កំណាត់ផ្លូវជាតិលេខ៤ ដែលរងការលិចទឹកជំនន់នៅថ្ងៃទី២៧ កញ្ញា ។ រូបថត រដ្ឋបាលខេត្ដព្រះសីហនុ
ព្រះសីហនុៈ រដ្ឋបាលខេត្តព្រះសីហនុបានផ្អាកចរាចរណ៍បណ្តោះអាសន្នលើកំណាត់ផ្លូវជាតិលេខ ៤ ត្រង់គីឡូម៉ែត្រលេខ ១៥៣-១៥៤ ស្ថិតក្នុងភូមិស្ទឹងឆាយខាងត្បូង ឃុំស្ទឹងឆាយ ស្រុកកំពង់សិលា ខេត្តព្រះសីហនុ ចាប់ពីម៉ោង៩:៣០នាទីព្រឹកថ្ងៃទី ២៧ ខែកញ្ញា រហូតដល់មានការជូនដំណឹងជាថ្មី បន្ទាប់ពីកំណាត់ផ្លូវនេះរងការជន់លិចទាំងស្រុងដោយសារជំនន់ទឹកភ្លៀង។
សេចក្តីជូនដំណឹងរដ្ឋបាលខេត្តព្រះសីហនុបញ្ជាក់ថា នៅព្រឹកថ្ងៃទី២៧ ខែកញ្ញា នេះ កម្រិតជំនន់ទឹកភ្លៀងបានកើនឡើងជាលំដាប់ ហើយបានជន់លិចទាំងស្រុងកំណាត់ផ្លូវនេះដែលមានប្រវែងជាង១២០ម៉ែត្រ។ ស្ថានភាពបែបនេះមិនអាចអនុញ្ញាតឱ្យយានយន្តគ្រប់ប្រភេទធ្វើដំណើរឆ្លងកាត់ទីតាំងនោះបានទៀតទេ។
សេចក្តីជូនដំណឹងបញ្ជាក់ថា៖«ដើម្បីការពារសុវត្ថិភាពជូនបងប្អូនប្រជាពលរដ្ឋនិងដើម្បីថែរក្សាគុណភាពផ្លូវ ស្ពានកុំឱ្យមានការបាក់ស្រុត ធានាប្រើប្រាស់បានយូរអង្វែង រដ្ឋបាលខេត្តព្រះសីហនុ សូមធ្វើការផ្អាកចរាចរណ៍បណ្តោះអាសន្នចំពោះយានយន្តគ្រប់ប្រភេទ»។
ក្នុងករណីអ្នកធ្វើចរាចរណ៍មានបំណងធ្វើដំណើរតាមផ្លូវជាតិលេខ៤ ទៅកាន់ខេត្តព្រះសីហនុ រដ្ឋបាលខេត្តស្នើឱ្យធ្វើដំណើរវាងតាមផ្លូវល្បឿនលឿនឬតាមផ្លូវជាតិលេខ៣វិញ។
រដ្ឋបាលខេត្តអំពាវនាវដល់អ្នកធ្វើចរាចរណ៍មានការប្រុងប្រយ័ត្នខ្ពស់និងចូលរួមសហការជាមួយអាជ្ញាធរមានសមត្ថកិច្ចឱ្យបានល្អប្រសើរ៕
