ភ្នំពេញៈ លោក ហង់ជួន ណារ៉ុន រដ្ឋមន្ត្រីអប់រំ បានស្នើឱ្យអង្គការរូមធូរីដ (Room to Read) បន្ដសហការជាមួយក្រសួងធ្វើយ៉ាងណាឱ្យគ្រប់សាលារៀនមានបណ្ណាល័យ និងបន្ដបណ្តុះបណ្តាលគ្រូបង្រៀនប្រកបដោយស្ដង់ដា។
ការស្នើនេះធ្វើឡើងក្នុងកិច្ចប្រជុំស្ដីពីការអនុវត្តលើការលើកកម្ពស់សម្ភារអំណាន និងអំណានក្នុងបណ្ណាល័យរបស់អង្គការ Room to Read ក្រោមអធិបតីភាពលោក ហង់ជួន ណារ៉ុន ដែលជាឧបនាយករដ្ឋមន្ត្រី កាលពីថ្ងៃទី២៥ ខែសីហា រាជធានីភ្នំពេញ។
ក្រសួងអប់រំបញ្ជាក់នាថ្ងៃទី២៦ ខែសីហា ថា នៅក្នុងកិច្ចប្រជុំនេះ មានការពិភាក្សាអំពីការពង្រឹងបំណិនអាន និងសរសេរក្នុងថ្នាក់ទី១ដល់ថ្នាក់ទី៣ ការអភិវឌ្ឍវិជ្ជាជីវៈគ្រូបង្វឹក គរុកោសល្យ នាយកសាលា គ្រូបង្រៀន និងបណ្ណារក្ស។
ក្រសួងបន្តថា កិច្ចប្រជុំនេះក៏ពិភាក្សាអំពីការណែនាំសហគមន៍មូលដ្ឋានឱ្យឃើញលទ្ធផលរៀនសូត្ររបស់កូនៗ និងអនុវត្តជាមួយសាលាកម្រងសម្រាប់ធ្វើជាគំរូសម្រាប់កសាងធនធានបច្ចេកទេសរបស់កម្រង និងស្រុក «ដែលជាគន្លឹះជោគជ័យ» ក្នុងការពង្រីកវិសាលភាពអនុវត្តន៍ទៅសាលាដទៃក្នុងកម្រង និងពេញស្រុកក្នុងឆ្នាំបន្តបន្ទាប់។
ក្រសួងអប់រំបន្ថែមថា៖ «ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានស្នើសុំឱ្យអង្គការរូមធូរីដបន្ដសហការជាមួយក្រសួងអប់រំ យុវជន និងកីឡា ធ្វើយ៉ាងណាឱ្យគ្រប់សាលារៀនមានបណ្ណាល័យ ជំរុញឱ្យមានការចូលរួមពីសំណាក់សិស្សានុសិស្ស គ្រូបង្រៀន ក៏ដូចជាមជ្ឈដ្ឋានជុំវិញ បន្ដបណ្តុះបណ្តាលគ្រូបង្រៀនប្រកបដោយស្ដង់ដា និងធ្វើការចុះវាយតម្លៃទៅតាមខេត្តគោលដៅនីមួយៗជាដើម»៕
