ជំនួបរវាងលោកឆាយ ឫទ្ធិសែន និងឯកអគ្គរដ្ឋទូតឥណ្ឌាពីថ្ងៃទី ១២ កញ្ញា។ រូប ក្រសួងអភិវឌ្ឍន៍ជនបទ
ភ្នំពេញៈ ឯកអគ្គរដ្ឋទូតឥណ្ឌាប្រចាំកម្ពុជា បានសន្យាថា នឹងបន្តពង្រឹងទំនាក់ទំនងភាពជាដៃគូឱ្យកាន់តែល្អជាមួយកម្ពុជា ជាពិសេសជាមួយក្រសួងអភិវឌ្ឍន៍ជនបទ ដោយផ្តល់បទពិសោធន៍ក្នុងការបង្កើតជាភូមិគំរូដល់កម្ពុជាផងដែរ។
យោងតាមការផ្សព្វផ្សាយលើហ្វេសប៊ុករបស់ក្រសួងអភិវឌ្ឍន៍ជនបទបានឱ្យដឹងថា ការលើកឡើងរបស់ឯកអគ្គរដ្ឋទូតឥណ្ឌាប្រចាំកម្ពុជា លោកស្រី DevyaniUttamKhobragade ដូចនេះ ធ្វើឡើងក្នុងជំនួបជាមួយលោក ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទកាលថ្ងៃទី ១២ ខែកញ្ញា ឆ្នាំ២០២៣។
លោកស្រី Devyani បានវាយតម្លៃខ្ពស់ចំពោះកិច្ចសហប្រតិបត្តិការ ភាពជាដៃគូយ៉ាងជិតស្និទ្ធរវាងរដ្ឋាភិបាលឥណ្ឌា និងរាជរដ្ឋាភិបាលកម្ពុជានាពេលកន្លងមក ដោយលោកស្រីបានសន្យាថានឹងបន្តទំនាក់ទំនងភាពជាដៃគូឱ្យកាន់តែខ្លាំង និងល្អជាងមុនបន្ថែមទៀត ជាពិសេសជាមួយក្រសួងអភិវឌ្ឍន៍ជនបទ។
លោកស្រី បានអះអាងថា៖«រដ្ឋាភិបាលឥណ្ឌានឹងបន្តផ្តល់ការចែករំលែកបទពិសោធន៍តាមរយៈការអប់រំបណ្តុះបណ្តាលធនធានមនុស្សលើការងារផ្តល់ឥណទានជូនប្រជាជនជនបទនិងការសហការផ្តល់បទពិសោធន៍ក្នុងការបង្កើតជាភូមិគំរូដោយផ្តោតលើសេវាកម្មសាធារណៈឌីជីថលផ្សេងៗផងដែរ ដើម្បីប្រែក្លាយជនបទកម្ពុជាជាសង្គមឌីជីថល និងស៊ីវិល័យផងដែរ»។
លោកស្រី Devyani បានបន្ថែមទៀតថា រដ្ឋាភិបាលឥណ្ឌានឹងបន្តពង្រីកកិច្ចសហការជាមួយកម្ពុជាក្រោមការផ្តល់ជាជំនួយលើការងារផ្គត់ផ្គង់ទឹកស្អាត និងអនាម័យជនបទតាមរយៈបច្ចេកទេស Amrit គឺទឹកស្អាតគ្មានសារជាតិពុលអាសេនិក ការជំរុញអ្នកវិនិយោគឥណ្ឌាមកកម្ពុជាដើម្បីបង្កើតការងារជូនប្រជាជនកម្ពុជា។
ថ្លែងក្នុងជំនួបនោះដែរ លោក ឆាយ ឫទ្ធិសែន បានអរគុណចំពោះភាគីឥណ្ឌាដែលតែងតែផ្តល់កិច្ចសហប្រតិបត្ដិការយ៉ាងជិតស្និទ្ធជាមួយកម្ពុជាលើគ្រប់វិស័យ មានវិស័យវប្បធម៌ សាសនា ការអប់រំ បណ្តុះបណ្តាលជំនាញ និងវិស័យអភិវឌ្ឍន៍ជនបទជាមួយកម្ពុជា។
លោកថា ជាយុទ្ធសាស្ត្ររបស់រដ្ឋាភិបាលអាណត្តិទី ៧ គឺផ្តោតខ្លាំងលើកំណើនការងារសមធម៌ប្រសិទ្ធភាព និងចីរភាពសំដៅកសាងមូលដ្ឋានគ្រឹះឆ្ពោះទៅសម្រេចឱ្យបាននូវចក្ខុវិស័យកម្ពុជា ឆ្នាំ ២០៥០។
លោកបានបញ្ជាក់ថា៖«ក្រសួងបានរៀបចំកម្មវិធីអាទិភាពរបស់ខ្លួនតាមរយៈការអភិវឌ្ឍហេដ្ឋារចនាសម្ព័ន្ធរូបវន្ដ និងគមនាគមន៍ ការបង្កើតភូមិគំរូ សំដៅពង្រីកវិសាលភាពនៅជនបទឱ្យកាន់តែប្រសើរឡើងដើម្បីជំរុញល្បឿនការផ្តល់សេវាកម្មចាំបាច់នានាដល់ជនបទ និងលើកស្ទួយសេដ្ឋកិច្ចប្រជាពលរដ្ឋផងដែរ»។
សូមរំឭកដែរថា ពាក់ព័ន្ធនឹងការបង្កើតភូមិគំរូនេះដែរ កាលពីដើមខែកញ្ញាកន្លងទៅលោក ឆាយ ឫទ្ធិសែន បានណែនាំ និងជំរុញឱ្យថ្នាក់ដឹកនាំនៃនាយកដ្ឋានអភិវឌ្ឍន៍សហគមន៍ និងនាយកដ្ឋានអភិវឌ្ឍន៍ជនជាតិភាគតិច សិក្សាពីការបង្កើតភូមិគំរូដែលមានសក្ដានុពល និងអំណោយផលលើផ្នែកសេដ្ឋកិច្ច ទេសចរណ៍ ឬកសិផលផ្សេងៗនៅតំបន់សហគមន៍ជនជាតិដើមភាគតិចដើម្បីពង្រឹងជីវភាពរស់នៅនៃសហគមន៍ជនជាតិដើមភាគតិចនៅកម្ពុជា។
ទាកទិននឹងរឿងនេះ ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន នៅថ្ងៃទី ១៣ ខែកញ្ញា បានគាំទ្ររាល់កិច្ចសហប្រត្តិបត្តិការនានាពីសហគមន៍អន្តរជាតិដើម្បីជួយជំរុញការលើកកម្ពស់កម្រិតជីវភាពរបស់ប្រជាពលរដ្ឋនៅតាមជនបទរបស់កម្ពុជា។
លោកស្រីបានថ្លែងថា៖«ទន្ទឹមនឹងការគាំទ្រឱ្យមានការបង្កើតជាភូមិគំរូហើយនោះយើងក៏ចង់ឱ្យភាគីពាក់ព័ន្ធពង្រឹងបន្ថែមលើការកែលម្អលក្ខខណ្ឌនៃការរស់នៅរបស់សហគមន៍ជនបទ តាមរយៈការទុកដាក់សំរាម អនាម័យ បង្គន់អនាម័យ ពង្រឹងការយល់ដឹងសហគមន៍ជនបទ ពង្រឹងការកែច្នៃផលិតផលក្នុងស្រុកផងដែរ»៕
