លោករដ្ឋមន្ត្រីកសិកម្ម ឌិត ទីណា និងលោកស្រី Carmen Moreno ក្នុងជំនួប នៅថ្ងៃទី២៥ខែសីហា។ រូបថត ក្រសួងកសិកម្ម
ភ្នំពេញៈ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា ក្រសួងកសិកម្ម បាននិងកំពុងយកចិត្តទុកដាក់ក្តាប់ស្ថានភាពកសិកម្មទាំងទិដ្ឋភាពបច្ចេកទេសនិងនយោបាយ ដើម្បីកៀរគរឱ្យមានការចូលរួមពីវិស័យឯកជន និងដៃគូអភិវឌ្ឍន៍។
លើសពីនេះ ក្រសួងក៏កំពុងជំរុញកម្មវិធីផ្សព្វផ្សាយកសិកម្មឱ្យកាន់តែខិតជិតកសិករនិងក្រុមអ្នកផលិត មានភាពម្ចាស់ការ ធ្វើឱ្យប្រសើរឡើងនូវខ្សែច្រវាក់តម្លៃ ធានាបាននូវសន្តិសុខស្បៀង និងស្ថិរភាពតម្លៃនៅទូទាំងប្រទេសផងដែរ។ នេះយោងតាមក្រសួងកសិកម្ម។
លោកឌិត ទីណា បានថ្លែងបែបនេះ ខណៈដែលលោក និងថ្នាក់ដឹកនាំក្រសួងកសិកម្ម បានទទួលជួបជាមួយលោកស្រី Carmen Moreno ឯកអគ្គរដ្ឋទូតវិសាមញ្ញ និងពេញសមត្ថភាពនៃសហភាពអឺរ៉ុប(EU) ប្រចាំព្រះរាជាណាចក្រកម្ពុជា ដែលនឹងចប់អាណត្តិបេសកកម្មការទូត នៅទីស្តីការក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៥ខែសីហា។
លោកឌិត ទីណា បានលើកឡើងទៀតថា ក្រសួងកសិកម្ម ក៏កំពុងអនុវត្តយុទ្ធសាស្ត្រកាត់បន្ថយថ្លៃដើម កាត់បន្ថយការចំណាយផ្សេងៗ ដើម្បីជួយឱ្យកសិករទទួលបានផលចំណេញ មានប្រសិទ្ធភាព និងនិរន្តរភាពសេដ្ឋកិច្ច ក្នុងការចូលរួមជំរុញសេដ្ឋកិច្ចប្រទេសកម្ពុជា ឱ្យក្លាយជាប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០។
នៅក្នុងជំនួបនេះដែរ លោករដ្ឋមន្ត្រីកសិកម្ម ក៏បានថ្លែងអំណរគុណដល់សហភាពអឺរ៉ុបសម្រាប់កិច្ចសហប្រតិបត្តិការល្អក្នុងការចូលរួមគាំទ្រ និងអភិវឌ្ឍវិស័យកសិកម្មកម្ពុជាឱ្យមានភាពប្រសើរឡើង ព្រមទាំងស្នើបន្តកិច្ចសហការល្អជាមួយគ្នានៅអាណត្តិថ្មី ជាពិសេសការជំរុញអនុវិស័យជលផលទាំងទឹកសាប និងទឹកប្រៃ៕
