លោក នេត្រ ភក្ត្រា ទទួលជួបសម្ដែងការគួរសមជាមួយថ្នាក់ដឹកនាំកាសែតភ្នំពេញប៉ុស្ដិ៍។ ហុង មិនា
ភ្នំពេញៈ រដ្ឋមន្ត្រីក្រសួងព័ត៌មានលោក នេត្រ ភក្ត្រា ទទួលជួបសម្តែងការគួរសម និងពិភាក្សាការងារជាមួយក្រុមការងារកាសែតភ្នំពេញប៉ុស្តិ៍ ដឹកនាំដោយអគ្គនាយិកា យ៉ែម សនីតា និងលោក សំ រិទ្ធ ប្រធានគ្រប់គ្រងការីនិពន្ធ នៅទីស្តីការក្រសួងព័ត៌មាន ថ្ងៃទី ១៣ ខែកញ្ញា ឆ្នាំ ២០២៣ នេះ។
ថ្លែងក្នុងជំនួបនោះ លោក រដ្ឋមន្ត្រីបានលើកឡើងថា សារព័ត៌មានដើរតួនាទីសំខាន់ ជាស្ពានចម្លងព័ត៌មានពីរដ្ឋាភិបាលទៅប្រជាជន និងពីប្រជាជនមកកាន់រដ្ឋាភិបាល។ សម្រាប់ក្របខ័ណ្ឌនៃការងារក្រសួងព័ត៌មានក្នុងអាណត្តិថ្មីនេះចក្ខុវិស័យរបស់ក្រសួងព័ត៌មានដែលមានវិទ្យុ ទូរទស្សន៍ ទស្សនាវដ្ដី និងទីភ្នាក់ងារសារព័ត៌មាន ត្រូវតែពង្រឹងប្រព័ន្ធផ្សព្វផ្សាយសាធារណៈឱ្យក្លាយជាប្រព័ន្ធផ្សព្វផ្សាយជាតិមួយដែលមានទម្ងន់។
លោក នេត្រ ភក្ត្រា បញ្ជាក់ថា ក្រសួងព័ត៌មានក៏ជំរុញការផ្សព្វផ្សាយឌីជីថល តាមបណ្តាញសង្គមផងដែរ ខណៈបច្ចុប្បន្ននេះក្រសួងមានទាំង App វេបសាយ ក្រុមបណ្តាញទំនាក់ទំនងអេឡិចត្រូនិក តេឡេក្រាម រួមទាំងការផ្សាយដោយប្រើ អង់តែន និងការផ្សាយលើប្រព័ន្ធឌីជីថល។
លោកថ្លែងថា៖«ក្របខ័ណ្ឌនៃក្រសួងព័ត៌មានទៅមុខ យើងត្រូវតែកសាងទៅជាស្ថាប័នទំនាក់ទំនងសាធារណៈរបស់រដ្ឋាភិបាលមួយដែលមានបុរេសកម្ម អន្តរសកម្ម មានប្រសិទ្ធភាព និងគុណភាព។ អ៊ីចឹងឥឡូវនេះគឺយើងកំពុងជំរុញទៅលើកិច្ចការងារហ្នឹង ហើយមូលដ្ឋាននៃកិច្ចការងារយើងនេះ គឺធ្វើម៉េចទៅជាសំឡេងរដ្ឋាភិបាល ក្នុងការផ្តល់ព័ត៌មានទៅប្រជាពលរដ្ឋ»។
លោករដ្ឋមន្ត្រីក្រសួងព័ត៌មានលើកឡើងថា នៅក្នុងបរិបទឌីជីថល ការបង្កើតព័ត៌មានតាមបណ្តាញសង្គមមានភាពលឿនរហ័ស ប៉ុន្តែក៏មានព័ត៌មានក្លែងក្លាយច្រើនផងដែរ។ហេតុនេះ ទោះបីជាការផ្សព្វផ្សាយតាមបែបឌីជីថលលើបណ្តាញសង្គមបានលឿនយ៉ាងណាក៏ដោយ គេមិនអាចបោះចោលប្រព័ន្ធផ្សព្វផ្សាយ តាមបែបប្រពៃណីបានទេ ព្រោះប្រព័ន្ធផ្សព្វផ្សាយនេះជាប្រភពព័ត៌មានដែលទុកចិត្ត និងច្បាស់លាស់ យូរអង្វែងបើទោះមានលក្ខណៈយឺតបន្តិចក្ដី។
លោករដ្ឋមន្ត្រីក្រសួងព័ត៌មាន បានថ្លែងការអរគុណដល់កាសែតភ្នំពេញប៉ុស្តិ៍ដែលបានដើរតួនាទីសំខាន់ ក្នុងការផ្សព្វផ្សាយព័ត៌មានពីសង្គមកម្ពុជា ឱ្យជនបរទេសបានទទួលព័ត៌មានច្បាស់លាស់ពីកម្ពុជា ជាពិសេសការកសាងទិន្នន័យព័ត៌មានជាភាសាបរទេស ដែលតាមការកត់សម្គាល់ក្នុងរយៈពេលចុងក្រោយនេះ ទិន្នន័យព័ត៌មានកម្ពុជាបានរីកសាយភាយច្រើន ធ្វើឱ្យអន្តរជាតិបានមើលឃើញជាក់ស្តែងពីការអភិវឌ្ឍ និងភាពរីកចម្រើនសេដ្ឋកិច្ចក្នុងស្រុក ផ្ទុយពីមុនដែលកម្ពុជា ត្រូវគេមើលឃើញមានតែការផ្សព្វផ្សាយពីរបបប្រល័យពូជសាសន៍ខ្មែរក្រហម ការកាប់សម្លាប់ជាដើម។
លោកថ្លែងថា៖«ឥឡូវនេះកាលណាដែលយើងវាយពាក្យថា Cambodia គឺយើងអត់សូវឃើញចំណុចអវិជ្ជមានអីច្រើន ឬក៏និយាយពីទិដ្ឋភាពខ្មែរ ក្រហមនិយាយពីអីទៀតទេ តែគេនិយាយពី Economic growth គេនិយាយពីរឿង Tourist គេនិយាយពីរឿង Real estate គេនិយាយពីអ្វីៗទាំងអស់ ដែលជាការចូលរួមចំណែកយ៉ាងសំខាន់របស់ សារព័ត៌មានក្នុងការផ្សព្វផ្សាយអំពីកម្ពុជាពិត»។
ថ្លែងក្នុងជំនួបនោះ លោក សំ រិទ្ធ ប្រធានគ្រប់គ្រងការីនិពន្ធ លើកឡើងថា កាសែតភ្នំពេញ ប៉ុស្តិ៍ នៅតែប្រកាន់ គោលការណ៍ឯករាជ្យ ធ្វើការផ្សព្វផ្សាយព័ត៌មានពិត គ្រប់ជ្រុងជ្រោយ បន្តរក្សាជាកាសែតគំរូមួយដោយប្រកាន់ខ្ជាប់នូវក្រមសីលធម៌វិជ្ជាជីវៈ។
លោកថ្លែងថា៖«កាសែតភ្នំពេញប៉ុស្តិ៍នៅតែរក្សាជំហរ ឯករាជ្យ និងយកព័ត៌មានពិត ស៊ីជម្រៅ និងបន្តរក្សាជាកាសែតគំរូក្នុងការគោរពក្រមសីលធម៌វិជ្ជាជីវៈអ្នកសារព័ត៌មាន»៕
វីដេអូ៖
