មន្ត្រីថាមពល ពីប្រទេសអាស៊ាន ក្នុងកិច្ចប្រជុំពីថ្ងៃទី ២៦ សីហា។ រូប ASEAN
ភ្នំពេញៈ អាស៊ានបញ្ជាក់ជាថ្មីនូវការប្តេជ្ញាចិត្ត និងការទទួលខុសត្រូវរួមរបស់ខ្លួន ក្នុងការធានាសន្តិសុខថាមពលឱ្យមាននិរន្តរភាពក្នុងតំបន់តាមរយៈអន្តរតភ្ជាប់ ព្រមទាំងទទួលស្គាល់បញ្ហាប្រឈមសន្តិសុខថាមពល និងភាពធន់ថាមពល ដែលតំបន់ជួបប្រទះនៅចំពេលមានឧបសគ្គផ្គត់ផ្គង់សកល ភាពតានតឹងខាងភូមិសាស្ត្រនយោបាយសកល និងភាពចាំបាច់ក្នុងការស្តារសេដ្ឋកិច្ចឡើងវិញ។
ការបញ្ជាក់ពីការប្តេជ្ញាចិត្តជាថ្មីនេះ ធ្វើឡើងក្នុងកិច្ចប្រជុំរដ្ឋមន្ត្រីថាមពលអាស៊ានលើកទី៤១ ស្តីពីសន្តិសុខថាមពល ប្រកបដោយនិរន្តរភាព តាមរយៈការតភ្ជាប់គ្នាទៅវិញទៅមក កាលពីថ្ងៃទី ២៤ ខែសីហា នៅប្រទេសឥណ្ឌូនេស៊ី។ យោងតាមសេចក្តីថ្លែងការណ៍រួមដែលបានចេញផ្សាយនៅថ្ងៃទី ២៦ ខែសីហា បានឱ្យដឹងថា កិច្ចប្រជុំនេះបានលើកឡើងពីមូលបទនៃប្រធានអាស៊ានឆ្នាំ ២០២៣ គឺឥណ្ឌូនេស៊ី «បញ្ហាអាស៊ាន៖ ចំណុចកណ្តាលនៃកំណើន» ដែលបញ្ជាក់ពីការប្តេជ្ញាចិត្តរបស់អាស៊ានក្នុងការធានាថាអាស៊ាននៅតែធន់ មានប្រសិទ្ធភាព និងឆ្លើយតបទៅនឹងបញ្ហាប្រឈមក្នុងតំបន់ និងពិភពលោកនាពេលអនាគត ព្រមទាំងខិតខំពង្រឹងសមត្ថភាពរបស់អាស៊ានដែលជាមជ្ឈមណ្ឌលនៃកំណើនសេដ្ឋកិច្ចក្នុងតំបន់ ដែលសន្តិសុខថាមពល គឺជាកិច្ចការសំខាន់បំផុត។
អង្គប្រជុំបានទទួលស្គាល់សេចក្តីថ្លែងការណ៍របស់ថ្នាក់ដឹកនាំអាស៊ាន ស្តីពីការរៀបចំចក្ខុវិស័យសហគមន៍អាស៊ានក្រោយឆ្នាំ ២០២៥ ដែលបានលើកទឹកចិត្តដល់ការឈានទៅមុខនៃចក្ខុវិស័យប្រកបដោយទស្សនវិស័យ ការបំផុសគំនិត ភាពរឹងមាំ គ្រប់ជ្រុងជ្រោយ មានបរិយាប័ន្ន និងការសម្លឹងឆ្ពោះទៅមុខដើម្បីដោះស្រាយបញ្ហាប្រឈម និងនិន្នាការបច្ចុប្បន្ន និងអនាគតក្នុង និងក្រៅតំបន់ក្នុងរយៈពេល ២០ ឆ្នាំ។
សេចក្តីថ្លែងការណ៍រួមបញ្ជាក់ថា៖ «កិច្ចប្រជុំបានទទួលស្គាល់តួនាទីដ៏សំខាន់ នៃអន្តរតភ្ជាប់ថាមពលរបស់អាស៊ាន ក្នុងការបន្តរបៀបវារៈរបស់អង្គការសហប្រជាជាតិ (UN) ២០២៣ សម្រាប់ការអភិវឌ្ឍប្រកបដោយចីរភាព ជាពិសេសដើម្បីសម្រេចបានទិសដៅអភិវឌ្ឍន៍ប្រកបដោយចីរភាពស្ថិតក្នុងចំណុចទី ៧ របស់ UN រួមមាន ការពង្រឹងកិច្ចសហប្រតិបត្តិការអន្តរជាតិ ដើម្បីពង្រីកហេដ្ឋារចនាសម្ព័ន្ធ និងលើកម្រិតបច្ចេកវិទ្យាសម្រាប់ការផ្គត់ផ្គង់សេវាថាមពលទំនើប និងនិរន្តរភាពសម្រាប់ទាំងអស់គ្នា»។
អង្គប្រជុំយល់ឃើញថា អន្តរតភ្ជាប់ថាមពល និងសមាហរណកម្មទីផ្សារក្នុងអាស៊ាន គឺជាកត្តាជំរុញដ៏សំខាន់សម្រាប់កិច្ចសហប្រតិបត្តិការថាមពលអាស៊ាន ដើម្បីដោះស្រាយបញ្ហាប្រឈមសន្តិសុខថាមពល និងពន្លឿនការអភិវឌ្ឍថាមពលប្រកបដោយយុត្តិធម៌ និងបរិយាប័ន្នក្នុងតំបន់ ជាពិសេសធានាភាពធន់ និងស្ថិរភាពនៃតភ្ជាប់បណ្តាញថាមពល និងខ្សែចង្វាក់ផ្គត់ផ្គង់ថាមពល។
អង្គប្រជុំបានកត់សម្គាល់ពីវឌ្ឍនភាព និងភាពជឿនលឿនក្នុងការតភ្ជាប់បណ្តាញថាមពលអាស៊ាន ជាពិសេសលើ «គម្រោងសមាហរណកម្មថាមពលឡាវ-ថៃ-ម៉ាឡេស៊ី-សិង្ហបុរី» ដែលជាសមិទ្ធផលដ៏ធំធេងក្នុងការជំរុញការភ្ជាប់បណ្តាញថាមពលអាស៊ាន ក៏ដូចជាការតភ្ជាប់ទ្វេភាគីផ្សេងៗ ដែលធ្វើឱ្យការផ្ទេរការភ្ជាប់បណ្តាញថាមពលឆ្លងដែនមួយចំនួនអាចធ្វើទៅបានសម្រាប់រដ្ឋសមាជិកអាស៊ានចំនួន ៥ ប្រទេស។ កិច្ចប្រជុំក៏បានសង្កត់ធ្ងន់លើសារៈសំខាន់នៃការបន្តតួនាទីឧស្ម័នធម្មជាតិក្នុងការអភិវឌ្ឍថាមពលប្រកបដោយតុល្យភាព និងយុត្តិធម៌ រួមមានភាពចាំបាច់ក្នុងការលើកកម្ពស់ការតភ្ជាប់ លទ្ធភាពប្រើប្រាស់ឧស្ម័ន និងការផ្គត់ផ្គង់ឧស្ម័នធម្មជាតិរាវសម្រាប់តំបន់ ដើម្បីទាញយកធនធានថាមពលកកើតឡើងវិញរបស់ខ្លួន និងអនុវត្តវិធានការដើម្បីធានាភាពធន់នៃការផ្គត់ផ្គង់ឧស្ម័ន។
កិច្ចប្រជុំបានគូសបញ្ជាក់អំពីសារៈសំខាន់នៃអនុស្សរណៈនៃការយោគយល់គ្នា (MoU) សម្រាប់ការភ្ជាប់បណ្តាញថាមពលអាស៊ាន MoU ស្តីពីបំពង់បង្ហូរឧស្ម័នអន្តរអាស៊ាន និងកិច្ចព្រមព្រៀងសន្តិសុខប្រេងឥន្ធនៈអាស៊ាន និងការបន្តយន្តការដែលមានស្រាប់នៃកិច្ចសហប្រតិបត្តិការក្នុងការតភ្ជាប់ និងការឆ្លើយតបបន្ទាន់ក្នុងតំបន់។
សេចក្តីថ្លែងការណ៍រួមបញ្ជាក់ថា៖ «កិច្ចប្រជុំបានទទួលស្គាល់ថា ការធ្វើជំនួញថាមពលពហុភាគី និងខ្សែចង្វាក់ផ្គត់ផ្គង់ដែលមានភាពធន់ និងសមាហរណកម្មកាន់តែច្រើននៅក្នុងតំបន់នឹងបង្កើនការប្រើប្រាស់ប្រភពថាមពលកកើតឡើងវិញ និងបង្កើនប្រសិទ្ធភាព និងការអភិរក្សយ៉ាងសំខាន់»។
កិច្ចប្រជុំនេះបានប្រកាសពីការពន្លឿនការអភិវឌ្ឍថាមពលស្របតាមកាលៈទេសៈ និងសមត្ថភាពថ្នាក់ជាតិ និងថ្នាក់តំបន់នីមួយៗក្នុងការឆ្ពោះទៅរកការអភិវឌ្ឍថាមពលដោយយុត្តិធម៌ និងមានបរិយាប័ន្នព្រមទាំងធានាសន្តិសុខថាមពល ទំនុកចិត្តមានលទ្ធភាពប្រើប្រាស់ និរន្តរភាព ភាពធន់ និងតម្លៃសមរម្យ។
គោលនយោបាយជាតិស្តីពីប្រសិទ្ធភាពថាមពលឆ្នាំ ២០២២-២០៣០ របស់កម្ពុជាបានកំណត់ចក្ខុវិស័យក្នុងការកែប្រែការប្រើប្រាស់ថាមពលនៅកម្ពុជាឱ្យកាន់តែមានប្រសិទ្ធភាពខ្ពស់ដើម្បីជួយលើកកម្ពស់សេដ្ឋកិច្ចជាតិឱ្យកាន់តែរឹងមាំ រស់រវើក មានការប្រកួតប្រជែង និងការអភិវឌ្ឍប្រកបដោយចីរភាព៕
