លោក ហ៊ុន ម៉ាណែត ថ្លែងតាមរយៈវីដេអូអនឡាញ កាលពីថ្ងៃទី ២០ ខែកញ្ញា។ រូបថត STPM
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត បានថ្លែងថា វេទិកាកិច្ចសហប្រតិបត្តិការសន្តិសុខសាធារណសកល នឹងអាចប្រមូលផ្តុំនូវវិធានការសរុបឈានទៅដោះស្រាយបាននូវបញ្ហាប្រឈមនានាដែលជាក្តីបារម្ភរួមពាក់ព័ន្ធនឹងវិស័យសន្តិសុខក្នុងបុព្វហេតុរួមនៃសន្តិភាព ការអភិវឌ្ឍ និងវិបុលភាពសម្រាប់ប្រជាជាតិទាំងអស់។
កិច្ចសហប្រតិបត្តិការសន្តិសុខសាធារណសកល ក្រោមប្រធានបទ «ពិភពលោកមួយសន្តិសុខរួម» នារាជធានីភ្នំពេញ នៅថ្ងៃទី ២០ កញ្ញា ឆ្នាំ ២០២៣។ លោកលើកឡើងថា ក្នុងសន្និសីទប្រចាំឆ្នាំ ២០២៣ ស្តីពីវេទិកាកិច្ចសហប្រតិបត្តិការសន្តិសុខសាធារណសកលឆ្លុះបញ្ចាំងពីតថភាពនាពេលបច្ចុប្បន្ន និងចក្ខុវិស័យវែងឆ្ងាយនៃភាពចាំបាច់នៃកិច្ចសហប្រតិបត្តិការគ្រប់ជ្រុងជ្រោយប្រកបដោយចីរភាពដោយផ្តោតសំខាន់លើការថែរក្សាសន្តិសុខសកលសំដៅបង្កើតឡើងនូវកាលានុវត្តភាពនៃការវិវឌ្ឍ និងវិបុលភាពសង្គមសេដ្ឋកិច្ច សម្រាប់មនុស្សគ្រប់រូប។
លោក ហ៊ុន ម៉ាណែត មានប្រសាសន៍ថា៖ «ចក្ខុវិស័យវែងឆ្ងាយនេះ ក៏មានសង្គតិភាពទៅនឹងការប្តេជ្ញាចិត្តទាំងកម្រិតនយោបាយ និងកម្រិតបច្ចេកទេស នៃរាជរដ្ឋាភិបាលកម្ពុជា ដើម្បីលើកកម្ពស់កិច្ចសហប្រតិបត្តិការសន្តិសុខ ដើម្បីសន្តិភាព សុវត្ថិភាព ភាពសុខដុមរមនា និងការអភិវឌ្ឍនៅថ្នាក់ជាតិ តំបន់ និងអន្តរជាតិ»។ ក្នុងន័យនេះ រាជរដ្ឋាភិបាលកម្ពុជាត្រៀមខ្លួនរួចរាល់ដើម្បីចូលរួមដល់ការរៀបចំលិខិតតូបករណ៍ គោលនយោបាយពាក់ព័ន្ធនានាដើម្បីលើកកម្ពស់ការផ្សារភ្ជាប់ជិតស្និទ្ធរវាងកងកម្លាំងអនុវត្តច្បាប់ពីគ្រប់ភាគីពាក់ព័ន្ធទាំងអស់។
លោក ហ៊ុន ម៉ាណែត បញ្ជាក់ថា៖ «រាជរដ្ឋាភិបាលកម្ពុជា ជឿជាក់ថា ជាមួយនឹងកិច្ចសហប្រតិបត្តិការនេះយើងនឹងអាចប្រមូលផ្តុំវិធានការសរុបឈានទៅដោះស្រាយបានបញ្ហាប្រឈមនានាដែលជាក្តីបារម្ភរួមពាក់ព័ន្ធនឹងវិស័យសន្តិសុខក្នុងបុព្វហេតុរួមនៃសន្តិភាព ការអភិវឌ្ឍ និងវិបុលភាពសម្រាប់ប្រជាជាតិទាំងអស់»។
លោកបន្តថា៖ «ខ្ញុំជឿជាក់ថា កិច្ចពិភាក្សាលម្អិតគ្រប់ជ្រុងជ្រោយ និងការផ្លាស់ប្តូរបទពិសោធន៍ល្អៗរវាងអង្គសន្និសីទទាំងមូលលើបញ្ហាសំខាន់ៗទាំងនេះ នឹងអាចរកឃើញវិធានគន្លឹះចាំបាច់មួយចំនួនបន្ថែមទៀតដែលបម្រើដល់ឧត្តមប្រយោជន៍នៃកិច្ចការថែរក្សាសន្តិសុខ សុវត្ថិភាពជូនប្រជាពលរដ្ឋនៃបណ្ដាប្រទេសនានា និងសន្តិសុខសកលជាក់ជាមិនខាន»។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជា បានថ្លែងថា លោកគាំទ្រវេទិកានេះដែលធ្វើឱ្យប្រទេសនីមួយៗដែលចូលរួមអាចបង្ហាញពីទស្សនៈនយោបាយរបស់ខ្លួនដើម្បីបង្ហាញពីកង្វល់លើកិច្ចការសន្តិសុខសាធារណៈសកលដែលកំពុងតែមានបញ្ហាប្រឈម។ លោកបន្តថា មួយវិញទៀតរដ្ឋនីមួយៗអាចទាញបាននូវធាតុចូលរបស់ខ្លួនពីចំណែកនៃការចូលរួមនេះ។
លោកលើកឡើងថា៖ «នេះជាអ្វីដែលយើងមើលឃើញថា គុណប្រយោជន៍នៃរដ្ឋភាគីដែលចូលរួម តែការអនុវត្តបានឬមិនបាននោះគឺជារឿងមួយទៀត ព្រោះបញ្ហាសន្តិសុខសកលនេះ កើតឡើងដោយសារការប្រជែងឥទ្ធិពលមហាអំណាច ការប្រជែងឥទ្ធិពលភូមិសាស្ត្រនយោបាយរបស់មហាអំណាច»។
សូមបញ្ជាក់ថា វេទិកាកិច្ចសហប្រតិបត្តិការសន្តិសុខសាធារណៈសកលនេះបានធ្វើឡើងចាប់តាំងពីឆ្នាំ ២០១៥ មក៕
.jpg)
