សកម្មភាពក្មេងហ្វឹកហាត់ក្នុងសហព័ន្ធកីឡាកាយសម្ព័ន្ធកម្ពុជា។ រូបថត សហការី
ភ្នំពេញៈ សហព័ន្ធកីឡាកាយសម្ព័ន្ធកម្ពុជា បាននិងកំពុងចាប់ផ្តើមពង្រឹងធនធានគ្រូបង្វឹកកម្រិតមូលដ្ឋាន ដើម្បីឱ្យអ្នកទាំងនោះ ចូលរួមចំណែកបណ្តុះបណ្តាលកីឡាករ កីឡាការិនីវ័យក្មេងឱ្យបានកាន់តែច្រើន និងមានគុណភាព សម្រាប់ត្រៀមឆ្ពោះទៅកាន់ការប្រកួតកីឡាយុវជនអាស៊ី ឆ្នាំ២០២៩ ដែលកម្ពុជា នឹងត្រូវធ្វើជាម្ចាស់ផ្ទះ លើកដំបូង។
បើទោះបីជា ការប្រកួតកីឡាយុវជនអាស៊ី ឆ្នាំ២០២៩ នៅមានរយៈពេលវែងទៀត ប៉ុន្តែលោក ណយ ផាណា អគ្គលេខាធិការសហព័ន្ធកីឡាកម្ពុជា បានអះអាងថា ដើម្បីឈានទៅរកការទទួលបានជោគជ័យ ក្នុងព្រឹត្តិការណ៍ដ៏ធំ ដែលមាន៤៥ប្រទេសចូលរួមនេះកម្ពុជាត្រូវតែត្រៀមលក្ខណសម្បត្តិពីពេលនេះទៅអាចនឹងទទួលបានជោគជ័យដូចការធ្វើម្ចាស់ផ្ទះការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ជាប្រវត្តិសាស្រ្ត កន្លងមកនេះ។
ជាមួយការដាក់ចេញផែនការវែងឆ្ងាយនេះ សហព័ន្ធកីឡាកាយសម្ព័ន្ធកម្ពុជា ដោយមានលោកទេសរដ្ឋមន្រ្តី ថោង ខុន ជាប្រធាន បានរៀបចំវគ្គបណ្តុះបណ្តាលគ្រូបង្វឹកកីឡាកាយសម្ព័ន្ធកម្រិត១ និងបោះជំរំ ឆ្នាំ២០២៣ (Academy in Aerobic level 1 + Training Camp) នៅខេត្តកំពង់ឆ្នាំង ដែលទើបបានបញ្ចប់ កាលពីថ្ងៃទី២៦ ខែកញ្ញា បន្ទាប់ពីបានបើកដំណើរការ កាលពីថ្ងៃទី២២ ខែកញ្ញា។
សម្រាប់វគ្គបណ្តុះបណ្តាល ដែលទទួលបានការឧបត្ថម្ភគាំទ្រពីក្រសួងអប់រំ យុវជន និងកីឡានេះ ត្រូវបាន លោក ណយ ផាណា ឱ្យដឹងថា មានសិក្ខាកាមចូលរួមចំនួន២២នាក់ (ស្រី៨នាក់) គឺមានមកពីខេត្តកំពង់ឆ្នាំង១៣នាក់ (ស្រី៥នាក់) ខេត្តក្រចេះ៤នាក់ (ស្រី១នាក់) រាជធានីភ្នំពេញ មាន៤នាក់ (ស្រី២នាក់) និងមកពីខេត្តកំពង់ចាម១នាក់។
អគ្គលេខាធិការសហព័ន្ធកីឡាកាយសម្ព័ន្ធកម្ពុជារូបនេះ បានបន្ថែមថា៖ «វគ្គបណ្ដុះបណ្ដាលនេះ ជាវគ្គមួយដ៏សំខាន់ ក្នុងការអភិវឌ្ឍ ក៏ដូចជាជំរុញ និងផ្តល់ចំណេះ ជំនាញដល់លោកគ្រូ អ្នកគ្រូ មកពីតាមបណ្តាក្លិប ក្នុងរាជធានីខេត្តចំនួន៤នេះ ឱ្យមានការយល់ដឹងពីចំណេះ ជំនាញនេះ ឱ្យបានពិតប្រាកដ ព្រោះកីឡាករ កីឡាការិនីវ័យក្មេងរបស់យើង ត្រូវការគ្រូ ដែលមានជំនាញច្បាស់លាស់ ក្នុងការបណ្តុះបណ្តាលដល់ពួកគេ»។
លោក ណយ ផាណា ដែលជាប្រធានគ្រប់គ្រង និងជាគ្រូឧទ្ទេសម្នាក់ក្នុងវគ្គបណ្តុះបណ្តាលគ្រូបង្វឹកកីឡាកាយសម្ព័ន្ធកម្រិត១ និងបោះជំរំ ឆ្នាំ២០២៣នេះ បានឱ្យដឹងទៀតថា នៅក្នុងការសិក្សារយៈពេល៥ថ្ងៃនេះ សិក្ខាកាមទាំង២២នាក់ ត្រូវបានបង្ហាត់បង្ហាញទាំងទ្រឹស្តី ជាពិសេសការអនុវត្តផ្ទាល់ជាមួយកីឡាករ កីឡាការិនីវ័យក្មេងជាច្រើននាក់ ដែលត្រូវបានយកមកហ្វឹកហាត់ក្នុងវគ្គនេះដែរ។
លោកបានបន្ថែមថា៖ «កីឡាករ កីឡាការិនីកម្រិតមូលដ្ឋាន មានអាយុ៨ឆ្នាំ ឬក្រោម១៥ឆ្នាំ គឺគាត់នឹងមានភាពបត់បែនលឿន បើសិនជាគ្រូរបស់យើងមានលក្ខណៈបច្ចេកទេសត្រឹមត្រូវ អ៊ីចឹងគ្រូត្រូវតែមានជំនាញនេះឱ្យបានពិតប្រាកដ ដើម្បីចៀសវាងកុំឱ្យមានកំហុសឆ្គង នៅក្នុងការបង្ហាត់បង្រៀនដល់កីឡាករ កីឡាការិនី»។
លោក ផាណា បានបញ្ជាក់ថា៖ «ជាមួយគ្នានេះ សហព័ន្ធ ក៏បានពិនិត្យទៅលើកីឡាករ កីឡាការិនីវ័យក្មេង មានអាយុក្រោម១៥ឆ្នាំដែរ ដើម្បីជាការត្រៀមលក្ខណៈឆ្ពោះទៅកាន់ការប្រកួតកីឡាយុវជនអាស៊ី ដែលកម្ពុជា ត្រូវធ្វើជាម្ចាស់ផ្ទះ អ៊ីចឹងយើងត្រូវត្រៀមលក្ខណៈចាប់ពីពេលនេះតទៅ។ បើមិនដូច្នោះទេ យើងមិនអាចរៀបរយទាន់ពេលទេ ដោយសារយើងត្រូវការកីឡាករ កីឡាការិនីវ័យក្មេងអាយុក្រោម១៧ឆ្នាំ ដើម្បីចូលរួមការប្រកួតកីឡាយុវជនអាស៊ី ឆ្នាំ២០២៩នេះ»៕
