លោក ហ៊ុន សែន អតីតនាយករដ្ឋមន្ត្រី ក្នុងសន្និសីទសារព័ត៌មាន។ ហេង ជីវ័ន
ភ្នំពេញៈ លោក ហ៊ុន សែន អតីតនាយករដ្ឋមន្ត្រីកម្ពុជាដែលបានកាន់តួនាទីអស់រយៈពេលជាង ៣៨ ឆ្នាំ បញ្ជាក់ថា ការខកចិត្តធំចុងក្រោយសម្រាប់លោក ក្នុងការកាន់តួនាទីជានាយករដ្ឋមន្ត្រីនៅកម្ពុជា គឺវិបត្តិជំងឺឆ្លងជាសកលកូវីដ ១៩ ដែលបានមកបង្អាក់ផែនការពន្លឿនសេដ្ឋកិច្ចជាតិ និងការកាត់បន្ថយភាពក្រីក្ររបស់កម្ពុជា។
លោកថា វិបត្តិនេះបានឆក់យកអាយុជីវិតប្រជាជនកម្ពុជា ជាច្រើនរូប និងធ្វើឱ្យកម្ពុជាត្រូវចាយថវិកាសន្សំជិត ៤ ពាន់លានដុល្លារ ដើម្បីទប់ទល់និងដោះស្រាយពីវិបត្តិដែលកើតឡើងពីជំងឺមួយនេះ។
ការលើកឡើងរបស់អតីតនាយករដ្ឋមន្ត្រីកម្ពុជា បានធ្វើឡើងក្នុងសន្និសីទសារព័ត៌មាននៅវិមានរដ្ឋសភា ក្រោយរដ្ឋសភាបានបញ្ចប់ការបោះឆ្នោត អនុម័តរៀបចំក្បាលម៉ាស៊ីនរដ្ឋសភា និងរាជរដ្ឋាភិបាលនៅថ្ងៃទី២២ ខែសីហា ឆ្នាំ២០២៣។
នៅក្នុងការដឹកនាំប្រទេសរបស់លោក ហ៊ុន សែន រយៈពេលជាង ៣៨ ឆ្នាំ មកនេះ លោកលើកឡើងថា ក្នុងតួនាទីជាអ្នកដឹកនាំ តោងមានការពេញចិត្ត និងការខកចិត្ត ដោយចៀសពុំរួច ដោយឡែកសម្រាប់រដ្ឋបាលរបស់លោក លោកបានពើបប្រទះនឹងការខកចិត្តធំចុងក្រោយដែលបានបង្អាក់ដំណើរនិងផែនការអភិវឌ្ឍន៍កម្ពុជានៅក្នុងប្រវត្តិសាស្ត្រសម័យទំនើបនោះគឺ វិបត្តិកូវីដ១៩។
លោកសង្កត់ធ្ងន់ថា ដោយសារវិបត្តិកូវីដ១៩ បានជះឥទ្ធិពលអាក្រក់ដល់ការរីកលូតលាស់របស់កម្ពុជាដែលកំពុងស្គាល់នូវកំណើនសេដ្ឋកិច្ចថេរក្នុងអត្រាជាង ៧% ក្នុង ១ឆ្នាំ ហើយបានបង្អាក់ដល់ផែនការកាត់បន្ថយភាពក្រីក្រដែលនៅក្រោម ១០% មកកើនឡើងវិញ និងជាពិសេសកម្ពុជាបានចំណាយថវិកាជាតិប្រមាណជិត ៤ពាន់លានដុល្លារដើម្បីទប់ទល់និងដោះស្រាយ។
លោក ហ៊ុន សែន បញ្ជាក់ថា៖ «យើងបានចាយប្រាក់សន្សំប្រមាណជិត ៤ពាន់លានដុល្លារ ដែលខ្ញុំប៉ុនប៉ងធ្វើហេដ្ឋារចនាសម្ព័ន្ធនៅកម្ពុជាដោយមិនពឹងផ្អែកទៅលើបរទេស ត្រូវបាត់បង់ ដោយយកវាមកទប់ទល់នឹងកូវីដ១៩ ជាមួយនឹងការចិញ្ចឹមជួយប្រជាជន ដែលធ្វើឱ្យផែនការនេះត្រូវបានខកខាន។ នេះជាការខកចិត្តមួយដ៏ធំរបស់ខ្ញុំ»។
កូវីដ១៩ បានឆក់យកអាយុជីវិតប្រជាជនកម្ពុជាជាង៣ ០០០ នាក់ នៅក្នុងពេលដែលកម្ពុជាកំពុងមានសន្តិភាព ដែលជាការសោកស្តាយដ៏ធំរបស់លោកក្នុងតួនាទីជាមេដឹកនាំដែលមិនអាចជួយសង្គ្រោះអាយុជីវិតពលរដ្ឋបាន។
លោកបន្ថែមថា៖ «អ្វីដែលជារឿងធំ គឺការខកចិត្តទៅលើបញ្ហា ប្រទេសកំពុងមានល្បឿនទៅមុខ ប៉ុន្តែផ្ទុយទៅវិញ យើងបានបាត់បង់ជាមួយនឹងប្រាក់ដែលយើងសន្សំសម្រាប់ហេដ្ឋារចនាសម្ព័ន្ធដើម្បីពន្លឿនសេដ្ឋកិច្ចនិងការកាត់បន្ថយភាពក្រីក្រនេះ»។
លោក ស៊ឺន សម អ្នកជំនាញផ្នែកវិទ្យាសាស្ត្រនយោបាយនៃរាជបណ្ឌិត្យសភាកម្ពុជា ថ្លែងថា ការលើកឡើងរបស់លោកហ៊ុន សែន នៅថ្ងៃចុងក្រោយនៃនាមជានាយករដ្ឋមន្ត្រីនាពេលនេះ អាចជាសារមួយសម្រាប់ដាស់តឿនដល់អ្នកដឹកនាំជំនាន់ក្រោយ ឱ្យចេះប្រុងប្រយ័ត្ននិងត្រៀមខ្លួនសម្រាប់វិបត្តិសង្គមជាយថាហេតុ ជាពិសេសលើការគ្រប់គ្រងថវិកាជាតិ ដោយវិបត្តិកូវីដ១៩ ជាការសាកល្បងមួយធំក្នុងដំណើរនៃប្រវត្តិសាស្ត្រពិភពលោក។
លោកថា នៅក្នុងវិបត្តិកូវីដ១៩ កន្លងទៅ លោកហ៊ុន សែន បានខិតខំប្រឹងប្រែងចាត់វិធានការដើម្បីទប់ស្កាត់វិបត្តិនេះយ៉ាងមានប្រសិទ្ធភាព ទោះបីកម្ពុជាជាប្រទេសតូចក្តី ទាំងការស្វះស្វែងរកវ៉ាក់សាំងមកផ្គត់ផ្គង់ពលរដ្ឋ និងការទប់ស្កាត់មិនអាចមានការឆ្លងទ្រង់ទ្រាយធំក្នុងសហគមន៍ ដែលបញ្ជាក់ពីការយកចិត្តទុកដាក់ និងសមត្ថភាពក្នុងនាមជាថ្នាក់ដឹកនាំរបស់លោក។
លោក ស៊ឺន សម ថ្លែងថា៖ «លោកហ៊ុន សែន មានចំណុចពិសេសច្រើន សម្រាប់ខ្ញុំផ្ទាល់ មើលឃើញពីចំណុចខ្លាំងរបស់លោកក្នុងការសម្រេចចិត្តនិងការបត់បែនជាមួយនយោបាយការបរទេស។ ប្រទេសយើងធ្លាប់មានវិបត្តិច្រើន សង្គ្រាមច្រើន កម្ពុជាបានដើរលើបន្ទាត់នយោបាយមួយដ៏ត្រឹមត្រូវដែលធ្វើឱ្យកម្ពុជាបានក្លាយជាមិត្តរបស់ប្រទេសក្នុងពិភពលោក និងបានទាញប្រយោជន៍ជាតិ»។
បន្ថែមពីនេះ លោកកត់សម្គាល់ពីសមត្ថភាពក្នុងការសម្រេចចិត្តលើនយោបាយផ្ទៃក្នុងរបស់លោកហ៊ុន សែន ដែលបានធ្វើឱ្យកម្ពុជាស្គាល់នូវស្ថិរភាពនយោបាយ សន្តិភាព ដើម្បីមានការអភិវឌ្ឍក្រោមការដឹកនាំរបស់លោក។
លោក ពៅ សុខ ទីប្រឹក្សាផ្ទាល់លោក ហ៊ុន សែន ថ្លែងថា លោក ហ៊ុន សែន ជាមេដឹកនាំដែលមានសមត្ថភាព ដោយបានបញ្ចប់សង្គ្រាមស៊ីវិលទាំងស្រុងសម្រាប់ជាតិ ធ្វើឱ្យមានឯកភាពជាតិ និងបូរណភាពទឹកដី ក្រោមដំបូលរដ្ឋធម្មនុញ្ញជាតិតែមួយ ព្រះមហាក្សត្រតែមួយ។
លោកថ្លែងថា៖ «គំរូវីរភាពរបស់សម្តេចដែលយុវជនជំនាន់ក្រោយ គួរយកគំរូឬយកតម្រាប់តាម គឺការលះបង់អ្វីៗគ្រប់យ៉ាង ដើម្បីជាតិ ប្រជាជនដោយមិនយកខ្មែរណាម្នាក់ធ្វើជាសត្រូវដោយធ្វើយ៉ាងណាឈរនៅលើគោលការណ៍បង្រួបបង្រួមផ្សះផ្សាជាតិ និងការអភិវឌ្ឍ»៕
