លោក ហេង សួរ ក្នុងកិច្ចប្រជុំកាលពីថ្ងៃទី ២៩ ខែកញ្ញា។ រូបថត ក្រសួងការងារ
ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានចេញប្រកាសដោយសម្រេចឱ្យស្ថាប័នទាំងរដ្ឋ និងឯកជន អាចឈប់សម្រាកនៅថ្ងៃបុណ្យជាតិ ចំនួន ២២ ថ្ងៃនៅក្នុងឆ្នាំ ២០២៤ ខាងមុខ។ នេះបើយោងតាមប្រកាសស្តីពីការឈប់សម្រាកថ្ងៃបុណ្យដែលមានប្រាក់ឈ្នួល ប្រចាំឆ្នាំ ២០២៤ ចេញនៅថ្ងៃទី ២ ខែតុលា ឆ្នាំ ២០២៣។
លោក ហេង សួរ បានបញ្ជាក់ក្នុងសេចក្តីប្រកាសថា ជារួមចំពោះការឈប់សម្រាកថ្ងៃបុណ្យ ដែលមានប្រាក់ឈ្នួល ប្រចាំឆ្នាំ ២០២៤ ក្រសួងបានអនុញ្ញាតឱ្យកម្មករ និយោជិត នៃសហគ្រាសគ្រឹះស្ថានទាំងអស់ បានឈប់សម្រាកពីការងារ ដោយមានប្រាក់ឈ្នួល តាមប្រតិទិននាឆ្នាំ ២០២៤ មានចំនួន ២២ ថ្ងៃ។
លោកបន្តថា៖ «ចំពោះសហគ្រាស គ្រឹះស្ថានទាំងឡាយណា ដែលត្រូវប្រព្រឹត្តទៅជាប្រចាំ និងមិនអាចបញ្ឈប់សកម្មភាពបាន ម្ចាស់ ឬនាយកសហគ្រាស គ្រឹះស្ថាន ត្រូវរៀបចំបែងចែកឱ្យកម្មករនិយោជិតបានឈប់សម្រាកទៅតាមថ្ងៃបុណ្យនីមួយៗ ដោយផ្លាស់ប្ដូរគ្នា»។
លោកបានបញ្ជាក់ទៀតថា នៅក្នុងករណីមានការព្រមព្រៀងគ្នារវាងកម្មករនិយោជិតសាមី និងនិយោជក ឬមានចែងនៅក្នុងបទបញ្ជាផ្ទៃក្នុង របស់សហគ្រាស គ្រឹះស្ថាន ឬអនុសញ្ញារួម ការឈប់សម្រាករបស់កម្មករ-និយោជិតអាចអនុវត្តនៅពេលណាមួយផ្សេងទៀត ដែលខុសពីថ្ងៃឈប់សម្រាកបុណ្យដូចមានកំណត់ក្នុងប្រកាសនេះ។
ជាងនេះទៀត ម្ចាស់ ឬនាយកសហគ្រាស គ្រឹះស្ថាន ត្រូវរៀបចំបញ្ជីឈ្មោះកម្មករនិយោជិតដែលត្រូវផ្លាស់ប្តូរគ្នាឈប់សម្រាកនៅថ្ងៃបុណ្យនីមួយៗ ហើយរក្សាទុកជាប្រចាំ សម្រាប់ការត្រួតពិនិត្យរបស់អធិការការងារ។
លើសពីនេះ នៅក្នុងអំឡុងពេលនៃការឈប់សម្រាកដោយផ្លាស់ប្ដូរគ្នានេះ ម្ចាស់ ឬនាយកសហគ្រាស គ្រឹះស្ថានអាចប្រើប្រាស់កម្មករនិយោជិតផ្សេងជាបណ្ដោះអាសន្នមកជំនួសកម្មករនិយោជិតដែលបានឈប់សម្រាក។ នេះបើតាមសេចក្តីប្រកាសរបស់ក្រសួង។
យ៉ាងណាក្តីលោក ហ្វា សាលី ប្រធានសម្ព័ន្ធសហព័ន្ធសហជីពជាតិបានបង្ហាញការសោកស្តាយ ដែលក្រសួងនៅតែកំណត់មិនឱ្យមានការលើកថ្ងៃឈប់សម្រាក ប្រសិនបើថ្ងៃឈប់សម្រាកបុណ្យ ចំថ្ងៃសៅរ៍ ឬថ្ងៃអាទិត្យ ដែលលោកថា ជាទង្វើមួយអយុត្តិធម៌សម្រាប់កម្មករនិយោជិត។
លោក ហ្វា សាលី បានថ្លែងថា៖«យើងដឹងហើយថា ប្រាក់ឈ្នួលសម្រាប់បងប្អូនកម្មករ និយោជិតនៅទាប មិនស្មើនឹងប្រាក់ខែមន្ត្រីរាជការទេ ដូច្នេះមិនគួរឱ្យពួកគាត់ឈប់សម្រាកបុណ្យជាតិចំថ្ងៃសៅរ៍ អាទិត្យដូចមន្ត្រីរាជការទេ ព្រោះវាជារឿងដែលមិនអាចទទួលយកបាន។ ហេតុនេះខ្ញុំសូមឱ្យសម្តេចនាយករដ្ឋមន្ត្រី ហ៊ុន ម៉ាណែត ពិនិត្យនឹងពិចារណាសម្រាប់ការឈប់របស់ពួកគាត់ឡើងវិញ»។
សូមរំឭកដែរថា ក្រសួងការងារបានកំណត់ឱ្យមានការឈប់សម្រាកថ្ងៃបុណ្យ ដែលមានប្រាក់ឈ្នួល ប្រចាំឆ្នាំ ២០២៣ មានចំនួន ២១ ថ្ងៃ៕
