លោកនាយករដ្ឋមន្ត្រី ហ៊ុន ម៉ាណែត ចូលរួមនៅក្នុងទិវាគ្រូបង្រៀន កាលពីថ្ងៃម្សិលមិញ។ រូបថត STPM
ភ្នំពេញៈ ទិវាគ្រូបង្រៀនពិភពលោក ត្រូវបានប្រារព្ធធ្វើឡើងជារៀងរាល់ឆ្នាំ នាថ្ងៃទី ៥ ខែតុលា ដើម្បីបំផុសនៅគ្រប់ភូមិសិក្សាទូទាំងប្រទេស និងរំឭកពីគុណបំណាច់របស់គ្រូបង្រៀន ដែលបានចំណាយពេលវេលា កម្លាំងកាយចិត្ត និងវិជ្ជាជីវៈ ក្នុងការបំពេញភារកិច្ច ជាអ្នកបណ្ដុះបណ្ដាល ដើម្បីផ្ទេរនូវចំណេះដឹង ការទូន្មានឱ្យសិស្សានុសិស្សធ្វើតែអំពើល្អ ស្គាល់ខុស ស្គាល់ត្រូវ និងចេះគោរពចាស់ទុំ។
ទិវាគ្រូបង្រៀនលើកទី២៦ ឆ្នាំ ២០២៣ នេះ កម្ពុជាធ្វើឡើងក្រោមប្រធានបទ «គ្រូបង្រៀនជាសសរស្តម្ភនៃកំណែទម្រង់សាលារៀនឆ្ពោះទៅរកឧត្តមភាព» ដែលក្រសួង អប់រំ យុវជន និងកីឡា បានរៀបចំ ធ្វើនាព្រឹកថ្ងៃទី ៥ តុលា ដោយមានការអញ្ជើញជាអធិបតីពីលោកនាយករដ្ឋមន្ត្រី ហ៊ុន ម៉ាណែត និងមន្ត្រីពាក់ព័ន្ធ រួមនឹងលោកគ្រូអ្នកគ្រូជាច្រើនរូបទៀត។
នៅក្នុងទិវាគ្រូបង្រៀនពិភពលោកនេះ លោក ហ៊ុន ម៉ាណែត បានថ្លែងថា ទិវាគ្រូបង្រៀនជាឱកាសមួយដើម្បីរំឭកគុណគ្រូដែលបានខិតខំបង្ហាត់បង្រៀននិងផ្ទេរចំណេះដឹង ជំនាញតាមគ្រប់រូបភាពទៅដល់សិស្សានុសិស្ស និស្សិត និងយុវជនគ្រប់រូប។
លោកបញ្ជាក់ថា៖ «ជាការពិតណាស់ មិនមានអ្នកណាមួយ រួមទាំងលោកគ្រូអ្នកគ្រូខ្លួនឯងផង ដែលបានមកដល់ពេលនេះ គឺត្រូវឈានពីថ្នាក់បឋម ហើយខ្ញុំផ្ទាល់ចាំមិនភ្លេចទេថា ខ្ញុំរៀនចប់ថ្នាក់បណ្ឌិត ខ្ញុំចេះសរសេរ ចេះអានដោយសារខ្ញុំចាំគុណគ្រូខ្ញុំ ថ្នាក់ទី១ ដែលបង្រៀនខ្ញុំពីអក្សរ ក និងលេខ ១។ បើខ្ញុំមិនចេះពីអក្សរកទេ គឺខ្ញុំមិនមានមូលដ្ឋានរហូតដល់រៀនភាសាបរទេស និងចេះសរសេរពីលេខ ១ ដល់លេខ ១ ពាន់លានបានទេ»។
លោក ហ៊ុន ម៉ាណែត បន្តថា ៖ «គុណគ្រូដែលពាក្យខ្មែរយើងថា គ្រូ ១ ថ្ងៃ គ្រូ ១ ជីវិត ហើយគ្រូគឺជាឪពុកម្តាយទី២ ដែលអាចបណ្តុះបណ្តាល និងបំណិនជីវិតឱ្យយើងមានសមត្ថភាពក្លាយជាធនធានក្នុងសង្គមមួយបាន»។
ក្នុងឱកាសនោះដែរ លោកក៏បានជំរុញលើកទឹកចិត្តដល់មាតាបិតា អាណាព្យាបាល និងសហគមន៍ក្នុងការអប់រំស្របតាមពាក្យស្លោកថា «ភាពជាដៃគូរដ្ឋសហគមន៍ដើម្បីការអប់រំ» ដែលឪពុកម្តាយសំខាន់ណាស់ដែលជាតួអង្គជាមួយគ្រូ ដែលតួអង្គទាំង ២ នេះ ជាអ្នកបំពាក់បំប៉នសមត្ថភាព ឧត្តមគតិ សីលធម៌ និងឥរិយាបថ ហើយឪពុកម្តាយ និងគ្រូ ត្រូវទុកចិត្តគ្នាទៅវិញទៅមក។
លោក ហ៊ុន ម៉ាណែត ក៏បានថ្លែងការកោតសរសើរ ចំពោះលទ្ធផលដែលក្រសួងអប់រំ ពង្រីកបាននៅក្នុងកំណែទម្រង់ជាបន្តបន្ទាប់ ប៉ុន្តែក្នុងដំណាក់កាលនៃកំណែទម្រង់នេះត្រូវយកសសរស្តម្ភណាមួយ ហើយធ្វើការពង្រឹងឱ្យចំគោលដៅ។
លោកមានប្រសាសន៍ថា៖ «មូលដ្ឋាននៃការអប់រំត្រូវគិតហើយផ្តោតលើការអប់រំថ្នាក់មូលដ្ឋានពីថ្នាក់មត្តេយ្យ ដល់ថ្នាក់ទី១២ ពង្រឹងរឿងនេះបាន គឺវិស័យអប់រំយើងខ្លាំងហើយ។ និយាយអ៊ីចឹងមិនមែនបានន័យថា រដ្ឋាភិបាលមិនគិតគូរពង្រឹងឧត្តមសិក្សាទេ គឺយើងពង្រឹងដូចគ្នាបន្តទៀត ដែលផែនការរួមយើងមាន ប៉ុន្តែវិធានគន្លឹះដែលត្រូវការយកចិត្តទុកដាក់ គឺពង្រឹងពីថ្នាក់មត្តេយ្យដល់ថ្នាក់ទី១២»។
លោកបញ្ជាក់ថា ការអប់រំនេះ ត្រូវផ្ដោតលើលទ្ធផលចំនួន ២ គឺសមត្ថភាព និងឥរិយាបថ (Soft Skill) ដោយធ្វើការជំរុញសិស្សលើការស្រាវជ្រាវ ហើយគ្រូបង្រៀនក៏ត្រូវការអភិវឌ្ឍសមត្ថភាពរបស់ខ្លួនជាប្រចាំលើការស្រាវជ្រាវផងដែរ។ ទន្ទឹមនឹងនោះដែរ លោកនាយករដ្ឋមន្ត្រី ក៏បានណែនាំដល់ក្រសួងអប់រំ ឱ្យពិនិត្យឱ្យបានហ្មត់ចត់ផងដែរ ចំពោះការជ្រើសរើសនាយកសាលា ដោយសារនាយកសាលា មានសារៈសំខាន់ណាស់ ក្នុងការដឹកនាំលើការបណ្ដុះបណ្ដាលធនធានមនុស្ស ចាប់តាំងពីថ្នាក់មត្តេយ្យរហូតដល់មធ្យមសិក្សា។
លោកថា៖ «នេះជាដំណាក់កាលពង្រឹង ជាជាងពង្រីក ដោយពង្រឹងអ្វីដែលមានស្រាប់ ជាពិសេសផ្តោតលើស្ថាប័ន ហើយពង្រឹងសេវាគឺផ្តោតទៅមូលដ្ឋាន ស្រុក ឃុំតែម្តង។ មហិច្ឆតារបស់ខ្ញុំ ក្នុង ១ អាណត្តិ ២ អាណត្តិនេះ សាលារដ្ឋទាំងអស់ មិនចាំបាច់ឱ្យកូនចៅរបស់ប្រជាពលរដ្ឋវេចបង្វិចពីស្រុក ១ ទៅស្រុក ១ ទៅរៀនសាលា ១ ទៀតទេ ព្រោះគ្រប់សាលារដ្ឋទាំងអស់ ក្លាយជាសាលាល្អអាចទទួលយកបាននៅមូលដ្ឋាន»។
គ្រូពេទ្យ ឈរក្បែររថយន្តដែលត្រូវបានគេរៀបចំត្រៀមសម្រាប់ដឹកវ៉ាក់សាំង នៅឯមន្ទីរពេទ្យព្រះកេតុមាលាកាលពីថ្ងៃម្សិលមិញ។ហេង ជីវ័ន
នៅក្នុងយុទ្ធសាស្ដ្របញ្ចកោណ រាជរដ្ឋាភិបាលបានដាក់ចេញរួចហើយ នៅក្នុងនោះ ក៏មានយន្តការ គិតគូរពីការពង្រឹងវិស័យអប់រំ ដែលអនុវត្តបន្តយុទ្ធសាស្ដ្រចតុកោណ ខណៈការធ្វើកំណែទម្រង់នេះ គឺមិនមែនធ្វើតែ១ឆ្នាំត្រូវប្ដូរនោះទេ ប៉ុន្ដែមាននិរន្តរភាព។
លោកបញ្ជាក់ថា៖ «វិធានការគន្លឹះ ដែលយើងបានដាក់ចេញក្នុងការធ្វើកំណែទម្រង់វិស័យអប់រំនេះ គឺក្រោមទ្រឹស្ដី គិតធំ ប៉ុន្ដែត្រូវចាប់ផ្ដើមធ្វើពីតូចទៅ មានន័យថា ការធ្វើកំណែទម្រង់នេះ គឺត្រូវគិតឱ្យបានគ្រប់ជ្រុងជ្រោយ ប៉ុន្ដែការអនុវត្តគឺត្រូវជ្រើសរើសចំណុចណាដែលជាអាទិភាពហើយត្រូវអនុវត្តឱ្យចំគោលដៅជាជំហានៗតែម្ដង»។
ឆ្លៀតឱកាសនោះដែរ លោក ហ៊ុន ម៉ាណែត បានសម្រេចដំឡើងប្រាក់បៀវត្សរ៍ឧបត្ថម្ភដល់លោកគ្រូអ្នកគ្រូ ដែលជាគរុសិស្សកំពុងសិក្សាដោយអនុវត្តតាមរូបមន្តបៀវត្សរ៍មូលដ្ឋាន បូកនឹង ៧០ ភាគរយបន្ថែម។ ការដំឡើងបៀវត្សរ៍ឧបត្ថម្ភថ្មីនេះធ្វើឱ្យបៀវត្សរ៍របស់លោកគ្រូ-អ្នកគ្រូ ជាគរុសិស្សកំពុងសិក្សាទាបបំផុត (កម្រិត គ) ចំនួន ៩៨ ម៉ឺនរៀល និងគ្រូបង្រៀនក្របខ័ណ្ឌ (ក) នឹងទទួលបានប្រាក់បៀវត្សរ៍ជាង ១ លានរៀល។ រាជរដ្ឋាភិបាលអាណត្តិទី៧ បន្តអនុវត្តគោលនយោបាយជាអាទិភាពលើវិស័យអប់រំ និងវិស័យសុខាភិបាល ខណៈបច្ចុប្បន្នវិស័យទាំង ២ នេះរាជរដ្ឋាភិបាលបានវិនិយោគច្រើនជាងវិស័យផ្សេងៗទៀត។
លោក ហង់ជួន ណារ៉ុន រដ្ឋមន្ត្រីក្រសួងអប់រំ បានថ្លែងថា គ្រូបង្រៀនមានតួនាទីយ៉ាងសំខាន់មិនអាចខ្វះបានក្នុងការអនុវត្តកំណែទម្រង់វិស័យអប់រំ យុវជននិងកីឡា។ នៅក្នុងការអនុវត្តកំណែទម្រង់កម្រិតសាលារៀន តាមការសិក្សា ជាច្រើននៅលើពិភពលោកបានរកឃើញថា គ្រូបង្រៀនមានឥទ្ធិពលដោយផ្ទាល់ដល់ការប្រែប្រួល ជាវិជ្ជមាននៅក្នុងថ្នាក់រៀន ជាពិសេសការធ្វើឱ្យមានភាពប្រសើរឡើង នៃលទ្ធផលការសិក្សារបស់សិស្ស និងការឆ្ពោះទៅរកឧត្តមភាពនៃសាលារៀននិងប្រព័ន្ធអប់រំជារួម។
លោកមានប្រសាសន៍ថា៖ «គ្រូបង្រៀនគឺជាក្បាលម៉ាស៊ីននៃប្រព័ន្ធអប់រំ ជាឆ្អឹងខ្នងនៃការអប់រំ និងជាអ្នកអប់រំជួរមុខដែលបានធ្វើការជាមួយសិស្ស,បង្កើតបរិស្ថានសិក្សាប្រកបដោយប្រសិទ្ធភាព, រៀបចំសកម្មភាពបង្រៀននិងមានទំនាក់ទំនង ជាមួយសិស្ស មាតាបិតា ដើម្បីធានាបាននូវសមភាព និងបរិយាប័ន្នក្នុងការអប់រំ»។
លោក ហង់ជួន ណារ៉ុន បន្តថា៖ «ខ្ញុំពិតជាកោតសរសើរដ៏ស្មោះចំពោះ លោកគ្រូ អ្នកគ្រូ ទាំងអស់នៅទូទាំងកម្ពុជា ដែលបានខិតខំពង្រឹងសមត្ថភាពរបស់ខ្លួន និងចូលរួមបំពេញតួនាទី ប្រកបដោយ មនសិការវិជ្ជាជីវៈនិងស្មារតីទទួលខុសត្រូវខ្ពស់។ បើគ្មានការរួមចំណែកពីគ្រូបង្រៀនទេ ក្រសួងក៏មិនអាចអនុវត្តកំណែទម្រង់សាលារៀនឆ្ពោះទៅរកឧត្តមភាពបានដែរ ហើយការប្រារព្ធពិធីនេះគឺដើម្បីបង្ហាញឱ្យកាន់តែច្បាស់នូវតួនាទីដ៏សំខាន់របស់គ្រូបង្រៀន»។
នៅថ្ងៃដដែលនេះដែរ សមាគមគ្រូបង្រៀនកម្ពុជាឯករាជ្យ ក៏បានជួបជុំគ្នាប្រារព្ធទិវាគ្រូបង្រៀនពិភពលោកនេះដែរ និងបានដាក់សំណើដល់រាជរដ្ឋាភិបាល និងក្រសួងអប់រំ ស្នើសូមដំឡើងប្រាក់បៀវត្សរ៍មូលដ្ឋានគ្រូបង្រៀន,បញ្ចុះតម្លៃប្រេងឥន្ធនៈមកត្រឹមតម្លៃ ៤ ០០០ រៀល ក្នុង ១ លីត្រ និងបញ្ចុះតម្លៃទំនិញលើទីផ្សារឱ្យមានតម្លៃមួយសមរម្យ, លុបបំបាត់អំពើពុករលួយក្នុងប្រព័ន្ធអប់រំ និងពេលប្រឡងចូលក្របខ័ណ្ឌគ្រូបង្រៀន និងចំណុចមួយចំនួនទៀត៕
