លោកនាយករដ្ឋមន្រ្តី ហ៊ុន ម៉ាណែត ថ្លែងក្នុងពិធីសំណេះសំណាលជាមួយកម្មករ និយោជិតប្រមាណ ២ ម៉ឺននាក់ មកពីរោងចក្រ សហគ្រាសនានា ក្នុងខេត្តកំពង់ស្ពឺ នៅថ្ងៃទី៩ ខែកញ្ញាឆ្នាំ ២០២៣។ HMN
លោកនាយករដ្ឋមន្រ្តី ហ៊ុន ម៉ាណែត បានសម្រេចអនុញ្ញាតឱ្យមានការរៀបចំធ្វើលិខិតឆ្លងដែន (Passport) នៅប្រទេស កូរ៉េខាងត្បូង និងបានណែនាំឱ្យមន្រ្តីជំនាញពាក់ព័ន្ធបង្កើតកុងស៊ុលកម្ពុជា នៅភាគខាងត្បូងប្រទេសថៃ ដើម្បីបង្កលក្ខណៈងាយស្រួលដល់ប្រជាពលរដ្ឋក៏ដូចជាពលករខ្មែរដែលកំពុងបម្រើការងារនៅក្រៅប្រទេស។
ប្រមុខរាជរដ្ឋាភិបាលកម្ពុជា បានប្រកាសជាសាធារណៈបែបនេះ នៅក្នុងពិធីសំណេះសំណាលជាមួយកម្មករ និយោជិតប្រមាណ ២ ម៉ឺននាក់ មកពីរោងចក្រ សហគ្រាសនានា ក្នុងខេត្តកំពង់ស្ពឺ នៅថ្ងៃទី៩ ខែកញ្ញាឆ្នាំ ២០២៣។
លោក ហ៊ុន ម៉ាណែត បានថ្លែងថា៖ «ខ្ញុំបានសម្រេច គឺអនុញ្ញាតឱ្យរៀបចំដើម្បីធ្វើលិខិតឆ្លងដែននៅក្រៅប្រទេសតែម្តង នៅកូរ៉េខាងត្បូងមុនគេ។ យើងអនុវត្តដោយសារនៅទីនោះមានការលំបាក ប៉ុន្តែដើម្បីដោះស្រាយពីកង្វល់ និងការគ្រប់គ្រងសន្តិសុខ និង ទិន្នន័យ ខ្ញុំបានសម្រេចឱ្យបង្កើតការិយាល័យអនុព័ន្ធមួយ។ បង្កើតប៉ុស្តិ៍អចិន្រ្តៃយ៍ ដើម្បីបញ្ជូនមន្រ្តីអត្តសញ្ញាណកម្មទៅប្រចាំការទីនោះ ដើម្បីគ្រប់គ្រងទិន្នន័យ ហើយធ្វើការឱ្យតែម្តងកុំឱ្យពលករយើងពិបាក»។
លោកបានបញ្ជាក់ថា ការធ្វើបែបនេះ ដើម្បីបង្កលក្ខណៈងាយស្រួលដល់ពលរដ្ឋខ្មែរដែលកំពុងរស់នៅនិងធ្វើការនៅកូរ៉េខាងត្បូង ដោយមិនចាំបាច់ចំណាយពេលវេលា និង កាត់បន្ថយការចំណាយក្នុងការមកធ្វើលិខិតឆ្លងដែននៅប្រទេសកម្ពុជា។
លោកថា៖ «អ៊ីចឹង! បងប្អូនមិនបាច់ព្រួយបារម្ភរឿងខាតការងារជិះយន្តហោះមកខ្មែរទេ បើមិនបានមកធ្វើទាន់ពេល អាចប្រឈមនឹងការបាត់បង់ភាពស្របច្បាប់។ យើងចាំបាច់ផ្តើមការជួយនេះនៅកូរ៉េ ពេលដែលចេញគោលការណ៍នេះទៅសូមឱ្យក្រសួង ការបរទេស ក្រសួងមហាផ្ទៃ មានអគ្គអត្តសញ្ញាណកម្ម ក្រសួងសេដ្ឋកិច្ច និងហិរញ្ញវត្ថុ គិតគូរអំពីក្របខ័ណ្ឌ និងថវិកា បង្កើតប៉ុស្តិ៍ថ្មី ជជែកគ្នាដើម្បីឱ្យស្របតាមច្បាប់ជាធរមាន។ កិច្ចការនេះយើងត្រូវតែធ្វើ ដើម្បីផលប្រយោជន៍បងប្អូនទាំងក្នុងនិងក្រៅស្រុក»។
ដោយឡែក ពាក់ព័ន្ធពលករនៅថៃវិញ លោក ហ៊ុន ម៉ាណែត បានលើកឡើងថា កន្លងទៅ យើងក៏បានរុញមន្រ្តី ទីប្រឹក្សាពលករតាមទូត និងបានបង្កើតប៉ុស្តិ៍នៅតាមព្រំដែនដើម្បីជួយពួកគាត់ដែរ។
ដើម្បីបង្ខិតសេវាដល់ពលករខ្មែរ លោកបានណែនាំឱ្យមន្រ្តីបង្កើតកុងស៊ុល នៅភាគខាងត្បូងនៅប្រទេស ថៃ ដើម្បីជួយសម្រួលកិច្ចការផ្សេងៗ។
លោកថា៖ «ក្នុងជំហានមួយនេះខ្ញុំគិតថា ពង្រីកសេវាគ្របដណ្តប់ដើម្បីជួយ ជាមួយយន្តការដែលមានស្រាប់ គឺត្រូវពង្រឹង ពង្រីកចំនួនទីប្រឹក្សាការងារ។ ឥឡូវយើងមាន ៣ នាក់ ប្រមូលផ្តុំនៅទីក្រុង បាងកក មានកុងស៊ុលមួយនៅសាកែវ សូមយកម្នាក់ពីបាងកកទៅដាក់នៅសាកែវ»។
លោកបន្ថែមថា៖ «មួយទៀត នៅភាគខាងត្បូងថៃ យើងអត់ទាន់មានកុងស៊ុលទេ ខ្ញុំបានពិភាក្សារួចហើយ សូមឱ្យបង្កើតអគ្គកុងស៊ុលមួយនៅទីនោះ ហើយរៀបចំមនុស្សបន្ថែមទៀត ដើម្បីកុំឱ្យពលករយើងដែលធ្វើការនៅភាគខាងត្បូងពិបាក ដើម្បីឱ្យគាត់ងាយស្រួល ព្រោះពួកគាត់សុទ្ធតែប្រជាពលរដ្ឋ កូនចៅយើងទាំងអស់ អ៊ីចឹង! រុញសេវាអីដែលអាចផ្តល់ទៅបាន"។
នាពិធីសំណេះសំណាលនោះដែរ លោក ហ៊ុន ម៉ាណែត បានណែនាំឱ្យមន្រ្តីពាក់ព័ន្ធកម្ពុជា ត្រូវធ្វើការងារជាមួយរដ្ឋមន្រ្តីក្រសួងការងារថៃ ដើម្បីចរចាក្នុងក្របខ័ណ្ឌផ្សេងៗ សំដៅជួយសម្រួលដល់បងប្អូនដែលធ្វើការនៅទីនោះ ទាំងការពន្យារលិខិតឆ្លងដែន និង ការផ្តល់ភាពស្របច្បាប់ជូនពួកគាត់៕
