ក្រុមអ្នកជំនាញខាងវិស័យសុខាភិបាលថតរូបអនុស្សាវរីយ៍ អំឡុងពេលចូលរួមសន្និសីទ។ រូបថត ក្រសួងសុខាភិបាល
ភ្នំពេញៈ ក្រសួងសុខាភិបាល ណែនាំឱ្យភ្នាក់ងារសុខាភិបាលបង្កើនការអប់រំដល់ស្ត្រីមានផ្ទៃពោះអំពីកត្តាប្រឈម តាំងពីពេលមកពិនិត្យផ្ទៃពោះលើកដំបូង ដើម្បីវាយតម្លៃភាពធ្ងន់ធ្ងរនៃកត្តាប្រឈមឱ្យបានទាន់ពេលវេលា ហើយភ្នាក់ងារសុខាភិបាលត្រូវសម្រេចចិត្តរៀបចំបញ្ជូនម្តាយ ឬម្តាយជាមួយទារក ឱ្យបានទាន់ពេលវេលា និងសមស្របបំផុតសម្រាប់ការជួយអាយុជីវិត ទាំងម្តាយ និងទារក ឱ្យកាន់តែប្រសើរ។
ការណែនាំនេះ បានធ្វើឡើងក្នុងឱកាសសមាគមគ្រូពេទ្យទារកកម្ពុជា បានរៀបចំទិវាសន្និសីទលើកទី៦ ក្រោមប្រធានបទ« ការថែទាំសុខភាពទារកជុំវិញកំណើតចំពោះស្ត្រីមានផ្ទៃពោះដែលមានការប្រឈមខ្ពស់ និងការថែទាំទារកតាមរបៀបម្តាយកង់ហ្គារ៉ូ» កាលពីថ្ងៃទី២៣ ខែកញ្ញា នៅខេត្តសៀមរាប។
សន្និសីទនេះ មានការចូលរួមពីថ្នាក់ដឹកនាំក្រសួង និងអ្នកជំនាញវិស័យសុខាភិបាលមកពីបណ្ដាខេត្ត-រាជធានីប្រមាណជាង ២០០ នាក់។ យោងតាមសេចក្ដីប្រកាសរបស់ក្រសួងសុខាភិបាល។
ក្រសួងសុខាភិបាល បានបញ្ជាក់ថា៖«សន្និសីទត្រូវបានបិទបញ្ចប់ដោយផ្លែផ្កាជាមួយការផ្តាំផ្ញើ ដោយយកចំណេះដឹង ទៅអនុវត្តនៅកន្លែងរបស់ខ្លួន ចូលរួមចំណែកយ៉ាងមុតមាំក្នុងការកាត់បន្ថយអត្រាមរណភាព អត្រាផលវិបាកផ្សេងៗ និងបង្កើនការអប់រំបងប្អូនស្ត្រីមានផ្ទៃពោះអំពីកត្តាប្រឈម តាំងពីពេលមកពិនិត្យផ្ទៃពោះលើកដំបូង ការវាយតម្លៃភាពធ្ងន់ធ្ងរនៃកត្តាប្រឈម ឱ្យបានទាន់ពេលវេលា»។
ក្រសួង បានបន្ថែមថា ការចូលរួមនោះ គឺសំដៅការធ្វើការសម្រេចចិត្តរៀបចំបញ្ជូនម្តាយ ឬម្តាយជាមួយទារក (តាមទំនាក់ទំនងគ្នាល្អជាក្រុមនៃគ្រូពេទ្យថែទាំព្យាបាល) ឱ្យបានទាន់ពេលវេលា និងសមស្របបំផុត សម្រាប់ការជួយអាយុជីវិត ទាំងម្តាយនិងទារកឱ្យបានកាន់តែប្រសើរ។
លោកស្រី អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល ទទួលបន្ទុកផ្នែកសុខុមាលភាពមាតា ទារក និងកុមារ និងជាប្រធានសមាគមគ្រូពេទ្យទារកកម្ពុជាបានថ្លែងថា សមាគមគ្រូពេទ្យទារកកម្ពុជា បានខិតខំរៀបចំសន្និសីទ នេះជារៀងរាល់ឆ្នាំ គឺដើម្បីជាការចែករំលែកមួយដ៏ថ្លៃថ្លាក្នុងការចូលរួមពង្រឺង និងលើកកម្ពស់សមត្ថភាពថែទាំ ព្យាបាលសុខភាពមាតា ទារក និងកុមារ ដែលរាជរដ្ឋាភិបាល បានកំណត់វិស័យសុខាភិបាល ជាអាទិភាពចម្បង សម្រាប់ការខិតខំធ្វើឱ្យកាន់តែប្រសើរអំពីសុខុមាលភាពរបស់ប្រជាពលរដ្ឋ។
លោកស្រី បានបញ្ជាក់ថា៖«ពាំនាំការផ្ដាំផ្ញើប្រសាសន៍ដ៏ថ្លៃថ្លារបស់ឯកឧត្តមសាស្ត្រាចារ្យរដ្ឋមន្ត្រី ដែលជំរុញឱ្យថ្នាក់ដឹកនាំ មន្ត្រីបុគ្គលិកសុខាភិបាល ត្រូវមានស្មារតីរួបរួមគ្នា បំពេញការងារប្រកបដោយវិជ្ជាជីវ: លើកកម្ពស់គុណភាពសេវាសុខាភិបាល ស្វែងយល់ពីបញ្ហាប្រឈម និងត្រូវដោះស្រាយឱ្យទាន់ពេលវេលា និងសមស្របបំផុត»។
កាលពីឆ្នាំ២០២២ សមាគមគ្រូពេទ្យទារកកម្ពុជា បានបើកសន្និសីទលើកទី៥ ក្រោមប្រធានបទ «ការថែទាំសុខភាពទារកជុំវិញសម្រាល» ដើម្បីរួមគ្នាធ្វើការជាក្រុម អាចជួយកាត់បន្ថយអត្រាមរណភាពទារកឱ្យកាន់តែមានប្រសិទ្ធភាពបន្តិចម្ដងៗ តាមរយៈការផ្សព្វផ្សាយចំណេះដឹងបន្ថែម ក៏ដូចជាការបណ្តុះបណ្តាលទាក់ទងទៅនឹង ការថែទាំសុខភាពមាតាពេលមានផ្ទៃពោះ ការថែទាំពេលសម្រាល និងការថែទាំទារកក្រោយពេលសម្រាល។
យោងតាមលទ្ធផលបឋមនៃការអង្កេតប្រជាសាស្ត្រ និងសុខភាពកម្ពុជា ឆ្នាំ២០២១-២០២២ ប្រៀបធៀបនឹងលទ្ធផលនៃការអង្កេតប្រជាសាស្ត្រ និងសុខភាពកម្ពុជា ឆ្នាំ២០១៤ អត្រាមរណភាពមាតា ទារក និងកុមារនៅប្រទេសកម្ពុជា មានការថយចុះច្រើនគួរឱ្យកត់សម្គាល់។
សូចនាករស្នូលនៃការអង្កេតប្រជាសាស្ត្រ និងសុខភាពកម្ពុជាថ្មីៗនេះ បានបង្ហាញថា អត្រាមរណភាពមាតាបានថយចុះពី ១៧០នាក់ មកនៅ ១៥៤នាក់ នៅឆ្នាំ២០១៤ ក្នុងចំណោមទារកកើតរស់១០០ ០០០ នាក់ នៅឆ្នាំ២០២១-២០២២។
របាយការណ៍បញ្ជាក់ថា៖ «ការប៉ាន់ស្មាននៃអនុបាទមរណភាពមាតា (MMR) រវាងឆ្នាំ២០១៤ ដល់ ឆ្នាំ២០២១-២០២២ មាន ១៥៤នាក់ ក្នុងចំណោម១០០ ០០០កំណើតរស់ មានន័យថា ០,០០៤ នៃមាតាប្រឈមនឹងការស្លាប់ពេញ ១ជីវិត ឬអាចនិយាយបានថា ស្ត្រីមាន ៤នាក់ក្នុងចំណោមស្ត្រី ១ ០០០ នាក់ជាមរណភាពមាតា»។
ការថែទាំសុខភាពមាតាបានត្រឹមត្រូវអំឡុងពេលមានផ្ទៃពោះ និងពេលសម្រាល មានសារៈសំខាន់ សម្រាប់សុខភាពម្តាយ និងទារក និងកាត់បន្ថយ ការមានជំងឺ និងហានិភ័យមរណភាពមាតា និងកុមារអំឡុងពេលមានផ្ទៃពោះ ពេលសម្រាល និងក្រោយពេលសម្រាល។ នេះបើតាមការអះអាងរបស់ក្រសួងសុខាភិបាលនៅក្នុងការអង្កេត។
ក្រសួង បានបញ្ជាក់ថា៖ «ស្ត្រីស្ទើរតែទាំងអស់ជិត ៩៩% បានទទួលការថែទាំផ្ទៃពោះ មុនសម្រាលពីគ្រូពេទ្យជំនាញដែលបានផ្តល់កំណើតរស់ និង/ឬកូនស្លាប់កើតក្នុងរយៈពេល ២ឆ្នាំមុនអង្កេត។ ជារួមប្រមាណជា ៨៦% នៃស្ត្រីដែលបានទទួលការថែទាំផ្ទៃពោះមុនសម្រាលចំនួន ៤ដង ឬច្រើនដង សម្រាប់កំណើតរស់ ឬកូនស្លាប់កើតថ្មីៗបំផុត ហើយប្រមាណជា ៩៨% នៃស្ត្រីដែលបានលេបថ្នាំជាតិដែកជំនួយក្នុងអំឡុងពេលមានផ្ទៃពោះថ្មីៗបំផុត»។
បើតាមលទ្ធផលបឋមនៃការអង្កេតប្រជាសាស្ត្រ និងសុខភាពកម្ពុជានេះ ភាគរយស្ត្រីបានទទួលការថែទាំផ្ទៃពោះ សម្រាប់កំណើតរស់ ឬកូនស្លាប់កើតថ្មីៗបំផុត ២ឆ្នាំ មុនអង្កេតបានកើនឡើង ពី៣៩% នៅឆ្នាំ២០០០ ដល់ ៩៩% ក្នុងឆ្នាំ ២០២១-២០២២។ ភាគរយស្ត្រីដែលបានទទួលការថែទាំផ្ទៃពោះមុនសម្រាលចំនួន ៤ដង ឬច្រើនដងបានកើនឡើងពី ៩% នៅឆ្នាំ២០០០ ដល់ ៨៦% ក្នុងឆ្នាំ២០២១-២០២២៕
