គ្រូពេទ្យពេលកំពុងពិនិត្យភ្នែកកុមារនៅខេត្ដរតនគិរី កាលពីថ្ងៃទី២៥ កញ្ញា ។ រូបថត CDC
ភ្នំពេញៈ បន្ទាប់ពីមានករណីនៃការផ្ទុះករណីជំងឺភ្នែកក្រហមជិត ១០០ ករណី នៅក្នុងស្រុកអូរយ៉ាដាវ ខេត្តរតនគិរី កាលពីពេលថ្មីៗនេះ ក្រសួងសុខាភិបាលបានណែនាំដល់ប្រជាពលរដ្ឋទាំងអស់ឱ្យការពារពីជំងឺភ្នែកក្រហមនេះ ថ្វីបើជំងឺប្រភេទនេះមិនប៉ះពាល់ធ្ងន់ធ្ងរក៏ដោយ។
យោងតាមសេចក្តីប្រកាសព័ត៌មានស្ដីពីករណីផ្ទុះជំងឺរលាកភ្នែកនៅកម្ពុជាក្នុងឆ្នាំនេះចុះថ្ងៃទី២៦ ខែកញ្ញា ឆ្នាំ២០២៣ បានឱ្យដឹងថា មន្ត្រីជំនាញនៃក្រសួងសុខាភិបាល និងមន្ត្រីសុខាភិបាលក្នុងមូលដ្ឋានបានចុះទៅពិនិត្យស្រាវជ្រាវ ផ្តល់ការព្យាបាលថែទាំអ្នកជំងឺ និងអប់រំភ្លាមៗផងដែរ បន្ទាប់ពីទទួលបានការរាយការណ៍ពីបញ្ហានៃការឆ្លងជំងឺភ្នែកក្រហមនេះ។
ក្រសួងសុខាភិបាលបានលើកឡើងថា ករណីភាគច្រើននៃជំងឺភ្នែកក្រហមគឺស្រាល។ជាធម្មតាការឆ្លងនឹងជាសះស្បើយក្នុងរយៈពេលពី៧ទៅ១៤ថ្ងៃ ដោយមិនតម្រូវឱ្យមានការព្យាបាល និងមិនមានផលវិបាករយៈពេលវែងនោះទេ។
សេចក្តីប្រកាសបញ្ជាក់ថា ៖ «ទោះយ៉ាងណាក៏ដោយ ក្នុងករណីខ្លះ ការរលាកភ្នែកដោយវីរុសត្រូវការរយៈពេល ២ ទៅ ៣សប្តាហ៍ឬច្រើនជាងនេះដើម្បីជាសះស្បើយ។ គ្រូពេទ្យអាចផ្ដល់ថ្នាំ អង់ទីប្យូទិច ដូចជាថ្នាំបន្តក់ភ្នែក ឬថ្នាំដាក់ភ្នែកបាន»។
រោគសញ្ញាជំងឺភ្នែកក្រហមរួមមាន នៅផ្នែកសនៃភ្នែកឡើងពណ៌ផ្កាឈូកឬពណ៌ក្រហម ហើមត្របកភ្នែក ជាពិសេសនៅពេលព្រឹកមានហូរទឹកភ្នែកច្រើនជាងមុនដោយសារមានការកើនឡើងនូវការផលិតទឹកភ្នែក រកាំភ្នែកដោយសារមានអារម្មណ៍ថាមានអ្វីនៅក្នុងភ្នែកឬចង់ញីភ្នែក រមាស់ភ្នែក រលាក និង/ឬក្រហាយភ្នែក មានអាចម៍ភ្នែក និងចុកគ្រាប់ភ្នែកជាដើម។
លោក ងី ម៉េង គ្រូពេទ្យឯកទេសចក្ខុរោគបានក៏ណែនាំផងដែរពីវិធីការពារការឆ្លងជំងឺភ្នែកក្រហម ក្នុងនោះត្រូវលាងដៃឱ្យបានញឹកញាប់ ជាមួយសាប៊ូ និងទឹកក្តៅឧណ្ហៗ យ៉ាងហោចណាស់ ២០ វិនាទី មុននឹងក្រោយពេលសម្អាតភ្នែកឬដាក់ថ្នាំភ្នែក។
លោកបានបន្តថា ៖ «ប្រសិនបើមិនមានសាប៊ូនិងទឹកទេសូមប្រើទឹកលាងដៃដែលមានជាតិអាល់កុលយ៉ាងតិច៦០ភាគរយដើម្បីលាងសម្អាតដៃ។ចៀសវាងការប្រើប្រាស់របស់របររួមគ្នាដូចជាភួយខ្នើយ កន្សែង ក្រមា ឬវ៉ែនតាជាដើមដែលមានផ្ទុកវីរុស ឬបាក់តេរី ហើយយកមកប៉ះភ្នែក»។
លោក ងី ម៉េង បានបន្តថា ត្រូវផ្អាកពាក់កែវភ្នែក (contact lens) រហូតដល់គ្រូពេទ្យភ្នែករបស់អ្នកនិយាយថាមិនអីទេក្នុងការចាប់ផ្តើមពាក់វាម្តងទៀតនិងចៀសវាងការប្រើវិធីបុរាណក្នុងការព្យាបាលដោយខ្លួនឯង(លាងទឹកម្លូដាក់ទឹកនោមដាក់ទឹកប្រមាត់ត្រី»។
លោកថា ៖ «ករណីចាំបាច់ត្រូវទៅជួបគ្រូពេទ្យនៅមណ្ឌលសុខភាព ឬកន្លែងផ្ដល់សេវាព្យាលបាលភ្នែកដែលនៅជិតបំផុត ដោយត្រូវចៀសវាងការប៉ះ ឬត្រដុសឬញីភ្នែក ពីព្រោះធ្វើឱ្យស្ថានភាពកាន់តែអាក្រក់ទៅៗ ឬរាលដាលទៅភ្នែកម្ខាងទៀត»។
ក្រសួងសុខាភិបាលក៏បានបញ្ជាក់ដែរថា ជំងឺភ្នែកក្រហមដោយវីរុសនិងបាក់តេរីឆ្លងលឿនណាស់ដោយងាយស្រួលរាលដាលពីមនុស្សម្នាក់ទៅមនុស្សផ្សេងទៀត។ អ្នកអាចកាត់បន្ថយហានិភ័យនៃការកើតជំងឺរលាកភ្នែកឬការចម្លងទៅអ្នកដទៃដោយអនាម័យល្អ។
សូមរំឭកថា នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល ប្រកាសរកឃើញជំងឺភ្នែកក្រហមកម្រិតស្រាលចំនួន៩៣ករណីនៅក្នុងខេត្តរតនគិរី ខណៈខេត្តព្រំប្រទល់គ្នាក៏បានអប់រំផ្សព្វផ្សាយទៅដល់ប្រជាពលរដ្ឋឱ្យចេះការពារខ្លួនពីជំងឺនេះផងដែរ៕
.jpg)
