សកម្មភាពអ្នកជំនាញថែរក្សាអនាម័យត្រីងៀត។ រូបថត Yousos Apdoulrashim
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ និងអង្គការ UNIDO កំពុងសម្របសម្រួលស្នើសុំឱ្យអគ្គនាយកដ្ឋានសុខភាព និងសុវត្ថិភាពម្ហូបអាហាររបស់សហភាពអឺរ៉ុប ចុះមកវាយតម្លៃប្រព័ន្ធសុវត្ថិភាពម្ហូបអាហាររបស់ប្រទេសកម្ពុជា នៅឆ្នាំ២០២៤ ខណៈដើមខែក្រោយ UNIDO នឹងនាំសហគ្រាសមានសក្ដានុពល ចំនួន៤ទៅផ្គូផ្គងអាជីវកម្មជាមួយអ្នកទិញនៅប្រទេសបារាំង។
លោក សេតធីស៊ី ថារ៉ាម៉ា ថមបាធូ ប្រធានទីប្រឹក្សាបច្ចេកទេសអង្គការយូនីដូ UNIDO បានឱ្យដឹងថា តាមរយៈគម្រោង CAPFish-Capture ដែលអនុវត្តដោយរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ជាមួយអង្គការ UNIDO បានធ្វើការងារយ៉ាងជិតស្និទ្ធជាមួយ អគ្គនាយករដ្ឋានសុខភាព និងសុវត្ថិភាពម្ហូបអាហាររបស់សហភាពអឺរ៉ុប។ លោកបន្តថា ភាគីពាក់ព័ន្ធទាំងអស់បានធ្វើការប្រជុំជាច្រើនដងមកហើយ ដើម្បីសម្របសម្រួលអញ្ជើញខាងអគ្គនាយកដ្ឋានសុខភាព និងសុវត្ថិភាពម្ហូបអហារ របស់សហភាពអឺរ៉ុប ចុះមកវាយតម្លៃប្រព័ន្ធសុវត្ថិភាពម្ហូបអាហារ នៅក្នុងប្រទេសកម្ពុជានៅឆ្នាំ២០២៤ខាងមុខ។
លោកបន្តថា ទន្ទឹមនោះអង្គការ UNIDO និងក្រសួងកសិកម្ម ក៏បានជួយដល់សហគ្រាស ដែលមានសក្ដានុពលសម្រាប់នាំចេញផលិតផលជលផលទៅកាន់ទីផ្សារអឺរ៉ុបផងដែរ។ ក្នុងនោះ UNIDO បានអញ្ជើញម្ចាស់សហគ្រាសចំនួន៤ទៅចូលរួមការផ្គូផ្គងអាជីវកម្មនៅទីក្រុងប៉ារីស ប្រទេសបារាំងដែលធ្វើឡើងនៅថ្ងៃទី៣ ខែតុលាខាងមុខនេះ ដោយចេញដំណើរថ្ងៃទី៣០ ខែកញ្ញា ឆ្នាំ២០២៣។
លោកបន្ថែមថា អង្គការ UNIDO កំពុងជំរុញផលិតផលដែលមានសក្ដានុពលមកពី៤សហគ្រាស រួមមានសហគ្រាសទឹកត្រីលាង ឡេង សហគ្រាស Home Taste Food សហគ្រាស Cambodia Fresh Farm និងក្រុមហ៊ុន Confirel ដែលមានផែនការ កែច្នៃប្រហុកសម្រាប់នាំចេញទៅទីផ្សារអឺរ៉ុប។
បើតាមលោក សេតធីស៊ី ថារ៉ាម៉ា ថមបាធូ ការនាំម្ចាស់សហគ្រាស ដែលមានផលិតផលជលផលក្រោយប្រមូលផលទៅទីក្រុងប៉ារីសគឺដើម្បីផ្គូផ្គងអាជីវកម្ម ជាមួយអ្នកទិញ ដើម្បីឱ្យពួកគេមានការស្វែងយល់គ្នាជាបណ្តើរ ហើយនៅពេលដែលការវាយតម្លៃជាប់បាននាំចេញ កម្ពុជា នឹងនាំចេញផលិតផលមកពីសហគ្រាសទាំង៤នោះមុនគេ។
លោកថ្លែងថា៖«យើងមានការសហការគ្នាគ្រប់ភាគីទាំងអស់ ទាំងអាជ្ញាធរមានសមត្ថកិច្ច រដ្ឋបាលជលផល ខាងគម្រោង ហើយខាងសហគ្រាសរបស់យើង ក៏បានយកចិត្តទុកដាក់ អ៊ីចឹងយើង គិតថា នឹងអាចទៅដល់ទិសដៅរបស់យើង ដោយអាចនាំចេញផលិតផលជលផលទៅកាន់ទីផ្សារអឺរ៉ុបនៅថ្ងៃអនាគតបាន»។
លោកបញ្ជាក់ថា នៅពេលអគ្គនាយកដ្ឋានសុខភាព និងសុវត្ថិភាពម្ហូបអាហាររបស់សហភាពអឺរ៉ុបចុះមកវាយតម្លៃ ប្រព័ន្ធសុវត្ថិភាព ម្ហូបអាហារនៅប្រទេសកម្ពុជា គេនឹងពិនិត្យមើលលើរចនាសម្ព័ន្ធ របស់អាជ្ញាធរមានសមត្ថកិច្ច និងមើលទៅលើសហគ្រាសកែច្នៃ ផលិតផល។
លោក លាង ឡេង ម្ចាស់សហគ្រាស លាង ឡេង បានឱ្យដឹងថា មានអ្នកទិញ១នៅសហរដ្ឋអាមេរិកមានតម្រូវការផលិតផល លាង ឡេងយ៉ាងច្រើន ប៉ុន្តែសហគ្រាសមិនមានសមត្ថភាពក្នុងការផលិតជូន ព្រោះការបញ្ជាទិញប្រើកុងត្រាធំរហូតដល់១ខែត្រូវការផលិតផល៤០ទូកុងតឺន័រ ជាចំនួនដ៏ច្រើន ខណៈលាងឡេងមានសមត្ថភាពផលិតបានតែប្រមាណ១០ទូប៉ុណ្ណោះ។
យ៉ាងណា លាង ឡេង មានអតិថិជន២ផ្សេងទៀតគ្រោងនឹងទិញ ដោយមិនតម្រូវការឱ្យមានកុងត្រាធំៗ បែបនោះទេ ហេតុនេះ លាង ឡេង អាចធ្វើការលក់ចេញបាន។ លោកបន្តថា នៅពេលសហគ្រាសមានដើមទុនគ្រប់គ្រាន់ក្នុងការផលិតបន្ថែមទៀត លោកនឹងធ្វើការពង្រឹងនិងពង្រីកសក្ដានុពលនាំចេញ ដើម្បីចាប់យកដៃគូធំៗ នៅលើទីផ្សារអន្តរជាតិថែមទៀតជាពិសេសនៅសហភាពអឺរ៉ុប និងអាមេរិក។
លោកថ្លែងថា៖«ដើមទុនរបស់ក្រុមហ៊ុននៅមានកម្រិត ដូច្នេះធ្វើឱ្យការអនុវត្តជំហានគីង្គក់ របស់យើងនៅតែបន្ត ហើយនៅពេលដែលមានលុយគឺយើងដឹងថាត្រូវធ្វើបែបណា យើងមានMaster plan ច្បាស់លាស់។ សហគមន៍អឺរ៉ុប និងអាមេរិកជាទីផ្សារដ៏ល្អ នៅពេលដែលយើងគ្រប់គ្រងបានទីផ្សារ២នេះនោះប្រទេសផ្សេងៗ យើងងាយនាំចេញបានស្រួលមែនទែន»។
យ៉ាងណាក៏ដោយ លោកបានលើកឡើងថា នៅមានបញ្ហាប្រឈមមួយចំនួន ពាក់ព័ន្ធនឹងការទិញត្រីយកទៅរក្សាទុកដោយចំណាយដើមទុនច្រើន ព្រោះត្រូវទិញឆ្នាំនេះ ផលិតលក់នៅឆ្នាំក្រោយ បើសិនជាមានការលក់ត្រីដែលជាវត្ថុធាតុដើមសម្រាប់ការផលិតមានជារៀងរាល់ខែនោះ អាចនឹងជួយកាត់បន្ថយថ្លៃដើមបានច្រើន។ ស្រដៀងគ្នានេះដែរ សហគ្រាសកែច្នៃផលិតផលត្រីងៀត មួយចំនួនផ្សេងទៀត ក៏បានលើកឡើងថា ត្រីដែលសហគ្រាស ប្រមូលទិញយកមកធ្វើការកែច្នៃមួយចំនួននៅតែមានបញ្ហាខ្វះសុវត្ថិភាព។
កញ្ញា អុឹម រចនា អ្នកនាំពាក្យក្រសួងកសិកម្ម ថ្លែងថា ចំពោះបញ្ហាប្រឈមនេះ ក្រសួងកសិកម្មកំពុងធ្វើការដោះស្រាយ និងកំពុងពិនិត្យមើលលទ្ធភាព ស្វែងរកអ្នកវិនិយោគមកធ្វើការចិញ្ចឹមត្រីដែលមានស្តង់ដាត្រឹមត្រូវ ដោយមិនប្រើប្រាស់នូវសារធាតុគីមី ឬចំណីអាហារដែលលាយជាមួយសារធាតុគីមីមិនត្រឹមត្រូវ ដែលសារធាតុទាំងនោះអាចបង្កហានិភ័យ សម្រាប់អ្នកប្រើប្រាស់។
កញ្ញាថ្លែងថា៖«យើងព្យាយាមទាក់ទងវិនិយោគិនបន្ថែមទៀត ដើម្បីធ្វើម៉េច បង្កើតជាកសិដ្ឋាន ឬកន្លែងចិញ្ចឹមត្រី១មានលក្ខណៈស្តង់ដាតែម្តងដើម្បីផ្គត់ផ្គង់ ដល់សហគ្រាសទាំងអស់នេះ ហើយយើងធានាបានថា ត្រីទាំងអស់នោះមានគុណភាព មានសុវត្ថិភាពតាំងពីដើមទីដំបូងតែម្តង ហើយនៅពេលដែលយកមកកែច្នៃ វាបន្ថែមគុណភាព និងរសជាតិ១កម្រិតទៀត»៕
