ការស្ថាបនាផ្លូវលើផ្លូវជាតិលេខ ៥ នៅខេត្ដកំពង់ឆ្នាំង កាលពីថ្ងៃទី ៤ តុលា។ ហុង រស្មី
កំពង់ឆ្នាំង: អាជ្ញាធរខេត្ដកំពង់ឆ្នាំង សហការជាមួយអង្គការ JICA បានរៀបចំផែនការផ្សព្វផ្សាយសុវត្ថិភាពចរាចរណ៍ លើផ្លូវជាតិលេខ ៥ ដែលតភ្ជាប់ពីព្រំដែនថៃ ទៅព្រំដែនវៀតណាម តាមផ្លូវជាតិលេខ ១ ដោយឆ្លងកាត់ជាទីស្ពាន Tsubasa ឬស្ពានអ្នកលឿងដែលទទួលបានថវិកា និងសាងសង់ពីរដ្ឋាភិបាលជប៉ុន។
កិច្ចខិតខំប្រឹងប្រែងដ៏ទូលំទូលាយក្នុងការធ្វើឱ្យប្រសើរឡើងនូវសុវត្ថិភាពចរាចរណ៍ផ្លូវគោករួមមានការអភិវឌ្ឍហេដ្ឋារចនាសម្ព័ន្ធគំនិតផ្តួចផ្តើមអនុវត្តច្បាប់យុទ្ធសាស្ត្រជំរុញដោយទិន្នន័យនិងកម្មវិធីអប់រំ។
លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូននិងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកបានថ្លែងថា ដើម្បីលើកកម្ពស់សុវត្ថិភាពចរាចរណ៍នៅតាមផ្លូវជាតិលេខ៥ក្រុមអាជ្ញាធរបានផ្ដោតលើការអនុវត្ដចំនួន៤ ចំណុច ដែលក្នុងនោះមានការពង្រឹងសមត្ថភាពមន្ដ្រីអនុវត្ដន៍ច្បាប់ចរាចរណ៍និងការប្រមូលទិន្នន័យគ្រោះថ្នាក់ចរាចរណ៍ជាដើម។
លោកស្រីបានថ្លែងក្នុងសិក្ខាសាលាស្តីពី«ការអភិវឌ្ឍមាតិកាចំណេះដឹងច្បាប់ចរាចរណ៍និងសៀវភៅផ្លាស់ប្តូរឥរិយាបថ»នៅមន្ទីរសាធារណការនិងដឹកជញ្ជូនខេត្តកំពង់ឆ្នាំង កាលពីថ្ងៃទី៣ ខែតុលា ថា៖«បើយើងអត់ដឹងព័ត៌មានពីស្ថានភាពគ្រោះថ្នាក់ចរាចរណ៍យើងក៏មិនដឹងអំពីវិធានការដែលត្រូវដោះស្រាយដែរ»។
លោកស្រីថា ការពង្រីកយ៉ាងឆាប់រហ័សនៃយានជំនិះដែលទាក់ទងនឹងកំណើនសេដ្ឋកិច្ចកម្ពុជាបណ្តាលឱ្យមានការកើនឡើងនូវគ្រោះថ្នាក់ចរាចរណ៍ធ្ងន់ធ្ងរជាពិសេសនៅតាមដងផ្លូវសំខាន់ៗ។ជាការភ្ញាក់ផ្អើលយ៉ាងខ្លាំងដែលមនុស្ស ៧៤ ភាគរយ ចំណោមអ្នកជួបគ្រោះថ្នាក់បានស្លាប់។
លោកស្រីបានឱ្យដឹងថា ថ្វីដ្បិតតែគ្រោះថ្នាក់ចរាចរណ៍នៅមិនទាន់ថមថយគួរឱ្យកត់សម្គាល់ដោយក្នុងឆ្នាំ២០១៩ មានមនុស្សស្លាប់ជាង ២១០០ នាក់។ ហេតុដូច្នេះលោកសខេងអតីតរដ្ឋមន្ដ្រីក្រសួងមហាផ្ទៃ បានយកឆ្នាំ២០២០ ជាឆ្នាំរឹតបន្ដឹងខ្លាំង ដែលនាំឱ្យអត្រាមរណភាពលើដងផ្លូវធ្លាក់មកត្រឹមរង្វង់ ១៧០០ នាក់ ក្នុង ១ ឆ្នាំ ថ្វីដ្បិតតែយានយន្ដបន្ដកើនឡើងក៏ដោយ។
លោកស្រីបានបញ្ជាក់ថា៖«ផ្អែកលើតួលេខ ១ ខែមុន [ខែកញ្ញា] នៅលើផ្លូវជាតិលេខ៥ មានស្លាប់តែ ៩ នាក់ ក្រោយមានការដាក់ឱ្យដំណើរការគម្រោង ៤ ចំណុចរបស់ JICA នេះ។
លោកស្រីបានឱ្យដឹងថា ចំពោះបញ្ហាគ្រោះថ្នាក់ចរាចរណ៍កត្ដាមនុស្សគឺជាបញ្ហាធំជាងគេដោយបើកបរល្បឿនលឿនមាន៣៨ភាគរយ ការមិនគោរពសិទ្ធិអាទិភាព២៥-២៦ ភាគរយ ការវ៉ាជែងជាង ១០ ភាគរយ និងមានគ្រឿងស្រវឹងស្ថិតនៅក្រោម ១០ ភាគរយ។
លោកស្រី មាណវី បានបញ្ជាក់ថា៖ «ចំពោះបញ្ហាគ្រឿងស្រវឹងអ្នកស្លាប់ដោយសារគ្រោះថ្នាក់ប្រាកដណាស់យើងមិនអាចផ្លុំជាតិអាល់កុល លើសាកសពបានទេ។ដូច្នេះតួលេខគ្រឿងស្រវឹងអាចខ្ពស់ជាងនេះជាក់ស្ដែង»។
ទីភ្នាក់ងារសហប្រតិបត្តិការអន្តរជាតិជប៉ុន (JICA) គឺជាដៃគូសកម្មក្នុងការជំរុញការអភិវឌ្ឍចាប់តាំងពីឆ្នាំ២០១៣ តាមរយៈ«គម្រោងកែលម្អផ្លូវជាតិលេខ៥»។
លោក ឈឹម ផល្លា ប្រធាននាយកដ្ឋានផ្លូវថ្នល់នៃក្រសួងសាធារណការនិងដឹកជញ្ជូនបានថ្លែងថា ផ្លូវជាតិលេខ៥ដែលជាសរសៃឈាមសំខាន់ត្រូវបានពង្រីកពី ២ ទៅ ៤ គន្លង ជាប្រភេទផ្លូវ highway កម្រាស់ ១៥ សង់ទីម៉ែត្រដែលបំពេញតាមស្តង់ដាអន្តរជាតិសម្រាប់គុណភាពនិងភាពធន់មាំ។
លោកថា ផ្លូវនេះជាសរសៃឈាមដ៏សំខាន់បំផុត ដែលចំណាយអស់ជាង ៦០០ លានដុល្លារ ហើយនេះ បង្ហាញពីការប្តេជ្ញាចិត្តរបស់រដ្ឋាភិបាលក្នុងការបង្កើតបណ្តាញដឹកជញ្ជូនដ៏រឹងមាំ ដើម្បីគាំទ្រដល់វិស័យពាណិជ្ជកម្មទេសចរណ៍និងការតភ្ជាប់រួម។
លោកផល្លាបានបន្តថា៖«ក្រោមគម្រោងជាមួយរដ្ឋាភិបាលជប៉ុននេះផ្លូវជាតិលេខ៥ត្រូវបានកសាងរួចរាល់ និងត្រៀមបើកសម្ពោធដាក់ឱ្យប្រើប្រាស់នៅចុងខែវិច្ឆិកានេះថ្វីដ្បិតតែនៅសល់៣៦គីឡូម៉ែត្រទៀតពីបន្ទាយមានជ័យទៅច្រកស្ទឹងបត់នៃក្រុងប៉ោយប៉ែត»។
លោកស្រីមាណវីបានឱ្យដឹងដែរថា ក្រោមគម្រោងកម្ចីសម្បទានពីរដ្ឋាភិបាលជប៉ុនចាប់ពីព្រែកក្ដាមរហូតដល់ក្រុប៉ោយប៉ែតខេត្ដបន្ទាយមានជ័យផ្លូវដែលមានចម្ងាយ ៣៦៦ គីឡូម៉ែត្ រនេះស្ថិតក្នុងកម្រិតផ្កាយ ៣ ឬផ្កាយ ៤ដោយមានលក្ខណពិសេសលើការកសាងទ្រូងផ្លូវសម្រាប់ការកាត់បន្ថយគ្រោះថ្នាក់ចរាចរណ៍។
លោកស្រីបន្ដថា តាមរយៈគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ដែលជាជំនួយរដ្ឋាភិបាលជប៉ុនក្រោមការអនុវត្តដោយអង្គការ JICA នេះ បានជួយកាត់បន្ថយគ្រោះថ្នាក់ចរាចរណ៍អស់ ៣២ ភាគរយ។
ទោះជាយ៉ាងណាការអភិវឌ្ឍហេដ្ឋារចនាសម្ព័ន្ធបានកើតឡើងស្របគ្នានឹងការព្រួយបារម្ភពីគ្រោះថ្នាក់ចរាចរណ៍នៅតាមផ្លូវជាតិលេខ៥។
លោក ម៉ាណា ប៊ីអូណូ ទីប្រឹក្សា JICA បានឱ្យដឹងថា គម្រោងអភិវឌ្ឍន៍ផ្លូវជាតិលេខ៥ នេះមានរយៈពេល ៣ ឆ្នាំ ដោយចាប់ផ្ដើមពីខែកុម្ភៈឆ្នាំ២០២២ រហូតដល់ដើមឆ្នាំ២០២៥។ លោកបានបន្ដថាគម្រោងនេះ ផ្ដោតលើការពង្រឹងសមត្ថភាពរបស់អង្គការពាក់ព័ន្ធ ក្នុងការស្រាវជ្រាវ និងវិភាគសម្រាប់សុវត្ថិភាពចរាចរណ៍ សមត្ថភាពរបស់ស្ថាប័នពាក់ព័ន្ធ សម្រាប់វិស្វកម្មសុវត្ថិភាពចរាចរណ៍ តាមរយៈសកម្មភាពក្នុងតំបន់សាកល្បងនៅលើផ្លូវជាតិលេខ៥។
លោកអូណូនិយាយថា៖ «គម្រោង3E-វិស្វកម្មការអនុវត្តនិងការអប់រំមានសារៈសំខាន់សម្រាប់សុវត្ថិភាពចរាចរណ៍»។
ការអប់រំគឺជាសសរស្ដម្ភនៃការផ្លាស់ប្ដូរ
លោក តុង បូរិទ្ធ អនុប្រធាននាយកដ្ឋាននៃក្រសួងអប់រំយុវជន និងកីឡាបានថ្លែងថា ចំពោះបញ្ហាសុវត្ថិភាពចរាចរណ៍ក្រសួងអប់រំ បានផ្ដោតលើការអប់រំរយៈពេលយូរនិងក្រុមគោលដៅដោយចាប់ផ្ដើមពីការស្ទង់មតិនៅតាមអនុវិទ្យាល័យចំនួន ៨នៅក្នុងខេត្ដកំពង់ឆ្នាំង។
លោកបានឱ្យដឹងថា យោងតាមទិន្នន័យបានបង្ហាញថាសិស្សានុសិស្សទាំង ៨ អនុវិទ្យាល័យ បានជួបគ្រោះថ្នាក់ចរាចរណ៍ចំនួន ៥៩ ភាគរយ ហើយ ៧៧ ភាគរយ នៃពួកគេស្ទើរតែជួបគ្រោះថ្នាក់ចរាចរណ៍ នៅលើផ្លូវជាតិលេខ៥។
លោកបូរិទ្ធបានបញ្ជាក់ថា៖«ការស្ទើរតែជួបគ្រោះថ្នាក់ចរាចរណ៍នេះគឺជាហេតុការណ៍ព្រលឹងចុងសក់ដែលសិស្សានុសិស្សហៀបនឹងត្រូវយានយន្ដបុក»។នៅក្នុងសហគមន៍មន្ដ្រីក្រសួងអប់រំបានបញ្ចូលការអប់រំអំពីសុវត្ថិភាពចរាចរណ៍នៅថ្នាក់បឋមសិក្សាតាមរយៈមុខវិជ្ជាសិក្សាសង្គម។
លោកបន្ដថា៖«ក្រោមកិច្ចសហការជាមួយ JICA នៅថ្នាក់អនុវិទ្យាល័យនេះយើងច្រើនតែដាក់មុខវិជ្ជាចរាចរណ៍ទៅក្នុងសីលធម៌ពលរដ្ឋវិទ្យា»។
ជាមួយគ្នានេះ លោកបានសំណូមពរឱ្យមន្ទីរពាក់ព័ន្ធជាពិសេស JICA យកចិត្ដទុកដាក់លើសិស្សានុសិស្សនៅតាមសាលារៀនដែលទទួលបានការឯកភាពពីរដ្ឋលេខាធិការក្រសួងសាធារណការនិងដឹកជញ្ជូននិងអ្នកស្រីតំណាងអង្គការ JICA មកពីប្រទេសជប៉ុន។
លោក បូរិទ្ធ បានបញ្ជាក់ថា៖ «ប្រសិនបើគម្រោងនេះត្រូវបានអនុវត្ដតាំងពីថ្នាក់បឋមរហូតដល់ថ្នាក់វិទ្យាល័យបញ្ហាគ្រោះថ្នាក់ចរាចរណ៍នឹងអាចកាត់បន្ថយគម្រោងដល់កម្រិតសូន្យ»។
គម្រោងនេះផ្ដោតលើការផ្លាស់ប្ដូរឥរិយាបថក្នុងចំណោមសិស្សានុសិស្សក៏ដូចជាការចេញផ្សាយសៀវភៅអប់រំបញ្ហាចរាចរណ៍និងការអនុវត្ដវិធានការផ្សេងៗ។
លោកបានឱ្យដឹងថា សៀវភៅចំណេះដឹងច្បាប់ចរាចរណ៍សៀវភៅផ្លាស់ប្ដូរឥរិយាបថបាននិងកំពុងកែសម្រួល ដើម្បីផ្ដល់អត្ថប្រយោជន៍និងឥទ្ធិពលល្អជាងមុន។
លោក បូរិទ្ធ បានថ្លែងថា៖ «ការសរសេរសៀវភៅនេះអាចប្រើរយៈពេលយូរដែរ។ក្រោយការបោះពុម្ពគ្រូៗនឹងប្រើប្រាស់សម្រាប់បង្រៀនសិស្សនិងអាចជាសាធារណៈសម្រាប់ជាចំណេះដឹងដល់ប្រជាពលរដ្ឋ»។
លោកស្រី មាណវី បានបង្ហាញសុទិដិ្ឋនិយមថាដោយកុមារទទួលបានការអប់រំតាំងពីតូចនៅតាមសាលារៀនឥរិយាបថរបស់ពួកគេនឹងកាន់តែល្អចំពោះការប្រើប្រាស់ផ្លូវថ្នល់។
បច្ចុប្បន្ននេះយានយន្ដចុះបញ្ជីមានចំនួនជាង ៧ លាន គ្រឿង ដោយក្នុងនោះ មានរថយន្ដទាំងតូចនិងធំជាង១លានគ្រឿងខណៈម៉ូតូ និងរ៉ឺម៉កមានប្រមាណ ៦ លាន គ្រឿង។ តួលេខនេះ មានការកើនឡើងជាង ៤០០ ភាគរយបើធៀបនឹងចំនួនយានយន្ដកាលពីឆ្នាំ២០១០។
លោកស្រី មាណវី បានឱ្យដឹងថា៖«កំណើននៃយានយន្ដដោយសារកត្ដាសុខសន្ដិភាព។នេះមិនមែនរាជរដ្ឋាភិបាលចេះតែអួតទេ៕
