ការបើកទ្វារទឹកទំនប់វារីអគ្គិសនីកំចាយ នៅថ្ងៃទី ៥ កញ្ញា ។ រូបថត ហ្វេសប៊ុក
កំពតៈ មន្ត្រីជាន់ខ្ពស់នៃរដ្ឋបាលខេត្តកំពត បានអះអាងថា ការបើកទ្វារទឹកទំនប់វារីអគ្គិសនីកំចាយ មិនធ្វើឱ្យមានផលប៉ះពាល់ដល់ប្រជាពលរដ្ឋទេ ព្រោះការបើកទ្វារទឹកនេះជាវិធានការបង្ការបស់គណៈកម្មាធិការគ្រប់គ្រងគ្រោះមហន្តរាយខេត្តកំពត។
លោក គុត ឧសភា នាយករដ្ឋបាលខេត្តកំពត បានឱ្យដឹងនៅថ្ងៃទី ៥ ខែកញ្ញាថា នៅពេលដែលទឹកទំនប់វារីអគ្គិសនីកំចាយឡើងដល់ ១៤៧ ទៅ ១៤៩ ម៉ែត្រ គឺជាគោលការណ៍ត្រូវបើកទឹកចេញ ប៉ុន្តែបើទុករហូតដល់ ១៥០ ម៉ែត្រ ទើបបើក នឹងធ្វើឱ្យទឹកចាល់ខ្លាំង។
លោកបានថ្លែងថា៖ «យើងមិនអាចទុកដល់ ១៥០ ម៉ែត្របានទេ យើងត្រូវជជែកជាមួយខាងវារីអគ្គិសនី ឱ្យបើកបង្ហូរចូលសមុទ្រឱ្យហើយ ចៀសវាងមានការកើនឡើងកម្ពស់ទឹកខ្លាំងជាងនេះ។ អ៊ីចឹងហើយបានជាគណៈកម្មាធិការជាតិគ្រប់គ្រងគ្រោះមហន្តរាយខេត្តកំពតពិភាក្សាគ្នាឱ្យមានការបង្ហូរទឹកនេះ»។
បើតាមលោក គុត ឧសភា ទំនប់វារីអគ្គិសនីកំចាយ អាចដំណើរការថាមពលបាន ដោយសារតែទឹក ហើយក៏មានបំណងក្នុងការរក្សាទឹកទុក ប៉ុន្តែគណៈកម្មាធិការជាតិគ្រប់គ្រងគ្រោះមហន្តរាយខេត្តកំពត មិនអនុញ្ញាតឱ្យរក្សាទឹកនេះបានទេ បើរក្សាទុករហូតដល់ឡើងខ្លាំងទើបបើកនឹងធ្វើឱ្យប៉ះពាល់ដល់ប្រជាពលរដ្ឋ។
លោកបានបន្តថា មួយវិញទៀត ចំពោះការជូនដំណឹងរបស់រដ្ឋបាលខេត្តកាលពីថ្ងៃទី៤ ខែកញ្ញា ដើម្បីឱ្យពលរដ្ឋបង្ការទុកមុន តែយ៉ាងណាមកទល់ពេលនេះមិនមានអ្វីជាបញ្ហាទេ។
យោងតាមសេចក្តីជូនដំណឹងរបស់រដ្ឋបាលខេត្តកំពតនៅថ្ងៃទី៤ ខែកញ្ញា បានបញ្ជាក់ថា តាមការជូនដំណឹងរបស់ក្រសួងធនធានទឹក និងឧតុនិយម កម្ពុជាទទួលឥទ្ធិពលពីប្រព័ន្ធសម្ពាធទាប ជាមួយនឹងខ្យល់មូសុងនិរតីមធ្យម។ ស្ថានភាពបែបនេះនឹងធ្វើឱ្យតំបន់មាត់សមុទ្រអាចមានភ្លៀងនៅក្នុងកម្រិតមធ្យមទៅច្រើន លាយឡំផ្គរ រន្ទះ និងខ្យល់កន្ត្រាក់ ចាប់ពីថ្ងៃទី៤ ដល់ថ្ងៃទី១០ ខែកញ្ញា ឆ្នាំ២០២៣។
សេចក្តីជូនដំណឹងដដែលនេះបន្តថា ដោយឡែកនៅតំបន់ទំនប់វារីអគ្គិសនីកំចាយ ទឹកក្នុងអាងទំនប់មានកម្ពស់១៤៧,៩៥ម៉ែត្រ ហើយទឹកហូរចូលអាងទំនប់មានចំនួន៧៥៨,៣ ម/វិនាទី។ក្រុមការងារបច្ចេកទេសទំនប់វារីអគ្គិសនីកំចាយនឹងបើកទ្វារទឹកចំនួន១ កម្ពស់២ម៉ែត្រ នៅល្ងាចថ្ងៃដដែលនោះ ដើម្បីរំដោះទឹកចេញពីទំនប់ ដែលអាចធ្វើឱ្យស្ថានភាពទឹកព្រែកនឹងមានកម្ពស់លើសពីធម្មតា៕
