ពុទ្ធបរិស័ទកំពុងរាប់បាត្រក្នុងពិធីកាន់បិណ្ឌនៅវត្តព្រែកលៀប ខណ្ឌជ្រោយចង្វារ រាជធានីភ្នំពេញ កាលពីថ្ងៃទី ១ ខែតុលា ឆ្នាំ ២០២៣ ត្រូវនឹងថ្ងៃទី ២ នៃពិធីកាន់បិណ្ឌ។ រូបថត ហុង មិនា
ភ្នំពេញៈ គណៈកម្មាធិការជាតិសុវត្ថិភាពចរាចរណ៍ផ្លូវគោកបានធ្វើការអំពាវនាវឱ្យមានការប្រុងប្រយ័ត្នក្នុងការបើកបរដើម្បីចូលរួមទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌប្រពៃណីជាតិខ្មែរដែលបាននិងកំពុងប្រព្រឹត្តទៅចាប់ពីថ្ងៃទី ៣០ ខែកញ្ញា ដល់ថ្ងៃទី ១៥ ខែតុលា ឆ្នាំ ២០២៣។
យោងតាមសេចក្តីអំពាវនាវរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ចុះថ្ងៃទី ៣០ ខែកញ្ញា ឱ្យដឹងថា គ្រោះថ្នាក់ចរាចរណ៍ផ្លូវគោកបាននិងកំពុងគំរាមកំហែងដល់អ្នកប្រើប្រាស់ផ្លូវ បង្កឱ្យមានសោកនាដកម្មបាត់បង់ជីវិត រងរបួស និងខូចខាតទ្រព្យសម្បត្តិជារៀងរាល់ថ្ងៃហើយតែងតែមានកំណើនខ្ពស់ក្នុងពេលមានពិធីបុណ្យនានាដែលមានចរាចរណ៍មមាញឹក ដោយការបើកបរមិនគោរពច្បាប់ ការធ្វេសប្រហែស ឬខ្វះការយោគយល់អធ្យាស្រ័យគ្នា។
គណៈកម្មាធិការជាតិសុវត្ថិភាពចរាចរណ៍ផ្លូវគោក បានអំពាវនាវដល់សាធារណជនជាអ្នកប្រើប្រាស់ផ្លូវទាំងអស់ខិតខំយកចិត្តទុកដាក់បង្កើនស្មារតីចូលរួមបង្ការ និងទប់ស្កាត់គ្រោះថ្នាក់ចរាចរណ៍បើកបរយានយន្តដោយបន្ថយល្បឿនបើកបរតាមច្បាប់កំណត់ និងតាមស្ថានភាពជាក់ស្ដែង ដូចជា ទីប្រជុំជន សាលារៀន ផ្លូវជង្ហុក ផ្លូវកោង ផ្លូវប្រសព្វ ផ្លូវចំណោត ផ្លូវចង្អៀត ឬផ្លូវរអិល។
សេចក្តីអំពាវនាវបញ្ជាក់ថា៖ «មូលហេតុចម្បងដែលបណ្តាលឱ្យមានគ្រោះថ្នាក់ចរាចរណ៍ គឺការបើកបរលឿនហួសល្បឿនកំណត់។ ត្រូវគោរពសិទ្ធិអាទិភាពនៅត្រង់ផ្លូវប្រសព្វ ដោយត្រូវបើកបរបន្ថយល្បឿន និងត្រូវទុកសិទ្ធិឱ្យអ្នកបើកបរលើផ្លូវដែលមានសិទ្ធិ បានធ្វើចរាចរណ៍ទៅមុន»។
មុននឹងវ៉ាជែង ត្រូវដឹងច្បាស់ថា ផ្លូវខាងមុខទំនេរ អាចជែងបានដោយសុវត្ថិភាព ចៀសវាង ការវ៉ាជែង ដោយប្រថុយប្រថាន ដែលអាចបង្កឱ្យមានគ្រោះថ្នាក់ចរាចរណ៍ជាយថាហេតុ។ ចំពោះរថយន្តដឹកអ្នកដំណើរ ឬរថយន្តដឹកទំនិញ កុំផ្ទុកមនុស្ស ឬទំនិញលើស ច្បាប់កំណត់ ជាពិសេសរថយន្តដឹកអ្នកដំណើរមិនត្រូវផ្ទុកមនុស្សនៅលើដំបូល និងមិនត្រូវដំឡើងថ្លៃធ្វើដំណើរក្នុងឱកាសនេះឡើយ។
អ្នកបើកបររថយន្ត និងអ្នករួមដំណើរ ត្រូវពាក់ខ្សែក្រវាត់សុវត្ថិភាពឱ្យបានត្រឹមត្រូវជាប់ជាប្រចាំ ឯអ្នកបើកបរម៉ូតូ និងអ្នករួមដំណើរទាំងអស់ត្រូវពាក់មួកសុវត្ថិភាពឱ្យបានត្រឹមត្រូវគ្រប់ៗគ្នា ទោះធ្វើដំណើរជិតឬឆ្ងាយ និងគ្រប់ពេលវេលាផងដែរ។
ជាមួយគ្នានេះ លោក គឹម បញ្ញា នាយកប្រចាំប្រទេសនៃអង្គការមូលនិធិបង្ការរបួសអាស៊ីបានថ្លែងថា ប្រជាពលរដ្ឋខ្មែរមួយចំនួននៅពេលមានបុណ្យសម្រាកម្ដងៗ ច្រើនតែភ្លេចខ្លួនក្នុងការការពារពីបញ្ហាគ្រោះថ្នាក់ចរាចរណ៍ដោយមិនពាក់មួកសុវត្ថិភាព មិនគោរពច្បាប់ចរាចរណ៍ នៅពេលធ្វើដំណើរនៅតាមផ្លូវជាតិ។
មន្ត្រីនគរបាលចរាចរណ៍ដែលជួយសម្រួលចរាចរណ៍នៅតាមដងផ្លូវ ក៏គួរតែមានការរឹតបន្តឹងច្បាប់ចរាចរណ៍ដែលផ្ដោតលើកត្តាហានិភ័យដែលបង្កឱ្យមានការស្លាប់ និងការរងរបួស ខណៈដែលបញ្ហាទាំងនេះកើតឡើងដោយការមិនពាក់មួកសុវត្ថិភាពការបើកបរហួសល្បឿនកំណត់ ការបើកបរដោយវ៉ាប្រជែងគ្នា និងការពិសាគ្រឿងស្រវឹងជាដើម។ លោកបញ្ញាថ្លែងថា៖ «បើអាចបានយើងសំណូមពរឱ្យក្រុមហ៊ុនគ្រឿងស្រវឹងហ្នឹង ត្រូវកាត់បន្ថយការផ្សាយពាណិជ្ជកម្មនៅក្នុងអំឡុងពិធីបុណ្យសាសនារបស់យើងនេះ»។
លោកថា៖ «មួយទៀតរាជរដ្ឋាភិបាល គួរតែដាក់កម្រិតតែម្ដងនៅក្នុងអំឡុងពិធីបុណ្យសាសនាយើង ក្នុងរយៈ ៣ ថ្ងៃពេលចុងក្រោយ គឺពុំគួរមានការអនុញ្ញាតឱ្យមានការផ្សាយពាណិជ្ជកម្ម ឬការលក់ដូរផលិតផលគ្រឿងស្រវឹងទេ ខណៈដែលយើងឃើញមានការអនុវត្តបានល្អនៅអំឡុងពេលការបោះឆ្នោតកន្លងមក»។
លោកបញ្ញា ក៏បានសំណូមពរឱ្យថ្នាក់ដឹកនាំទាំងស្ថាប័នរាជរដ្ឋាភិបាលក៏ដូចជាស្ថាប័នឯកជន ត្រូវរៀបចំយុទ្ធនាការជំរុញស្មារតីមន្ត្រីក្រោមឱវាទរបស់ខ្លួនឱ្យពង្រឹងការអនុវត្តច្បាប់ចរាចរណ៍ឱ្យបានជាប់ជាប្រចាំ។យោងតាមរបាយការណ៍របស់ក្រសួងសាធារណការ និងដឹកជញ្ជូន ក្នុងរយៈពេល ៨ ខែ ឆ្នាំ ២០២៣ មនុស្សជាង ១ ពាន់នាក់បានស្លាប់ និងជាង ២ ៧០០ នាក់ផ្សេងទៀតបានរងរបួសធ្ងន់ស្រាល ដោយសារគ្រោះថ្នាក់ចរាចរណ៍នៅទូទាំងប្រទេស ដែលអត្រានេះថយចុះ ៩% បើធៀបនឹងរយៈពេលដូចគ្នា។ គ្រោះថ្នាក់ចរាចរណ៍ផ្លូវគោក បានកើតមានឡើងចំនួន ២ ១២៦ លើក បណ្តាលឱ្យមនុស្សស្លាប់ចំនួន ១ ០១៥ នាក់ របួសធ្ងន់ ១ ៧៧៥ នាក់ និងរបួសស្រាល ១ ០១៦ នាក់៕
