លោក Gaël Bonnel Sanchez និងព្រះនាងតូច នរោត្ដម ជេនណា ។ រូបថត សហការី
ភ្នំពេញ : ព្រះនាងតូច នរោត្ដម ជេនណា ទទួលបានលិខិតអញ្ជើញជាផ្លូវការពីក្រុមហ៊ុនផលិតភាពយន្ដអន្ដរជាតិ Millennium Media សម្រាប់ដំណើរទស្សនកិច្ចមួយទៅទស្សនាកន្លែងថតភាពយន្តនៅអឺរ៉ុប និងការចូលរួមសម្តែងក្នុងខ្សែភាពយន្តខ្នាតអន្តរជាតិ។
ព្រះនាង ជេនណា ដែលមានដុងខាងសិល្បៈ និងមានសម្រស់ស្រស់ស្អាតបានសព្វព្រះរាជហឫទ័យប្ដេជ្ញាបង្ហាញសិល្បៈវប្បធម៌ខ្មែរទៅកាន់ពិភពលោកក្នុងព្រឹត្ដិការណ៍នោះ។
ព្រះនាងបានសរសេរនៅលើហ្វេសប៊ុកថា៖ «ខ្ញុំនឹងចូលរួមចំណែកមួយផ្នែកដោយនាំកិត្យានុភាពសិល្បៈវប្បធម៌ខ្មែរទៅកាន់ពិភពលោក»។
ជាមួយភាពល្បីល្បាញជាអ្នកសិល្បៈ ជាតារាភាពយន្ដ ជាតារាចម្រៀង ជាអ្នករាំ ទាំងរបាំបុរាណ និងសម័យ ជាម៉ូដែល និងជាទូតសុច្ឆន្ទៈប្រចាំក្រុមហ៊ុនអន្ដរជាតិជាច្រើន ព្រះនាង ជេនណា តែងតែចូលរួមលើកមុខមាត់ប្រទេសជាតិ។
ដោយកិច្ចសហការជាមួយក្រុមហ៊ុនធំបំផុត និងឥទ្ធិពលបំផុតមួយ Nu Boyana Film Studios រាជវង្សដ៏មានទេពកោសល្យខាងសិល្បៈ ព្រះនាងតូច ជេនណា បានចាត់ទុកផលិតកម្មភាពយន្ដ Millennium Media ជាឃ្លាំងផលិតភាពយន្ដហូលីវូដជាច្រើន។
ក្រុមហ៊ុនបានផលិតភាពយន្ដប្រមាណ ៤០០រឿង រួមទាំង ភាពយន្ដល្បីៗ ដូចជា Rambo, The Expendables, Hellboy, Hitman, Angel Has Fallen, Tesla, Black Dahlia, Loving Pablo, និង The Mechanic ជាដើម។
ព្រះនាងមានបន្ទូលនៅលើហ្វេសប៊ុកថា៖ «តារាសម្ដែងជាច្រើននាក់ ដូចជា លោក Robert De Niro, Al Pacino, Sylvester Stallone, Arnold Schwarzenegger, Jason Statham, Orlando Bloom, Megan Fox, Jessica Alba, Antonio Banderas, Penelope Cruz និងតារាសម្ដែងជាច្រើនទៀត ផ្ដល់ការទុកចិត្តលើក្រុមការងារ និងសម្ដែងនៅក្នុងខ្សែភាពយន្ដ»។
តារាសម្ដែងល្បីៗទាំងនេះបានជ្រើសរើសសហការជាមួយ Millennium Media ដែលមានកេរ្តិ៍ឈ្មោះនៅក្នុងឧស្សាហកម្មភាពយន្ត។ ជាផ្នែកមួយនៃដំណើរទៅកាន់ប៊ុលហ្គារី ព្រះនាង ជេនណា គ្រោងនឹងចូលរួមសម្ដែងតន្ត្រីនៅឯ Nu Boyana Film Studios ជាមួយសិល្បករអន្តរជាតិ។
ព្រះនាងតូច បានបន្ដថា៖ «ខ្ញុំនឹងចូលរួមសម្ដែងជាមួយតារាសម្ដែងអន្ដរជាតិជាច្រើន ដូចជា Ckay (top streamed artist in the world), GIMS (តារាចម្រៀងបារាំងដ៏មានប្រជាប្រិយភាព), Neta Barzilai (បានឈ្នះកម្មវិធី Eurovision នាពេលថ្មីៗនេះ) និង Michele Morrone ( តារាងសម្ដែងសំខាន់នៅក្នុងខ្សែភាពយន្ដភាគនៅលើ Netflix មានចំណងជើងថា 365 Days)»។
ព្រឹត្តិការណ៍ប្រជុំដោយតារាល្បីៗ និងលំដាប់ពិភពលោកនេះនឹងក្លាយជាកម្មវិធីមិនអាចបំភ្លេចបានសម្រាប់ការចូលរួមរបស់ព្រះនាងតូច ក្នុងការបង្ហាញវប្បធម៌ខ្មែរទៅលើឆាកអន្ដរជាតិ។
ព្រះនាង ជេនណា បានថ្លែងអំណរគុណដល់លោក Gaël Bonnel Sanchez ជាផលិតករ និងជាអ្នកដឹកនាំផ្នែកអភិវឌ្ឍន៍ក្រុមហ៊ុន។
ព្រះនាងតូច មានបន្ទូលថា៖ «ខ្ញុំសូមអរគុណដល់ លោកផលិតករ Gaël និងជាអ្នកដឹកនាំទទួលបន្ទុកផ្នែកអភិវឌ្ឍន៍ របស់ក្រុមហ៊ុន។ កន្លងទៅ លោកក៏ជាអ្នកគ្រប់គ្រងនៃបវរកញ្ញា Miss Bulgaria 2023 ផងដែរ ហើយខ្ញុំ បានទទួលនូវកិត្តិយសក្នុងការសម្ដែងនៅក្នុងកម្មវិធីនេះ ក្នុងនាមជាភ្ញៀវពិសេស»។
ជាមួយនឹងចក្ខុវិស័យលើសពីការប្រឡងបវរកញ្ញាបែបប្រពៃណី លោក Gaël មានបំណងបង្កើតកម្មវិធី Miss Bulgaria ដោយផ្ដោតលើសមត្ថភាពផ្សេងៗទៀតរបស់កញ្ញាឯកនីមួយៗ រួមទាំងសម្រស់ធម្មជាតិរបស់ពួកគេផងដែរ។
ក្នុងនោះវត្តមានរបស់ព្រះនាងតូច នរោត្តម ជេនណា ជាតារាចម្រៀង ព្រះនាងនឹងឡើងឆាកក្នុងកម្មវិធីប្រគំតន្ត្រីដ៏ធំនៅថ្ងៃទី៩ ខែកញ្ញា ឆ្នាំ២០២៣ ដោយបង្ហាញពីទេពកោសល្យសំឡេងដ៏គួរឱ្យទាក់ទាញរបស់ទ្រង់។
បើតាមលិខិតអញ្ជើញបានបង្ហាញថា៖ «Nu Boyana Film Studios សូមអញ្ជើញប្រជាជនខ្មែរគ្រប់រូបឱ្យតាមដានលើព្រះវត្ដមានរបស់ព្រះនាងតូច ជេនណា ដែលអមព្រះរាជដំណើរដោយព្រះអង្គម្ចាស់ នរោត្ដម ណារីទ្ធីពង្ស និងព្រះមហេសី នរោត្ដម បុប្ផារី»។
ព្រះនាង ជេនណា ជាអ្នកសិល្បៈ និងជាមានឥទ្ធិពលលើវិស័យសិល្បៈមួយនៅអាស៊ី មានអ្នកចូលទស្សនាលើបណ្ដាញយូធូបរបស់ទ្រង់ច្រើនជាង ១៥០លានដង។
តាមរយៈការខិតខំប្រឹងប្រែងផ្នែកសិល្បៈ ព្រះនាងនៅតែប្រកាន់ខ្ជាប់នូវការតាំងចិត្តលើកតម្កើងកេរ្តិ៍ឈ្មោះជាតិរបស់ប្រទេសកម្ពុជា និងលើកស្ទួយវប្បធម៌ដ៏សម្បូរបែប។
ទ្រង់បានបន្ដថា៖ «ខ្ញុំប្តេជ្ញាថា នឹងនាំកិត្ដិនាមជាតិខ្មែរ ឱ្យអន្តរជាតិបានស្គាល់កាន់តែច្បាស់នូវកិត្យានុភាពជាតិខ្មែរ វប្បធម៌ខ្មែរដ៏ល្អប្រពៃណី ដែលកំពុងរស់នៅយ៉ាងសុខុមក្នុងយុគសម័យដ៏រីករាយក្រោមការដឹកនាំដ៏ឆ្នើមនៃប្រមុខរាជរដ្ឋាភិបាលកម្ពុជា។ ខ្ញុំសង្ឃឹមថា បងប្អូនខ្មែរទាំងអស់នឹងគាំទ្រខ្ញុំ»។
ក្រៅពីព្រះនាងតូច ជេនណា ព្រះរៀមរបស់ទ្រង់ នរោត្តម អេមម៉ា ក៏ត្រូវបានអញ្ជើញឱ្យចូលរួមក្នុងព្រឹត្ដិការណ៍ដ៏សំខាន់នេះផងដែរ។
ព្រះនាង អេមម៉ា ជាតារាម៉ូដែលអន្តរជាតិដ៏មានទេពកោសល្យនឹងយាងចូលរួមជាមួយព្រះនាងតូចជេនណា ក្នុងប្រទេសប៊ុលហ្គារី៕
