គិតចាប់ពីថ្ងៃទី ២ ដល់ថ្ងៃទី៨ ខែកញ្ញា ឆ្នាំ ២០២៣ ក្រុមឯកទេសមុជទឹកនៃបញ្ជាការដ្ឋានទ័ពពិសេស សហការជាមួយក្រុមការងារ មជ្ឈមណ្ឌលសកម្មភាពកំចាត់មីនកម្ពុជាស៊ីម៉ាក់ បានរុករកឃើញគ្រាប់មិនទាន់ផ្ទះ និងបំណែកដែកទម្ងន់សរុបប្រមាណ ២០០ គីឡូក្រាមនៅក្នុងទន្លេ នៃស្រុក ពាមជរ ខេត្តព្រៃវែង។
លោក ស៊ុ សំណាង មេបញ្ជាការស្តីទីបញ្ជាការដ្ឋានទ័ពពិសេសនៅថ្ងៃទី ៩ ខែសីហា ឆ្នាំ ២០២៣ នេះ បញ្ជាក់ថា ក្រុមឯកទេសមុជទឹកនិងក្រុមប្រតិបត្តិការរុករកសង្គ្រោះគ្រោះមហន្តរាយលេខ៩១១ នៃបញ្ជាការដ្ឋានទ័ពពិសេសចំនួន ១៥នាក់ សហការជាមួយក្រុមការងារស៊ីម៉ាក់ (CMAC) ចុះយកគ្រាប់ នៅចំណុចភូមិកោះពាមរាំង ឃុំកោះចេក ស្រុកពាមជរ ខេត្តព្រៃវែង ការដ្ឋានទី៥ ក្នុងភូមិសាស្ត្រខាងលើ។ ក្នុងនោះរកឃើញគ្រាប់ 155mm,105mm, DKZ75មម, MT81mm, MT60mm, គ្រាប់៤០ និងគ្រាប់បែក សរុបគ្រាប់ចំនួន ១១២គ្រាប់, សម្បកគ្រាប់ចំនួន ២ និងបំណែកដែកទម្ងន់ ២០០ គីឡូក្រាម។
លោក ស៊ុ សំណាង សង្កត់ធ្ងន់ថា៖ «ការរុករកនេះ ធ្វើឡើងរហូតដល់ស្រង់គ្រាប់អស់ពីក្នុងទឹក នៅក្នុងភូមិសាស្ត្រខាងលើទើបបិទបញ្ចប់ការរុករក»។ នេះបើតាមកងទ័ពជើងគោកនៃកងយោធពលខេមរភូមិន្ទ។
លោក ស ខេង ក្នុងកិច្ចប្រជុំអន្តរក្រសួងពីថ្ងៃទី ៨ មករា។ រូបថត Sar Kheng page
នៅក្នុងវេទិកាសាធារណៈស្តីពីការបូមខ្សាច់ ដើម្បីគាំទ្រកិច្ចប្រតិបត្តិការបោសសម្អាតគ្រាប់មិនទាន់ផ្ទុះ និងស្រង់នាវាលិចនៅបាតទន្លេ នៅស្រុកលើកដែក កាលពីខែកុម្ភៈ ឆ្នាំ២០២៣ លោក ហេង រតនា អគ្គនាយកអង្គភាពស៊ីម៉ាក់ បានថ្លែងថា កិច្ចប្រតិបត្តិការរុករកគ្រាប់ក្នុងទឹក មានការគិតគូរនិងការប្រើប្រាស់សម្ភារបច្ចេកទេសទាន់សម័យ មានរូបភាពផែនទីច្បាស់លាស់ណាស់។
លោកបានបន្តថា ការបូមខ្សាច់ដើម្បីបម្រើកិច្ចបោសសម្អាតគ្រាប់មិនទាន់ផ្ទុះមានបរិមាណច្រើនតោនលិចក្រោមដីបាតទន្លេ ស្ថិតតែនៅផ្នែកខាងលើនៃក្បាលកោះ។
លោកបន្តថា កិច្ចប្រតិបត្តិការនេះ គ្មានហេតុផលបង្កផលប៉ះពាល់ដល់ប្រជាពលរដ្ឋឡើយ ឬ ត្រូវបាក់ដីបាត់កោះពាមរាំង ដែលទំហំបណ្តោយជិតប្រមាណ ៤៥០០ម៉ែត្រនោះទេ ព្រោះកិច្ចប្រតិបត្តិការនេះដើម្បីសេចក្តីសុខសុវត្ថិភាពប្រជាពលរដ្ឋ បម្រើផលប្រយោជន៍ប្រជាពលរដ្ឋជាធំ និងសង្គមជាតិ ក៏ដូចគាំទ្រការអភិវឌ្ឍប្រទេសជាតិផងដែរ។
បើតាម លោក ហេង រតនា គិតចាប់ពីថ្ងៃចាប់ផ្តើម រហូតដល់ខែកុម្ភៈ ឆ្នាំ ២០២៣ កិច្ចប្រតិបត្តិការកន្លងទៅសម្រេចបានលទ្ធផលស្រង់គ្រាប់មិនទាន់ផ្ទុះគ្រប់ប្រភេទបានចំនួន ២៧០៧ គ្រាប់ ក្នុងនោះមានគ្រាប់មីនចំនួន ៣៦ គ្រាប់ កាំភ្លើងធុនស្រាលចំនួន ២ដើម គិតជាទម្ងន់សរុបជាង ៤០ តោន៕
