លោក ឌិត ទីណា និងថ្នាក់ដឹកនាំក្រសួងកសិកម្មក្នុងជំនួបជាមួយក្រុមហ៊ុន Nishida Barley Processing។ រូប ក្រសួងកសិកម្ម
ភ្នំពេញៈ លោក ឌិត ទីណា រដ្ឋមន្ត្រីក្រសួងកសិកម្ម នៅក្នុងកិច្ចពិភាក្សាការងារជាមួយក្រុមហ៊ុន Nishida Barley Processing កាលពីថ្ងៃទី ១៩ កញ្ញា ឆ្នាំ ២០២៣ បានប្រាប់ក្រុមហ៊ុនថា បើក្រុមហ៊ុនចង់ជំរុញឱ្យកសិករដាំដុះដំណាំប្រភេទថ្មីលុះត្រាតែក្រុមហ៊ុនអាចធានាឱ្យបាននូវនិរន្តរភាពនៃទីផ្សារធំទូលំទូលាយ និងអាចផ្តល់ប្រាក់ចំណេញយូរអង្វែង។
ដំណាំថ្មីដែលក្រុមហ៊ុន Nishida Barley Processing មានគោលបំណងជំរុញឱ្យកសិករធ្វើការដាំដុះនោះគឺ «ដំណាំស្គួយ Barley» ដោយក្រុមហ៊ុនចង់ដាំដំណាំនេះ ដើម្បីធ្វើការកែច្នៃនាំចេញទៅប្រទេសជប៉ុន។ យោងតាមការប្រកាសឱ្យដឹងរបស់ក្រសួងកសិកម្ម លោករដ្ឋមន្ត្រីបានណែនាំថា អាទិភាពនៃការអភិវឌ្ឍកសិកម្មនៅកម្ពុជា គឺជំរុញកសិផលដែលមានសក្តានុពល និងមានទីផ្សារស្រាប់ ម្បីធ្វើឱ្យកសិករមានប្រាក់ចំណូល និងមានជីវភាពល្អ
ប្រសើរជាងមុន។
កម្ពុជាមានភាពខ្លាំងរបស់ខ្លួនលើដំណាក់កាល ផលិតកម្ម និងការដាំដុះនៃចង្វាក់ផលិតកម្ម តែនៅត្រូវការចាំបាច់ច្រើននូវការវិនិយោគលើការកែច្នៃដែលមានតម្លៃបន្ថែមខ្ពស់ ជាពិសេសសម្រាប់ទីផ្សារនាំចេញ។
លោកបានលើកឡើងថា៖ «បើចង់ជំរុញឱ្យកសិករដាំដុះដំណាំប្រភេទថ្មី ចាប់យកទីផ្សារថ្មី បង្កើតចង្វាក់ផលិតកម្មថ្មី លុះត្រាតែក្រុមហ៊ុនអាចធានាឱ្យបាននិរន្តរភាពនៃទីផ្សារធំទូលំទូលាយ និងអាចផ្តល់ប្រាក់ចំណេញយូរអង្វែង ទើបមានការចូលរួមពីកសិករ។ ទោះជាយ៉ាងណា ក្រសួងកសិកម្ម នៅតែផ្តល់ការសហការគាំទ្រ និងសិក្សាបន្តទៀតសម្រាប់ការវិនិយោគដំណាំកសិកម្មថ្មីៗនៅកម្ពុជា»។
លោក លឹម ហេង អនុប្រធានសភាពាណិជ្ជកម្មកម្ពុជាយល់ឃើញថា រាល់ការវិនិយោគលើវិស័យកសិកម្ម ជាពិសេសការដាំដុះដំណាំថ្មីៗ វិនិយោគិនគួរសិក្សាឱ្យបានច្បាស់លាស់ ពីតំបន់ដែលចង់ដាំដុះបញ្ហាទីផ្សារ និងបច្ចេកទេសជាដើម ដើម្បីកុំឱ្យនៅពេលដែលជំរុញឱ្យកសិករ ដាំដុះរួចហើយបែរជាគ្មានទីផ្សារទៅវិញ។ លោកបន្ថែមថា ដំណាំស្គួយ Barley នេះ មិនធ្លាប់មានការដាំដុះនៅកម្ពុជានោះទេពីមុនមក ដូចនេះបើសិនជាក្រុមហ៊ុនចង់ដាំដុះ ត្រូវមានបច្ចេកទេសឱ្យបានត្រឹមត្រូវ ជាពិសេសការបណ្តុះបណ្តាលដល់កសិករ។
លោកបានបញ្ជាក់ថា៖ «ដោយសារកម្ពុជា មានស្ថានភាពភូមិសាស្ត្រ ដីមានជីជាតិ និងមានអាកាសធាតុអំណោយ ទើបវិនិយោគិនបរទេស ចាប់អារម្មណ៍លើការដាំដុះដំណាំថ្មីៗ ដែលស័ក្តិសមនឹងអាកាសធាតុនៅកម្ពុជា។ តែខ្ញុំយល់ថា ក្រុមហ៊ុនក៏គួរសិក្សាឱ្យបានលម្អិត មុននឹងធ្វើការវិនិយោគផងដែរ។
យោងតាមគេហទំព័រសុខភាព Health line បានឱ្យដឹងថា Barley ជាប្រភេទស្មៅម្យ៉ាង ឬក៏គ្រាប់ធញ្ញជាតិដ៏សំខាន់មួយដែលត្រូវបានដាំដុះនៅក្នុងអាកាសធាតុក្តៅនៅទូទាំងពិភពលោក។ វាជាគ្រាប់ធញ្ញជាតិមួយក្នុងចំណោមគ្រាប់ធញ្ញតិដែលគេដាំដុះដំបូងគេ ជាពិសេសនៅតំបន់អឺរ៉ាសៀ តាំងពីរាប់ពាន់ឆ្នាំមុន។ គ្រាប់ធញ្ញជាតិ ប្រភេទនេះ ជាប្រភពនៃសារធាតុចិញ្ចឹមដែលល្អ សម្រាប់សុខភាព ដោយសារ barley មានជាតិសរសៃច្រើន ហើយអាចកាត់បន្ថយហានិភ័យនៃការវិវឌ្ឍទៅជាជំងឺទឹកនោមផ្អែម និងជំងឺធាត់៕
