កូនផ្សោតលែងទឹកនៅតំបន់ផ្សោតខេត្តក្រចេះ។ រូបថត wwf
ភ្នំពេញៈ គិតត្រឹមរយៈពេលប្រមាណជាជាង ៨ ខែ ក្នុងឆ្នាំ២០២៣ នេះ ផ្សោតបានកើតថ្មីចំនួន ៧ ក្បាល ខណៈដែលចំនួនផ្សោត ៣ ក្បាល ងាប់ បើធៀបទៅនឹងឆ្នាំកន្លងមក។
លោក ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបង្ហាញតាមហ្វេសប៊ុករបស់លោក នាថ្ងៃទី២ ខែកញ្ញាថា ក្រុមការងារស្រាវជ្រាវ និងអភិរក្សជលផលនៃរដ្ឋបាលជលផល និងអង្គការ WWF បានប្រទះឃើញកូនផ្សោតកើតថ្មី១ក្បាលនៅក្នុងខេត្តស្ទឹងត្រែង។ កូនផ្សោត១នេះ គឺជាកូនផ្សោតទី៧ ដោយបានកត់ត្រាទុកគិតត្រឹមដើមខែ៩ នៃឆ្នាំ២០២៣នេះ ទាំងចំនួនផ្សោតកើតក៏មានការកើនឡើង និងចំនួនផ្សោតងាប់ក៏មានការថយចុះ បើប្រៀបធៀបទៅនឹងឆ្នាំ២០២១ និងឆ្នាំ២០២២។
យោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ ក្នុងឆ្នាំ២០២១ មានផ្សោតកើតចំនួន ៦ក្បាល និងងាប់ចំនួន ៩ក្បាល។ ឆ្នាំ២០២២ មានផ្សោតកើតចំនួន ៦ក្បាល និងងាប់ចំនួន ១១ក្បាល។
របាយការណ៍ដដែល ក៏បានបង្ហាញផងដែរ ចាប់ពីខែមករា រហូតដល់ដើមខែកញ្ញា ឆ្នាំ២០២៣ មានផ្សោតកើតចំនួន ៧ក្បាល និងងាប់ចំនួន ៣ក្បាល។
លោក ឃឹម ហ្វីណង់ បានបញ្ជាក់ថា៖ «នេះជាចំនួនមួយកើនឡើងយ៉ាងល្អ បើធៀបនឹងឆ្នាំ២០២១ និងឆ្នាំ២០២២។ ទន្ទឹមជាមួយនឹងការថយចុះច្រើននៃចំនួនផ្សោតស្លាប់ បើធៀបនឹងឆ្នាំកន្លងមកផងដែរនោះ នេះគឺជាសញ្ញាល្អសម្រាប់ការអភិរក្សផ្សោតនៅកម្ពុជា!»។
ដោយឡែកអង្គការមូលនិធិសកលសម្រាប់អភិរក្សធនធានធម្មជាតិ (WWF) ក៏បានប្រកាសឱ្យដឹងដែរថា កូនផ្សោតដែលទើបនឹងកើតថ្មី១ក្បាលនេះ មានអាយុកាលប្រមាណ ២០ថ្ងៃបានប្រទះឃើញហែលក្នុងក្រុមហ្វូងសត្វផ្សោតពេញវ័យដែលមានចំនួនប្រមាណជា៨ក្បាល នាថ្ងៃទី២ ខែកញ្ញា ឆ្នាំ២០២៣នេះ ក្នុងអន្លង់ត្បូងខ្លា ស្ថិតនៅឃុំអូរម្រះ ស្រុកសៀមបូក ខេត្តស្ទឹងត្រែង។
ក្រុមការងារស្រាវជ្រាវនិងអភិរក្សជលផលនៃរដ្ឋបាលជលផល និងអង្គការWWF កំពុងបំពេញការងារចុះអង្កេតស្ថានភាពសត្វផ្សោតទន្លេមេគង្គ។
អង្គការ WWFបន្តថា៖ «វត្តមានរបស់សត្វផ្សោតនេះ ជាកត្តាចង្អុលបង្ហាញមួយ ពីគុណភាពធនធានជលផល និងគុណភាពទន្លេ ក្នុងនោះរាប់បញ្ចូលទាំងជីវចម្រុះ ប្រព័ន្ធបរិស្ថានធម្មជាតិ ដែលផ្តល់នូវសេវាកម្មអេកូឡូស៊ីក្នុងការទ្រទ្រង់ជីវិតរបស់មនុស្ស និងជីវភាពរបស់សហគមន៍មូលដ្ឋានតាមរយៈវិស័យទេសចរណ៍ផងដែរ។ សូមរួមគ្នាការពារសត្វផ្សោតទន្លេមេគង្គ ដែលកំពុងរស់រាន ដើម្បីជាប្រយោជន៍ដល់ប្រជាជន និងបរិស្ថានធម្មជាតិ»។
បើតាមអង្គការ WWFសត្វផ្សោតទន្លេមេគង្គ ត្រូវបានចាត់ទុកថា ជារតនសម្បត្តិជាតិ មានជីវិតរបស់កម្ពុជា ហើយជាប្រភេទផ្សោតមួយប្រភេទស្ថិតក្នុងចំណោម៦ប្រភេទនៃសត្វផ្សោតទឹកសាបកម្របំផុតដែលនៅសេសសល់ក្នុងពិភពលោក៕
