំកាយ និងកីឡាឱ្យកាន់តែរីកចម្រើន ដើម្បីផ្តល់ឱកាសឱ្យកីឡាករជំនាន់ក្រោយមានលទ្ធភាពកាន់តែខ្ពស់ក្នុងការប្រកួតតំណាងឱ្យប្រទេសជាតិនាពេលអនាគត។
លោក ស សុខា បានថ្លែងបែបនេះថា៖ «ជាមួយរាជរដ្ឋាភិបាលថ្មីក្នុងនីតិកាលទី៧ ក្រោមការដឹកនាំរបស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ខ្ញុំជឿជាក់យ៉ាងមុតមាំថា លោកនឹងបន្តលើកកម្ពស់វិស័យអប់រំកាយ និងកីឡា ព្រមទាំងបន្តរៀបចំព្រឹត្តិការណ៍នានា ទាំងជាតិ និងអន្តរជាតិ ដើម្បីផ្តល់ក្តីសង្ឃឹមជូនទៅដល់ប្អូនៗ ក្មួយៗទាំងអស់ឱ្យមានឱកាសក្លាយជាកីឡាករ កីឡាការិនីតំណាងជាតិ នាពេលអនាគត និងមានឱកាសប្រកួតតំណាងឱ្យជាតិនាពេលឆាប់ៗនេះ»។
ការលើកឡើងរបស់លោក ស សុខា បែបនេះត្រូវបានធ្វើឡើងនៅក្នុងពិធីបិទការប្រកួតកីឡាសិស្សបឋមសិក្សាថ្នាក់ជាតិឆ្នាំ ២០២៣ នៅក្នុងវិមានពហុកីឡដ្ឋានជាតិកាលពីថ្ងៃទី ២០ ខែសីហា។ ជាមួយគ្នានេះ លោកបានចាត់ទុកការងារអប់រំកាយ និងកីឡា ជាសមាសភាពមួយនៃវិស័យអប់រំ ដែលជាមធ្យោបាយហាត់ពត់រាងកាយ និងបញ្ញាស្មារតីរបស់សិស្ស និស្សិត ឱ្យមានការលូតលាស់ល្អ រក្សាកម្លាំងពលំមាំមួន និងមានសុខភាពល្អ ជាពិសេសបានកសាងធនធានមនុស្សឱ្យក្លាយជាពលរដ្ឋល្អ ដើម្បីរួមចំណែកកសាង និងអភិវឌ្ឍប្រទេសជាតិ។
លោកបានបញ្ជាក់ថា៖ «សកម្មភាពអប់រំកាយ និងកីឡា ដែលបានលើកកម្ពស់ដោយរាជរដ្ឋាភិបាល ក៏ដូចជាលើទូទាំងសកលលោក បានផ្តល់នូវបំណិនជីវិត ជាពិសេសបានផ្តល់ឱ្យមនុស្សជាតិ មានសុខភាពល្អ ក្នុងការកសាងប្រទេសជាតិ។ ជាមួយគ្នានេះ នៅកម្ពុជា មានយុវជន ដែលមានអាយុក្មេងទៅៗ បានចូលរួម និងបំពេញយ៉ាងសកម្មក្នុងការលេងកីឡា ស្របទៅតាមការណែនាំរបស់ក្រសួង និងស្ថាប័នពាក់ព័ន្ធ ដោយក្នុងនោះធ្វើឱ្យប្រជាពលរដ្ឋទូទាំងប្រទេសកម្ពុជា ងាកមកលេងកីឡា និងបង្វែរទិសចេញពីអំពើអបាយមុខផ្សេងៗ ដែលជាបញ្ហាប្រឈមនៅក្នុងសង្គមរបស់យើង»។
តាមរបាយការណ៍របស់លោក ហួត សេងទ្រី ប្រធានគណៈកម្មការរៀបចំការប្រកួតបានឱ្យដឹងថា ការប្រកួតកីឡាសិស្សបឋមសិក្សាថ្នាក់ជាតិ ឆ្នាំ ២០២៣ នេះ មានការប្រកួតប្រជែងគ្នានៅលើប្រភេទកីឡាចំនួន ១០ រួមមាន កីឡាបាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ តេក្វាន់ដូ (WT) តេក្វាន់ដូ (ITF) ប៊ូល និងប៉េតង់ និងគុនល្បុក្កតោ ហើយមានប្រតិភូ គ្រូបង្វឹក កីឡាករ កីឡាការិនីសរុប ២ ៦០០ នាក់ បានចូលរួម ដោយអ្នកទាំងនេះលេងតំណាងឱ្យរាជធានី-ខេត្តទាំង ២៥ នៅទូទាំងប្រទេសកម្ពុជា។
តាមរយៈការប្រកួតប្រជែង ដែលចាប់ផ្តើមតាំងពីថ្ងៃទី ១២ ខែសីហា មកនោះ ក្រុមកីឡាសិស្សបឋមសិក្សាតំណាងឱ្យខេត្តកំពង់ឆ្នាំង បានឈរនៅលេខ ១ ដោយឈ្នះបានមេដាយមាស ៧ ប្រាក់ ៥ សំរឹទ្ធ ៥ ហើយតាមពីក្រោយដោយរាជធានីភ្នំពេញដែលឈ្នះបានមាស ៦ ប្រាក់ ៥ និងសំរឹទ្ធ ៧ ខណៈខេត្តស្ទឹងត្រែង បានឈរនៅលេខ ៣ ដោយបានមេដាយមាស ៦ ប្រាក់ ២ សំរឹទ្ធ ១ រីឯខេត្តសៀមរាប ឈ្នះបានមាស ៤ ប្រាក់ ៦ សំរឹទ្ធ ២ និងខេត្តកំពត ដណ្តើមបានមាស ៤ ប្រាក់ ៣ សំរឹទ្ធ ២។
ចំណែកក្រុមកីឡាសិស្សបឋមសិក្សាមកពីខេត្តកំពង់ស្ពឺ កណ្តាល បាត់ដំបង រតនគិរី បន្ទាយមានជ័យ ត្បូងឃ្មុំ ក្រចេះ ព្រៃវែង ពោធិ៍សាត់ កំពង់ធំ ឧត្តរមានជ័យ មណ្ឌលគិរី និងខេត្តប៉ៃលិន បានឈរនៅលេខរៀងបន្តបន្ទាប់គ្នា ទៅតាមចំនួនមេដាយមាស ប្រាក់ និងសំរឹទ្ធ ដែលពួកគេដណ្តើមបាន។ រីឯក្រុមខេត្តស្វាយរៀង និងតាកែវ បានឈ្នះត្រឹមមេដាយប្រាក់ ហើយខេត្តកំពង់ចាម ឈ្នះបានមេដាយសំរឹទ្ធ ២ ប៉ុន្តែក្រុមកីឡារបស់ខេត្តកែប កោះកុង ព្រះសីហនុ និងខេត្តព្រះវិហារ មិនដណ្តើមបានមេដាយទេ។
យ៉ាងណាក៏ដោយ លោក ស សុខា បានសម្តែងការរីករាយ និងកោតសរសើរទៅដល់កីឡាករ កីឡាការិនីជាថ្នាលទាំងអស់នេះដែលបានប្រឹងប្រែងប្រកួតប្រជែងគ្នាអស់ពីលទ្ធភាព និងគោរពបទបញ្ជាប្រកួតបានល្អ ដែលធ្វើឱ្យការប្រកួតកីឡាសិស្សបឋមសិក្សាថ្នាក់ជាតិ ឆ្នាំ ២០២៣ បានបញ្ចប់ដោយជោគជ័យ។
លោកបញ្ជាក់ថា៖ «អ្វីដែលពិសេស គឺយើងបានឃើញថា កីឡាករ កីឡាការិនីថ្នាលរបស់យើងនៅពេលនេះ បានឆ្លងកាត់ការប្រកួត ដែលមានលក្ខណៈស្តង់ដា និបច្ចេកទេសគ្រប់គ្រាន់ គួរជាទីមោទនៈ។ ក្នុងនោះដែរ ការវាស់ស្ទង់ជាសមិទ្ធផលជាក់លាក់ នៃការប្រកួតទាំងអស់នេះ ក៏បានឆ្លុះបញ្ជាំងពីបច្ចេកទេសនៃការរៀបចំ និងបច្ចេកទេសនៃការប្រកួត ហើយជាមួយគ្នានេះប្អូនៗ បានឆ្លងកាត់ការប្រកួត ដែលគោរពតាមបទបញ្ជាគ្រប់លក្ខណៈស្តង់ដា និងគ្រប់ការប្រកួតជាតិ និងអន្តរជាតិ»។
លោក ស សុខា ដែលកូនប្រុសលោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស ខេង បានបន្ថែមថា៖ «ខ្ញុំសង្ឃឹមថា តាមរយៈការប្រកួតនេះនឹងធ្វើឱ្យក្មួយៗស្គាល់គ្នាកាន់តែច្បាស់ រាប់អានគ្នា បង្កើតមិត្តភាព សាមគ្គីភាព ដែលជាស្ពានមួយ មិនអាចកាត់ថ្លៃបាន។ បើទោះបីជាការប្រកួត តែងតែមានអ្នកឈ្នះ និងអ្នកចាញ់ ប៉ុន្តែចំពោះអ្នកមិនបានមេដាយ ខ្ញុំសូមលើកទឹកចិត្តឱ្យបន្តខិតខំប្រឹងប្រែងបន្ថែមទៀត ដើម្បីពង្រឹងទាំងសមត្ថភាព និងគុណភាពក្នុងការប្រកួតទាំងថ្នាក់ជាតិ និងអន្តរជាតិ នាពេលខាងមុខ»៕
