អ្នកធ្វើការក្នុងវិស័យសំណង់ពេលធ្វើយុទ្ធនាការទាមទារការកំណត់ប្រាក់ឈ្នួល ។ រូបថត BWTUC
ភ្នំពេញៈសហព័ន្ធសហជីពកម្មករសំណង់ និងព្រៃឈើកម្ពុជា កាលពីថ្ងៃទី៥ ខែតុលា បានធ្វើយុទ្ធនាការទាមទារឱ្យរដ្ឋាភិបាល កំណត់ប្រាក់ឈ្នួល សម្រាប់កម្មករក្នុងវិស័យសំណង់ ប៉ុន្តែមន្ត្រីក្រសួងការងារបញ្ជាក់ថា ទៅថ្ងៃមុខនឹងមានការគិតគូរកំណត់ប្រាក់ឈ្នួលកម្មករសំណង់ ដូចកម្មករវិស័យផ្សេងទៀតដែរ។
លោកសុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជា (BWTUC) បានឱ្យដឹងនៅថ្ងៃទី៨ ខែតុលាថា មូលហេតុដែលសហព័ន្ធសហជីពកម្មករសំណង់ធ្វើយុទ្ធនាការនៅថ្ងៃទិវាពិភពលោកសម្រាប់ការងារសមរម្យឆ្នាំ២០២៣នេះព្រោះលោកមើលឃើញថា លក្ខខណ្ឌការងាររបស់ប្រទេសនីមួយៗក្នុងវិស័យសំណង់ ហាក់បីដូចជាមិនមានការងារណាសមរម្យសម្រាប់កម្មករសំណង់ទេ។
លោកបានបន្តថា ដើម្បីផ្ដល់លក្ខខណ្ឌការងារសមរម្យ គឺលោកស្នើឱ្យរាជរដ្ឋាភិបាល ក៏ដូចជាក្រសួងពាក់ព័ន្ធត្រូវកំណត់ប្រាក់ឈ្នួលគោលសម្រាប់កម្មករក្នុងវិស័យសំណង់ឱ្យដូចកម្មករផ្សេងទៀតដែរ។
ជាមួយគ្នានេះ លោក សុខ គីន ក៏បានស្នើឱ្យមានការបង្កើតច្បាប់ស្ដីពីសុខភាព សុវត្ថិភាព ដោយសារបច្ចុប្បន្នកម្មករសំណង់បំពេញការងារប្រឈមនឹងគ្រោះថ្នាក់ច្រើន ជាពិសេសការបង្កើតច្បាប់ហាមឃាត់ការប្រើប្រាស់សារធាតុអាសបេស្ដុស (ASBESTOS) នៅកម្ពុជាដោយសារធាតុនេះ វាបង្កឱ្យកើតជំងឺដូចជា ក្រិនថ្លើម មហារីក រលាកផ្លូវដង្ហើមនិងសួតជាដើម ។
ក្រៅពីនេះទៀត លោកថា ក៏ទាមទារឱ្យមានពង្រីកវិសាលភាព(ប.ស.ស)សម្រាប់កម្មករសំណង់ ខណៈការអនុវត្តផ្ដល់អត្ថប្រយោជន៍ផ្សេងៗរបស់ ប.ស.ស មានភាពយឺតយ៉ាវទៅកាន់កម្មករក្នុងវិស័យសំណង់។
លោក សុខ គីន បញ្ជាក់ថា៖ «ខ្ញុំគិតថា ការផ្ដល់លក្ខខណ្ឌការងារសមរម្យនេះមានន័យថា យ៉ាងហោចណាស់កម្មករទាំងអស់នោះគាត់អាចធ្វើការងារបានប្រកបដោយសុខសុវត្ថិភាពនៅកន្លែងការងារ ហើយទទួលបានប្រាក់ឈ្នួលដែលអាចរស់នៅបានដោយថ្លៃថ្នូរ»។
បើតាមលោក សុខ គីន យុទ្ធនាការនេះ បានរៀបចំធ្វើឡើងដោយផ្ដោតនៅក្នុងតំបន់ចំនួន៤សំខាន់ៗរួមមាន៖ ភ្នំពេញសៀមរាប កំពត និងខេត្តព្រះសីហនុ ដែលនៅក្នុងតំបន់នីមួយៗនេះ គឺមានអ្នកចូលរួមធ្វើយុទ្ធនាការពី ២០ នាក់ ទៅ ៥០ នាក់ ដូច្នេះចំនួនសរុបអ្នកដែលបានចូលរួមទាមទារស្នើសុំចំណុចទាំងនេះ គឺមិនមានការសរុបចំនួនច្បាស់លាស់ឡើយ។
ទាក់ទងនឹងយុទ្ធនាការនេះ លោក កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានប្រាប់ ថា ប្រជាពលរដ្ឋមានសិទ្ធិសេរីភាពដែលមានចែងក្នុងរដ្ឋធម្មនុញ្ញកម្ពុជា និងច្បាប់នានា ដូច្នេះការប្រើប្រាស់សិទ្ធិសេរីភាពក្នុងការប្រមូលផ្តុំ ការទាមទារ ឬបញ្ចេញមតិត្រឹមត្រូវតាមច្បាប់ គឺត្រូវបានលើកស្ទួយ។
លោកបន្តថា ផ្ទុយទៅវិញចំពោះការប្រើប្រាស់សិទ្ធិសេរីភាពដែលបំពានច្បាប់ និងរំលោភបំពានសិទ្ធិសេរីភាពអ្នកដទៃ ត្រូវទទួលខុសត្រូវចំពោះមុខច្បាប់។
លោកបានថ្លែងថា រាជរដ្ឋាភិបាល តាមរយៈក្រសួងការងារយកចិត្តទុកដាក់គិតគូរពីសុខទុក្ខនិងអត្ថប្រយោជន៍មិនថា ចំពោះកម្មករនិយោជិតក្នុងប្រព័ន្ធ កម្មករនិយោជិតក្រៅប្រព័ន្ធ និងបុគ្គលស្វ័យនិយោជន៍គឺគិតដូចគ្នា។
លោក កត្តា អ៊ន បញ្ជាក់ថា ៖ «ទៅថ្ងៃមុខប្រាក់ឈ្នួលអប្បបរមាក៏នឹងត្រូវគិតគូរដល់បងប្អូនក្នុងវិស័យផ្សេងៗទៀត រួមទាំងបងប្អូនក្នុងវិស័យសំណង់ផងដែរ ហើយការគិតគូរត្រូវមានការស្រាវជ្រាវ វាយតម្លៃ វិភាគ និងជំនាញច្បាស់លាស់ និងមានក្របខ័ណ្ឌគតិយុត្ត»៕
