រូបភាពបង្ហាញពី«សេនាគុនខ្មែរយ័ន្ត ៨ ទិស»។ រូបភាព Town Sport
ភ្នំពេញៈ ការប្រកួតប្រដាល់ «សេនាគុនខ្មែរយ័ន្ត ៨ ទិស» ដែលនឹងត្រូវរៀបចំឡើង នៅថ្ងៃទី៣០ ខែកញ្ញា ខាងមុខនេះ ត្រូវបានអ្នករៀបចំរបស់ស្ថានីយទូរទស្សន៍ថោន ព្រមទាំងសហព័ន្ធកីឡា ប្រដាល់គុនខ្មែរ និងម្ចាស់ឧបត្ថម្ភធំ បានចាត់ទុកថា ជា «មហាព្រឹត្តិការណ៍ដ៏សម្បើម អស្ចារ្យ លំដាប់ពិភពលោក» ដែលប្រមូលផ្តុំទៅដល់កីឡាករលំដាប់ខ្លាំង មកពីស្ទើរគ្រប់ទ្វីបឱ្យមក ប្រកួតដណ្តើមខ្សែក្រវាត់ពិភពលោក និងប្រកួតមិត្តភាពអន្តរជាតិ ជាមួយជើងខ្លាំងលំដាប់ ប្រទេសរបស់កម្ពុជា សរុបចំនួន ៨ គូ។
ជាមួយការរចនាឱ្យមានសង្វៀន ៨ ទិស ជាលើកដំបូង នៅកម្ពុជានេះ អ្នករៀបចំកម្មវិធីប្រកួត ប្រដាល់របស់សង្វៀនថោន បានសម្រិតសម្រាំងកីឡាករជើងខ្លាំងលំដាប់ប្រទេសចំនួន៨នាក់ ឱ្យឈរតំណាង នៅតាមទិសទាំង ៨ ឬយ័ន្ត ៨ ទិស ដោយក្នុងនោះ ព្រំ សំណាង ឈរនៅទិសឧត្តរ ឈុត សេរីវ៉ាន់ថង ទិសពាយព្យ ធឿន ធារ៉ា ទិសបស្ចិម ពេជ្រ សម្បត្តិ ទិសនិរតី រឿង សោភ័ណ្ឌ ទិសទក្សិណ ឈឿង ល្វៃ ទិសអាគ្នេយ៍ ម៉ានូ សិល្បៈ ទិសបូព៌ា និង ផល សោភ័ណ្ឌ ឈរនៅទិសឦសាន។
ចំពោះបេក្ខភាពតំណាងឱ្យកម្ពុជាទាំង ៨ នាក់ គឺ ព្រំ សំណាង និង ធឿន ធារ៉ា ត្រូវបានដាក់ឱ្យប្រកួតដណ្តើមខ្សែក្រវាត់ពិភពលោកកម្រិតខ្ពស់បំផុតរបស់ស្ថាប័ន International Professional Combat Council (IPCC) ជាមួយអ្នកប្រយុទ្ធមកពីក្រៅទ្វីបដូចគ្នា ចំណែក រឿង សោភ័ណ្ឌ និង ផល សោភ័ណ្ឌ ត្រូវប្រកួតដណ្តើមខ្សែក្រវាត់ Wurkz World IPCC Kun Khmer ជាមួយអ្នកប្រយុទ្ធមកពីជប៉ុន និងថៃ ចំណែកកីឡាករកម្ពុជា៤នាក់ទៀត ត្រូវប្រកួតអន្តរជាតិជាមួយជើងខ្លាំងមកពី ៤ ប្រទេសផ្សេងគ្នា។
ជាមួយគ្នានេះ លោក Tommy Kim ទីប្រឹក្សាកីឡារបស់ស្ថានីយទូរទស្សន៍ថោន និងជាអ្នកតំណាង IPCC ប្រចាំនៅប្រទេសកម្ពុជា បានថ្លែងក្នុងសន្និសីទកាសែត កាលពីថ្ងៃទី២១ ខែកញ្ញាថា៖ «សេនាគុនខ្មែរយ័ន្ត៨ទិស ជាព្រឹត្តិការណ៍លំដាប់ពិភពលោក ដែលយើងបានបង្កើតឡើង ដើម្បីលើកស្ទួយ និងផ្សព្វផ្សាយគុនខ្មែរ ក៏ដូចជារួមគ្នាបង្កើតព្រឹត្តិការណ៍ជាប្រវត្តិសាស្ត្រ សម្រាប់គុនខ្មែរ នៅក្នុងប្រទេសកម្ពុជា ព្រោះនេះជាកម្មវិធីធំបំផុត មិនធ្លាប់មាន នៅក្នុងប្រវត្តិសាស្ត្រវិស័យគុនខ្មែររបស់យើងនោះទេ»។
ចំណែក លោក ម៉ិល កាដូ ទីប្រឹក្សាក្រសួងអប់រំ យុវជន និងកីឡា និងជាអនុប្រធានសហព័ន្ធកីឡាប្រដាល់គុនខ្មែរ បាននិយាយថា៖ «ការប្រកួតសេនាគុនខ្មែរយ័ន្ត៨ទិសនេះ មានកីឡាករបរទេសមកចូលរួមសឹងគ្រប់ទ្វីប ហើយមានទាំងការប្រកួតដណ្តើមខ្សែក្រវាត់ និងប្រកួតមិត្តភាពអន្តរជាតិ សរុប៨គូ ដូច្នេះកម្មវិធីនេះពិតជាល្អ ហើយកក្រើក និងមិនធ្លាប់មាន សូម្បីតែឈ្មោះ ក៏យើងឃើញថាល្អប្រសើរដែរ»។
តាមការប្រកាស នៅក្នុងសន្និសីទកាសែតនោះ ព្រំ សំណាង នឹងត្រូវប្រកួតដណ្តើមខ្សែក្រវាត់ខ្ពស់បំផុតរបស់ IPCC Kun Khmer Intercontinental ជាមួយម្ចាស់ខ្សែក្រវាត់ WBC មកពីអាមេរិក ចំណែក ធឿន ធារ៉ា ត្រូវប្រកួតដណ្តើមខ្សែក្រវាត់ IPCC Kun Khmer Intercontinental ជាមួយម្ចាស់ជើងឯក៣សម័យកាលមកពីប្រទេសទុយនីស៊ី។ រីឯ រឿង សោភ័ណ្ឌ ត្រូវប្រកួតដណ្តើមខ្សែក្រវាត់ Wurkz World IPCC Kun Khmer ជាមួយម្ចាស់ខ្សែក្រវាត់ IPCC របស់ជប៉ុន ក្នុងទម្ងន់ ៦៩ គីឡូក្រាម។
ចំណែក ផល សោភ័ណ្ឌ ត្រូវប្រកួតដណ្តើមខ្សែក្រវាត់ Wurkz World IPCC Kun Khmer ជាមួយកីឡាករថៃ Changpuak Jesada ទម្ងន់ ៦៦ គីឡូក្រាម។ ចំពោះការប្រកួតមិត្តភាពវិញ ម៉ានូ សិល្បៈ ត្រូវជួបថៃ ខណៈ ឈឿង ល្វៃ ត្រូវប៉ះម្ចាស់ខ្សែក្រវាត់ មកពីប្រទេសអ៊ីតាលី ហើយ ឈុត សេរីវ៉ាន់ថង ត្រូវប្រកួតជាមួយម្ចាស់ខ្សែក្រវាត់ IPCC របស់ជប៉ុន រីឯ ពេជ្រ សម្បត្តិ និងកីឡាករប្រេស៊ីល អាឡិចសាន់ដ្រូ ត្រូវប្រកួតគ្នាដណ្តើមយករហស្សនាម «ក្របីព្រៃ» ផ្តាច់មុខ ព្រោះបច្ចុប្បន្ន អ្នកទាំង២នេះ ប្រើរហស្សនាមក្របីព្រៃដូចគ្នា។
លោក Tommy Kim បានបន្ថែមថា៖ «ការប្រកួតសេនាគុនខ្មែរយ័ន្ត ៨ ទិសនេះ យើងបានបញ្ចូលនូវវប្បធម៌ខ្មែរ គឺយ័ន្តរបស់យើងទៅនឹងកីឡា ហើយកីឡាករ ដែលឈរនៅតាមទិសនីមួយៗ សុទ្ធតែអ្នកមានសមត្ថភាពខ្លាំង ចំណែកកីឡាករបរទេសទាំង៨នាក់ ដែលត្រូវនាំយកមកប្រកួត សុទ្ធតែមានសមត្ថភាពខ្លាំងដូចគ្នា»។
លោកបានបញ្ជាក់ថា៖ «កីឡាករ ដែលមកឈរនៅទិសនីមួយៗ គឺត្រូវបានសម្រិតសម្រាំងអស់រយៈពេល៣ខែមកហើយ ហេតុនេះ សម្រាប់ការប្រកួតដណ្តើមខ្សែក្រវាត់ទាំង ៤ ស្ថាប័ននេះ គឺខាង IPCC បានសម្រិតសម្រាំងយកសុទ្ធតែអ្នកខ្លាំងមកប្រកួតជាមួយកីឡាករកម្ពុជាយើងដូចគ្នា ហើយយើងព្យាយាមយកកីឡាករនៅអឺរ៉ុប អាស៊ី និងអាមេរិក ដើម្បីឱ្យគេមកប្រកួតនៅយើង នឹងជួយផ្សព្វផ្សាយគុនខ្មែររបស់យើងត្រឡប់ទៅវិញ»។
ចំណែកអ្នកឧកញ៉ា លាង ម៉េង ប្រធានអគ្គនាយកក្រុមហ៊ុនខ្មែរប៊ែវើរីជីស ដែលជាអ្នកឧបត្ថម្ភធំ ក្នុងព្រឹត្តិការណ៍នេះ បានថ្លែងថា៖ «យើងច្បាស់ទាំងអស់គ្នាហើយថា យើងចង់បំផុសឱ្យកីឡាកររបស់យើងកាន់តែល្បី និងធ្វើឱ្យពិភពលោកកាន់តែស្គាល់យើង តែបើគ្មានអ្នកឧបត្ថម្ភក៏យើងមិនអាចទៅរួចដែរ អ៊ីចឹងយើងត្រូវមានការគាំទ្រគ្នាទៅវិញទៅមក ហើយជាមួយគ្នានេះ កីឡាកររបស់យើង ក៏ត្រូវតែខ្លាំង និងពូកែដែរ ទើបមានការគាំទ្រ ហេតុនេះខ្ញុំចង់ឱ្យកូនខ្មែរត្រូវខំប្រឹងពួតដៃគ្នា ដើម្បីឱ្យយើងមានភាពល្បីទាំងអស់គ្នា»៕
