ប្រជាពលរដ្ឋចុះនេសាទនៅសមុទ្រខេត្តព្រះសីហនុ នាពេលកន្លងទៅ។ រូបថត ហុង មិនា
ព្រះសីហនុៈ រដ្ឋបាលខេត្តព្រះសីហនុបាននិងកំពុងពន្លឿនការចុះបញ្ជីនាវា និងទូកនេសាទ នៅភូមិសាស្ត្រខេត្តដើម្បីងាយស្រួលគ្រប់គ្រង បញ្ចៀសឧបទ្ទវហេតុណាមួយដែលអាចកើតឡើងនៅក្នុងលម្ហសមុទ្រ ជាពិសេសដើម្បីចេញពីកាតក្រហមរបស់សហភាពអឺរ៉ុប។
ការពន្លឿនការងារនេះ ត្រូវបានធ្វើឡើងនៅក្នុងកិច្ចប្រជុំរបស់រដ្ឋបាលខេត្តព្រះសីហនុ និងភាគីពាក់ព័ន្ធកាលពីថ្ងៃទី ២៩ ខែសីហា ឆ្នាំ ២០២៣។
យោងតាមការប្រកាសរបស់រដ្ឋបាលខេត្តព្រះសីហនុ លោក គួច ចំរើន បានលើកឡើងក្នុងកិច្ចប្រជុំនោះថា គោលបំណងនៃកិច្ចប្រជុំនោះគឺដើម្បីជំរុញការលើកទឹកចិត្ត និងការផ្សព្វផ្សាយដល់ប្រជានេសាទឱ្យចូលមកស្នើសុំចុះបញ្ជីទូកនេសាទរបស់ខ្លួន ខណៈរដ្ឋបាលខេត្តនឹងបញ្ចុះតម្លៃ ៥០ ភាគរយសម្រាប់ឆ្នាំ ២០២៣ នេះ។
លោកបន្តថា៖ «សូមក្រុង ស្រុក មេឃុំ ចៅសង្កាត់ យកស្មារតីនៃអង្គប្រជុំទៅផ្សព្វផ្សាយឱ្យបានទូលំទូលាយដល់ប្រជានេសាទរបស់ខ្លួន ពិសេសជួយសម្របសម្រួលជូនពួកគាត់តាមនីតិវិធី ហើយក៏សុំឱ្យប្រជានេសាទមកកាន់ច្រកចេញចូលតែ ១ របស់រដ្ឋបាលខេត្តដែលនៅរង់ចាំបម្រើសេវា ដោយត្រូវធ្វើយ៉ាងណាធ្វើភ្លាមៗឱ្យបានកាន់តែលឿន និងមានតម្លាភាពដើម្បីឱ្យកម្ពុជាចេញផុតពីកាតក្រហមរបស់សហភាពអឺរ៉ុប»។
ជាមួយគ្នានេះ លោក គួច ចំរើន ក៏បានស្នើឱ្យមន្ត្រីពាក់ព័ន្ធត្រូវខិតខំអប់រំផ្សព្វផ្សាយដល់ប្រជានេសាទឱ្យមកចុះបញ្ជីទូកនេសាទឱ្យបានទាន់ពេលវេលា។
ជាមួយគ្នានេះ លោក ពុំ សេដ្ឋា ប្រតិភូអមរាជរដ្ឋាភិបាល ជាប្រធានរដ្ឋបាលជលផល បានលើកឡើងដែរថា ការចុះបញ្ជីសម្រាប់នាវា និងទូកនេសាទនេះ គឺផ្តោតសំខាន់សម្រាប់ការគ្រប់គ្រងឱ្យមានតម្លាភាព ប្រសិទ្ធភាព និងការងារជួយសង្គ្រោះដោយឧបទ្ទវហេតុណាមួយនៅក្នុងលម្ហសមុទ្រ ដោយលោកអះអាងថា បច្ចុប្បន្នទូកនេសាទក្នុងខេត្តព្រះសីហនុមិនទាន់បានចុះបញ្ជីនៅឡើយទេ។
លោកបន្តថា៖ «ប្រសិនបើមានទូកនេសាទណាបានចុះបញ្ជីរួចហើយយើងនឹងបំពាក់ឧបករណ៍ GPS ព្រោះសហភាពអឺរ៉ុប IU បានផ្តល់ថវិកាក្នុងការបំពាក់ឧបករណ៍ GPS តាមដានទូកនេសាទដែលបានចុះបញ្ជីរួច»។
ជុំវិញរឿងនេះ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោក ហុង វណ្ណៈ បានលើកឡើងនៅថ្ងៃទី ៣០ ខែសីហា ថា ការចុះបញ្ជីនេះគឺរឿងសំខាន់ដើម្បីងាយស្រួលគ្រប់គ្រងសណ្តាប់ធ្នាប់លើទូក កប៉ាល់ កាណូត នាវា ដែលធ្វើអាជីវកម្មនៅក្នុងខេត្តទាំងមូល។
លោកថា៖«បើការងារចុះបញ្ជីនេះទទួលបានជោគជ័យ យើងនឹងអាចបញ្ចៀសផលប៉ះពាល់បានច្រើន ព្រោះថា កាលណាយើងកំណត់បានអត្តសញ្ញាណនៃទូកនេសាទទាំងអស់ មិនត្រឹមតែជួយធានាសុវត្ថិភាព សន្តិសុខសណ្តាប់ធ្នាប់សាធារណៈលើផ្ទៃសមុទ្រប៉ុណ្ណោះទេ វាក៏ជាចំណែកជួយលើកកម្ពស់សេដ្ឋកិច្ចខេត្តថែមទៀត...»។
បើតាមរដ្ឋបាលខេត្តព្រះសីហនុ តាមច្បាប់កម្ពុជាទូកអូសមិនអនុញ្ញាតឱ្យអូសនៅក្រោមជម្រៅទឹក ២០ ម៉ែត្រទេ ដូច្នេះអាជ្ញាធរមូលដ្ឋាន និងសហគមន៍នេសាទត្រូវកំណត់ដែននេសាទសម្រាប់ទូកនេសាទមានដូចជា៖ អួនអូស ទូក លបក្តាម ត្រូវពង្រីកដែននេសាទនៅក្នុងសហគមន៍ ដើម្បីរួមគ្នាថែរក្សា ការពារ និងអភិរក្សធនធានជលផលឱ្យសម្បូរបែបថែមទៀត។
កម្ពុជាបានជាប់បញ្ជីកាតក្រហមរបស់សហភាពអឺរ៉ុប (Illegal Unreported and Unregulated Fishing, IUU") តាំងពីឆ្នាំ ២០១៤ មកមានរយៈពេល ៩ ឆ្នាំហើយ ពាក់ព័ន្ធនឹងការនេសាទខុសច្បាប់ គ្មានរបាយការណ៍ ហើយកម្ពុជាមិនបានធ្វើរបាយការណ៍សុំការអនុញ្ញាតទុកជាមុនទៅកាន់សហគមន៍អន្តរជាតិ។
ការកើតមានការនេសាទខុសច្បាប់នេះដោយសារតែទូកនេសាទទាំងនោះមិនទាន់បានចុះបញ្ជីត្រឹមត្រូវ។ ហេតុនេះការជំរុញចុះបញ្ជីនាវា ទូកនេសាទនេះ គឺជាយន្តការសំខាន់ដើម្បីដោះកាតក្រហមពីសហភាពអឺរ៉ុប នៅពេលខាងមុខ។
សូមបញ្ជាក់ថា បច្ចុប្បន្ន នៅខេត្តព្រះសីហនុមាន ២ ក្រុង និង ៣ ស្រុក មានទូកនេសាទតូច ធំ សរុបចំនួន ២ ៥២៣ ទូក ហើយទូកដែលបានសុំបង់ពន្ធដែននេសាទមានចំនួន ៦៥ ទូក៕
