ក្រុមសិល្បករកម្ពុជា ដែលបានចូលរួមតាំងពិព័រណ៍ជីវចម្រុះអាស៊ានប្រភេទ 3D ។ រូបថត សហការី
ភ្នំពេញ:ពិភពសិល្បៈនិងការអភិរក្សត្រូវបានច្របាច់បញ្ចូលគ្នានៅក្នុងការតាំងពិព័រណ៍អនឡាញប្រភេទ3Dដែលហាក់នាំអារម្មណ៍អ្នកទស្សនាទៅកាន់សាលសារមន្ទីរពិតៗ។នៅក្នុងសារមន្ទីរអនឡាញនេះ បង្ហាញពីស្នាដៃរបស់សិល្បករវ័យក្មេង ២០រូបតំណាងឱ្យរដ្ឋសមាជិកអាស៊ាន។
សិល្បករត្រូវបានជ្រើសរើសដោយមជ្ឈមណ្ឌលអាស៊ានសម្រាប់ជីវចម្រុះ(ACB)ដើម្បីចូលរួមក្នុងកម្មវិធីរងស្ដីពីអ្នកនិទានរឿងអាស៊ានវ័យក្មេង(YAS) ជាផ្នែកមួយនៃកម្មវិធីជីវចម្រុះអាស៊ាន-សហភាពអឺរ៉ុប (AYBP)។
សិល្បករទាំងនេះដែលមានសាវតារខុសៗគ្នា ប្រើប្រាស់ប្រព័ន្ធផ្សព្វផ្សាយ និងឧបករណ៍ជាច្រើន រួមទាំងការថតរូប ភាពយន្ត គំនូរ ការតម្បាញ ថតសំឡេង ផតឃែស្ថ ការនិទានរឿងទម្រង់វែង កំណាព្យ និងការសម្តែងជារូបភាព ដើម្បីបង្ហាញរឿងរ៉ាវអំពីឧទ្យានបេតិកភណ្ឌអាស៊ាន។
លោក Marcial Amaro, Jr. ជំនួយការលេខាធិការ DENR ទទួលបន្ទុកគោលនយោបាយផែនការសេស និងគម្រោងជំនួយបរទេសនិងជានាយកការិយាល័យគ្រប់គ្រងជីវចម្រុះបានកោតសរសើរចំពោះអ្នកនិទានរឿង
អាស៊ានវ័យក្មេងទាំងនោះ។
លោកបានឱ្យដឹងថា រឿងរ៉ាវអភិរក្សដែលត្រូវបានចងក្រងឡើងតាមរយៈមធ្យោបាយផ្សេងៗ ដូចជា ការថតរូប ការសរសេរ ការនិយាយជាសាធារណៈ ការថតវីដេអូ ឬប្រព័ន្ធផ្សព្វផ្សាយសង្គម មានឥទ្ធិពលយ៉ាងសំខាន់ក្នុងការលើកកម្ពស់បេតិកភណ្ឌធម្មជាតិ និងវប្បធម៌នៃតំបន់របស់ពួកគេ។
លោកAmaro បានថ្លែងថា៖«អ្នកមានវេទិកាដ៏មានឥទ្ធិពលដែលអាចបង្កើនការយល់ដឹងនិងផ្លាស់ប្តូរសកម្មភាពនៃទស្សនិកជនផ្សេងៗដើម្បីការពារធម្មជាតិ»។
ដោយមានការគាំទ្រពីមជ្ឈមណ្ឌលអាស៊ានសម្រាប់ជីវចម្រុះ(ACB) ប្រទេសអាល្លឺម៉ង់និងសហភាពអឺរ៉ុប ការតាំងពិព័រណ៍នេះបម្រើជាសក្ខីភាពមួយចំពោះសមត្ថភាពច្នៃប្រឌិតរបស់យុវជនក្នុងតំបន់អាស៊ាននិងការយកចិត្តទុកដាក់របស់ពួកគេក្នុងការអភិរក្សបេតិកភណ្ឌធម្មជាតិ និងវប្បធម៌។
អ្នកនិទានរឿងដ៏ប៉ិនប្រសប់ទាំង១០នាក់នាពេលថ្មីៗនេះបានបង្ហាញស្នាដៃរបស់ពួកគេនៅឯវេទិកាវីរបុរសជីវចម្រុះអាស៊ាន (ABH) នៅទីក្រុងម៉ានីល ប្រទេសហ្វីលីពីន។
លោកស្រី ថេរេសា មុនឌី អេស លីម នាយកប្រតិបត្តិនៃ ACB បានសង្កត់ធ្ងន់លើតួនាទីសំខាន់របស់យុវជនអាស៊ានក្នុងការកសាងអនាគតដ៏រឹងមាំ និងនិរន្តរភាព។ លោកស្រីបានឱ្យដឹងថា យុវជនអាស៊ានដែលមានអាយុពី ១៥ ទៅ ៣៥ឆ្នាំ មានចំនួនជាង ៣៣ភាគរយ នៃប្រជាជនក្នុងតំបន់។
លោកស្រី បានកត់សម្គាល់ថា៖ «យុវជនដែលមានអំណាចទាំងនេះប្រើសំឡេង និងវេទិការបស់ពួកគេដើម្បីតស៊ូមតិសម្រាប់ការការពារបរិស្ថាន។យើងមានគោលបំណងលើកទឹកចិត្តអ្នកទំនាក់ទំនងវ័យក្មេង អ្នកនិទានរឿង អ្នកបង្កើតមាតិកា អ្នកកាសែត និងអ្នកនិពន្ធប្រកបដោយភាពច្នៃប្រឌិតដើម្បីជួយផ្សព្វផ្សាយកិច្ចការអភិរក្សជីវចម្រុះបន្ដ»។
ក្នុងនោះមានសិល្បករខ្មែរដ៏ឆ្នើមលោក សេង រដ្ឋា ដែលគម្រោង «ឋានសួគ៌សម្រាប់ជីវចម្រុះ ឧទ្យានជាតិវីរជ័យ» បានទាក់ទាញទស្សនិកជន និងជាគំរូពីអំណាចសិល្បៈក្នុងការបង្ហាញសារអេកូឡូស៊ី។
ឧទ្យានជាតិវីរជ័យ ដែលគ្របដណ្តប់លើផ្ទៃដីទំហំ ៣៣ ២៥០០ហិកតា និងបានចុះបញ្ជីជាឧទ្យានបេតិកភណ្ឌអាស៊ាន ជាឧទ្យានជាតិដ៏ពិសេសមួយនៅក្នុងជីវចម្រុះរបស់កម្ពុជា។
សិល្បៈរបស់លោក រដ្ឋា បានបង្ហាញទេសភាពយ៉ាងស្រស់ស្អាតនៃរុក្ខជាតិនិងសត្វដ៏សម្បូរបែបរបស់ឧទ្យាន ខណៈកំពុងតស៊ូមតិដើម្បីការពារវា។
ជីវចម្រុះ គឺជាពាក្យដែលតំណាងឱ្យភាពចម្រុះនៃជីវិតទាំងអស់នៅលើផែនដី ។នេះបើយោងតាមការរៀបរាប់របស់ រដ្ឋា ដែលនិយាយអំពីភាពយន្តឯកសាររបស់គាត់។
លោកបានឱ្យដឹងថា ជីវចម្រុះគឺជាពាក្យតំណាងឱ្យភាពចម្រុះគ្នានៃជីវិតទាំងអស់នៅលើផែនដី។នេះជាពាក្យសង្ខេបយ៉ាងខ្លី តែក្ដោបន័យយ៉ាងទូលំទូលាយ។ វាតំណាងឱ្យទីជម្រករាប់ពាន់ តំណាងឱ្យជីវិតផ្សេងគ្នារាប់លាន និងរូបរាងនៃភាវរស់ផ្សេងគ្នារាប់កោដិ ស្ថិតនៅក្នុងទីកន្លែងផ្សេងគ្នានៅលើសកលលោក។
លោក រដ្ឋា បាននិយាយនៅក្នុងវីដេអូរបស់លោកថា៖ «ឧទ្យានជាតិវីរជ័យចុះបញ្ជីដោយព្រះរាជក្រឹត្យចុះថ្ងៃទី១ ខែវិច្ឆិកា ឆ្នាំ១៩៩៣ គឺជាឧទ្យានជាតិមួយក្នុងចំណោមឧទ្យានជាតិចំនួន២ដែលមានឧទ្យានជាតិភ្នំបូកគោ ដែលត្រូវបានចុះបញ្ជីជាឧទ្យានបេតិកភណ្ឌអាស៊ាន នៅថ្ងៃទី១៨ ខែធ្នូ ឆ្នាំ២០០៣»។
នៅខាងឆ្វេង ប៉ាណូ 3D «អំពីឧទ្យានបេតិកភណ្ឌអាស៊ាន(AHP)»ណែនាំពីសារៈសំខាន់នៃកំណប់អេកូឡូស៊ីទាំងនេះ។ នៅខាងស្តាំ អ្នកទស្សនាអាចស្វែងយល់ពីប្រវត្តិសង្ខេបរបស់សិល្បករអាស៊ានវ័យក្មេងទាំង២០នាក់ ដែលម្នាក់ៗបង្ហាញពីទេពកោសល្យច្នៃប្រឌិតក្នុងតំបន់។
នៅពេលដែលអ្នកទស្សនាស្វែងយល់កាន់តែស៊ីជម្រៅទៅក្នុងពិព័រណ៍នោះ ពួកគេបានមើលឃើញស្នាដៃចម្រុះរបស់សិល្បករ ដូចជា លោក រដ្ឋា ដែលស្ថិតនៅលំដាប់ទី២ ទៅតាមលេខរៀងនៃអក្ខរក្រមប្រទេស។
ការតាំងពិព័រណ៍នេះបានបញ្ចប់ដោយផ្នែក«អំពីមជ្ឈមណ្ឌលអាស៊ានសម្រាប់ជីវចម្រុះ(ACB)»និង«អរគុណពិសេស»ដ៏ស្មោះស្ម័គ្រដែលផ្តល់ឱ្យអ្នកទស្សនាបានដឹងអំពីគុណតម្លៃជីវចម្រុះដ៏សម្បូរបែបរបស់អាស៊ាននិងសិល្បករដែលលើកកម្ពស់បុព្វហេតុរបស់វា។
តាមរយៈការចូលរួមរបស់គាត់ក្នុងការតាំងពិព័រណ៍ ABH Forum 3D លោក រដ្ឋា ផ្តល់ឱកាសឱ្យទស្សនិកជនទូទាំងពិភពលោកពេញចិត្តចំពោះសម្រស់ធម្មជាតិរបស់ប្រទេសកម្ពុជានិងភាពបន្ទាន់នៃការអភិរក្សវាសម្រាប់មនុស្សជំនាន់ក្រោយ។
អ្នកស្រី សេលីន មូរីលឡូ មកពី YAS ប្រទេសហ្វីលីពីន បានថ្លែងថា វេទិកា ABH គឺជាបទពិសោធន៍ដ៏អស្ចារ្យដើម្បីចែករំលែករឿងរ៉ាវប្លែកៗរបស់ពួកគេ ធ្វើការទាក់ទង និងរៀនពី ABH ក៏ដូចជានិស្សិតចូលរួម។
អ្នកស្រីបានឱ្យដឹងថា៖«ពីមហាសមុទ្រដល់ភ្នំ ពីផ្សិតរហូតដល់មេហ្គាហ្វាណា ជីវិតរបស់យើងពឹងផ្អែកលើជីវចម្រុះ។យើងមិនដាច់ដោយឡែកពីធម្មជាតិទេ ហើយវាសំខាន់ណាស់ក្នុងការតស៊ូមតិដើម្បីអភិរក្សធម្មជាតិ ព្រោះវាមានន័យថា តស៊ូមតិដើម្បីជីវិតរបស់យើងផ្ទាល់។នេះជាមូលហេតុដែលខ្ញុំលើកទឹកចិត្តអ្នកប្រាស្រ័យទាក់ទងនាពេលអនាគតដើម្បីលើកកម្ពស់ និងបញ្ជ្រាបជីវចម្រុះ»។
ដើម្បីស្វែងយល់បន្ថែមអំពីកម្មវិធីYAS សូមចូលទៅកាន់(https://aybp.aseanbiodiversity.org/yas/) និងទស្សនាពិព័រណ៍ 3D តាមតំណភ្ជាប់នេះ https://stories.aseanbiodiversity.org/៕
