អភិបាលរងខេត្តសៀមរាបជំរុញឱ្យភាគីពាក់ព័ន្ធបង្កើនកិច្ចសហការគ្នា ដើម្បីបង្ក្រាបបទល្មើសជួញដូរមនុស្សឱ្យបានទាន់ពេលវេលា។
សៀមរាបៈ អភិបាលរងខេត្ត និងជាប្រធានលេខាធិការដ្ឋាននៃគណ:កម្មាធិការប្រយុទ្ធប្រឆាំងអំពើជួញដូរមនុស្សខេត្ត (គ.ខ.ប.ជ)លោកស្រី យូ សុភា បានជំរុញឱ្យគ្រប់អ្នកពាក់ព័ន្ធបន្តកិច្ចសហការគ្នាឱ្យកាន់តែស្អិតរមួតលើការអនុវត្តនីតិវិធីនានា ការបង្ក្រាបបទល្មើស ការជួយសង្គ្រោះជនរងគ្រោះឱ្យបានទាន់ពេលវេលាក្នុងបទល្មើសជួញដូរមនុស្ស។
ការជំរុញនេះត្រូវបានធ្វើឡើងក្នុងកិច្ចប្រជុំត្រួតពិនិត្យការងារប្រចាំខែសីហា នាថ្ងៃទី២៤ ខែសីហា ឆ្នាំ២០២៣ សាលាខេត្តសៀមរាប ដែលមានការចូលរួមពីថ្នាក់ដឹកនាំ មន្ទីរ អង្គភាពពាក់ព័ន្ឋ រដ្ឋបាលក្រុង ស្រុក មន្ត្រីនគរបាលយុត្តិធម៌ តំណាងព្រះរាជអាជ្ញាអមសាលាដំបូងខេត្ត ព្រមទាំងតំណាងអង្គការ ដៃគូពាក់ព័ន្ធសរុប ៦២ នាក់ផងដែរ។ នេះបើយោងតាមក្រសួងព័ត៌មាននាថ្ងៃទី២៥ ខែសីហា។
លោកស្រីក៏បានណែនាំឱ្យមានការពងឹ្រងសមត្ថភាព និងពង្រីកការផ្សព្វផ្សាយដល់សិស្សានុសិស្ស នៅតាមគ្រឹះស្ថានសិក្សារបស់រដ្ឋ ឱ្យបានទូលំទូលាយថែមទៀត ដើម្បីបង្រ្កាប និងផ្តន្ទាទោសដល់ជនល្មើសឱ្យខាងតែបាន។ ជាពិសេសសហការពង្រីកការផ្សព្វផ្សាយឱ្យបានទូលំទូលាយ ដើម្បីបញ្ជ្រាបការយល់ដឹងអំពីការឆបោក ការបៀតបៀន និងការរំលោភបំពានគ្រប់រូបភាពតាមប្រព័ន្ធអនឡាញ និងធ្វើការបណ្តុះបណ្តាលទៅដល់លោកគ្រូ អ្នកគ្រូក្រុមប្រឹក្សាកុមារ ឱ្យក្លាយជាជនបង្គោល ដើម្បីធ្វើការផ្សព្វផ្សាយបន្តទៅដល់សិក្សានុសិស្សឱ្យបានទូលំទូលាយ។
ផ្អែកតាមលទ្ធផលនៃរបាយការណ៍ប្រចាំខែសីហា ក្រុមការងារដែលមានគ្រប់ភាគីពាក់ព័ន្ធទាំងស្ថាប័នរដ្ឋ និងអង្គការដៃគូជាតិ អន្តរជាតិ បានធ្វើការផ្សព្វផ្សាយច្បាប់ ស្តីពីការបង្ក្រាបប្រយុទ្ធប្រឆាំងអំពើជួញដូរមនុស្ស និងអំពើធ្វើអាជីវកម្មផ្លូវភេទ និងច្បាប់ពាក់ព័ន្ធ គោលនយោបាយភូមិ-ឃុំ មានសុវត្ថិភាព វេទិកាសាធារណៈ ច្បាប់ទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ការធ្វើចំណាកស្រុកប្រកបដោយសុវត្ថិភាព នៅតាមសហគមន៍ និងផ្សព្វផ្សាយតាមប៉ុស្តិ៍វិទ្យុ ទូរទស្សន៍ បានចំនួន៥៧៣លើក។ ក្នុងនោះមានអ្នកចូលរួមសរុប ២៦ ៦៥៣ នាក់ ស្រី ១៦ ៤២៨ នាក់។
លើសពីនោះ ក្រុមការងារក៏បានធ្វើការចែកខិត្តប័ណ្ណស្តីពី ការធ្វើចំណាកស្រុកប្រកបដោយសុវត្ថិភាព និងការទប់ស្កាត់អំពើហិង្សាក្នុងគ្រួសារ បានចំនួន ២ ៣០៦ ខិត្តប័ណ្ណ និងបានធ្វើការផ្សព្វផ្សាយអំពីស្ពតអប់រំអំពីគ្រឿងញៀន និងការទប់ស្កាត់អំពើហិង្សាក្នុងគ្រួសារបានចំនួន ៧ ៩៥០ លើកផងដែរ។
សមត្ថកិច្ចបានដាក់កម្លាំងជំនាញចុះល្បាតក្នុងការគ្រប់គ្រងគោលដៅតាមសួនសាធារណៈ តំបន់ផាប់ស្ទ្រីត តាមមាត់ស្ទឹងសៀមរាប ដើម្បីការពារ និងត្រួតពិនិត្យជាប្រចាំតាមគោលដៅដែលប្រឈម អាចកើតមានបទល្មើស ព្រមទាំងបានចុះធ្វើកិច្ចសន្យាតាមគោលដៅសង្ស័យមានប្រព្រឹត្តបទល្មើស នៅកន្លែងអាជីវកម្មម៉ាស្សា ភោជនីយដ្ឋាន និងខារ៉ាអូខេបានចំនួន ២៥ កន្លែង និងបានបង្រ្កាបបទល្មើសពាក់ព័ន្ធនឹងច្បាប់ស្តីពី ការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ បានចំនួន ២ ករណី។ ក្នុងនោះរួមមាន ករណីរូបភាពនិងសម្ភារអាសអាភាសនៃកុមារ និងរំលោភសេពសន្ថវៈ ១ ករណី និងករណីញុះញង់ឱ្យអនីតិជនសុំទាន ១ ករណីផងដែរ ដោយបានកសាងសំណុំរឿងបញ្ជូនទៅតុលាការ ដើម្បីចាត់ការទៅតាមនីតិវិធីច្បាប់។ ចំណែកជនរងគ្រោះបានប្រគល់ទៅមន្ទីរសង្គមកិច្ច ដើម្បីធ្វើការកំណត់ និងប៉ាន់ប្រមាណដើម្បីផ្តល់សេវា។ នេះបើយោងតាមរដ្ឋបាលខេត្តសៀមរាប៕
.jpg)
