កិច្ចប្រជុំក្រុមការងារព័ត៌មានក្រសួង-ស្ថាប័ន កាលពីថ្ងៃទី ៩ តុលា ។ រូបថត TVK
ភ្នំពេញៈ ក្រសួងព័ត៌មាននឹងបង្កើតក្រុមការងារព័ត៌មានរួមរវាងក្រសួង-ស្ថាប័ន របស់រដ្ឋាភិបាលទាំងអស់ ដើម្បីផ្លាស់ប្តូរព័ត៌មានគ្នាទៅវិញទៅមក និងអាចឆ្លើយតបភ្លាមៗទៅនឹងព័ត៌មានក្លែងក្លាយពាក់ព័ន្ធនឹងក្រសួង-ស្ថាប័នណាមួយស្របតាមចក្ខុវិស័យរដ្ឋាភិបាលអាណត្តិថ្មីក្នុងការប្រែក្លាយក្រសួងព័ត៌មានជាស្ថាប័នទំនាក់ទំនងសាធារណៈរបស់រដ្ឋាភិបាល។
យោងតាមការផ្សព្វផ្សាយរបស់ក្រសួងព័ត៌មាននៅថ្ងៃទី ៩ ខែតុលា បានឱ្យដឹង ក្រសួងបានរៀបចំកិច្ចប្រជុំក្រុមការងារព័ត៌មានអន្តរក្រសួង-ស្ថាប័នចំនួន៣០និងអង្គភាពពាក់ព័ន្ធក្រោមអធិបតី លោក នេត្រ ភក្ត្រា រដ្ឋមន្ត្រីក្រសួងព័ត៌មានក្នុងការពង្រឹងកិច្ចសហប្រតិបត្តិការផ្លាស់ប្តូរព័ត៌មាន និងការផ្សព្វផ្សាយជុំវិញព័ត៌មាននានាពីសមិទ្ធផលនិងសកម្មភាពរបស់ក្រសួង-ស្ថាប័នដែលនឹងឈានទៅបង្កើតជាក្រុមការងារព័ត៌មានរួមមួយរវាងក្រសួងនិងស្ថាប័នរដ្ឋទាំងអស់។
ក្រសួងព័ត៌មានលើកឡើងថា ការបង្កើតក្រុមការងារព័ត៌មានអន្តរក្រសួងនេះដើម្បីផ្តល់ភាពងាយស្រួលក្នុងការទាក់ទង ការផ្លាស់ប្តូរព័ត៌មានពីគ្នាទៅវិញទៅមក ជាពិសេសជួយគ្នាវាយបកវិញចំពោះព័ត៌មានក្លែងក្លាយទាក់ទងនឹងក្រសួង-ស្ថាប័នរដ្ឋាភិបាល។
លោកនេត្រ ភក្ត្រា បានលើកឡើងក្នុងកិច្ចប្រជុំនោះថា ក្រសួងព័ត៌មានបានកំណត់ទិសដៅនិងចក្ខុវិស័យក្នុងអាណត្តិទី៧នេះឱ្យក្លាយជាស្ថាប័នទំនាក់ទំនងសាធារណៈរបស់រដ្ឋាភិបាល ជាសំឡេងរបស់រដ្ឋាភិបាល ពេលរដ្ឋាភិបាលត្រូវការ ដែលមានអគ្គនាយកដ្ឋានទូរទស្សន៍ជាតិ អគ្គនាយកដ្ឋានវិទ្យុជាតិ អគ្គនាយកដ្ឋានទីភ្នាក់ងារសារព័ត៌មានកម្ពុជា(AKP) និងកម្មវិធី APP របស់ក្រសួងព័ត៌មានជាមធ្យោបាយ។
លោកថ្លែងថា ៖ «ក្រសួងព័ត៌មាន ដែលជាសេនាធិការមួយរបស់រាជរដ្ឋាភិបាល ហើយគ្រប់គ្រងលើប្រព័ន្ធផ្សព្វផ្សាយ នឹងគាំទ្រដល់ក្រសួងស្ថាប័នទាំងអស់ដែលសម្រេចបានលទ្ធផលការងារនិងសកម្មភាពរបស់ថ្នាក់ដឹកនាំជារួមសម្រាប់ប្រទេសជាតិ គឺក្រសួងជួយផ្សព្វផ្សាយឱ្យបានទូលំទូលាយតាមរយៈប្រព័ន្ធផ្សព្វផ្សាយរបស់ជាតិ»។
លោករដ្ឋមន្ត្រី ក៏ស្នើឱ្យមានកិច្ចសហការក្នុងផ្នែកបណ្តុះបណ្តាលធនធានមនុស្សដែលកំពុងធ្វើការផ្នែកកិច្ចការព័ត៌មាននេះ នៅតាមក្រសួង-ស្ថាប័ន ឱ្យបានកាន់តែច្រើនបន្ថែមទៀតផងដែរ។
លោកទេព អស្នារិទ្ធ អ្នកនាំពាក្យក្រសួងព័ត៌មានបានឱ្យដឹងបន្ថែមនៅថ្ងៃទី១០ ខែតុលាថា ក្រុមការងារព័ត៌មានអន្តរវិស័យនេះជាគំនិតផ្តួចផ្តើមរបស់លោកនេត្រ ភក្ត្រា ដើម្បីធានាប្រសិទ្ធភាពផ្សព្វផ្សាយ ផ្តល់ព័ត៌មានជូនសាធារណជនពីវឌ្ឍនភាពនៃសកម្មភាពការងាររបស់ក្រសួង-ស្ថាប័ន ចំណុះរដ្ឋាភិបាល ដែលមានសមាសភាពចូលរួមពីសមាជិកក្រុមអ្នកនាំពាក្យនិងអ្នកទទួលបន្ទុកកិច្ចការព័ត៌មាននៃគ្រប់ក្រសួង-ស្ថាប័នទាំងអស់របស់រដ្ឋាភិបាល។
លោកបានថ្លែងថា៖ «យន្តការនេះនឹងរួមចំណែកយ៉ាងសំខាន់ក្នុងការលើកកម្ពស់កិច្ចសហការផ្សព្វផ្សាយព័ត៌មានឱ្យបានទូលំទូលាយ ទាន់ពេលវេលា និងប្រកបដោយប្រសិទ្ធភាព ជាពិសេសដើម្បីរួមគ្នាប្រយុទ្ធប្រឆាំងការផ្សព្វផ្សាយព័ត៌មានក្លែងក្លាយ តាមរយៈប្រព័ន្ធតាមដានរួមមួយជាប់លាប់ ដែលសម្របសម្រួលដោយក្រសួងព័ត៌មាន និងមានការសហការពីក្រសួង-ស្ថាប័ន»។
ពាក់ព័ន្ធនឹងបញ្ហានេះ លោកណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា(ខេមបូចា)បានថ្លែងថា ការបង្កើតក្រុមការងារព័ត៌មានអន្តរក្រសួង-ស្ថាប័ន គឺជារឿងល្អក្នុងការឆ្លើយតបនិងបំភ្លឺសាធារណជនបានរហ័ស និងមានប្រសិទ្ធភាព ជាពិសេសការទប់ស្កាត់ព័ត៌មានក្លែងក្លាយ។
ជាមួយគ្នានេះលោកក៏បានស្នើឱ្យរដ្ឋាភិបាលផ្តល់លទ្ធភាពឱ្យគ្រប់ភាគីពាក់ព័ន្ធចូលរួមក្នុងការទប់ស្កាត់ព័ត៌មានក្លែងក្លាយផងដែរ ជាពិសេសកំណត់និយមន័យព័ត៌មានក្លែងក្លាយឱ្យបានត្រឹមត្រូវ ចៀសវាងប៉ះពាល់ដល់សិទ្ធិបញ្ចេញមតិរបស់ប្រជាពលរដ្ឋលើរដ្ឋាភិបាល ដែលធានាដោយសង្គមប្រជាធិបតេយ្យ។
លោកណុប វី បានបញ្ជាក់ថា៖«រដ្ឋាភិបាលគួរពិចារណាបើកឱកាសឱ្យភាគីពាក់ព័ន្ធចូលរួមដំណើរការប្រយុទ្ធប្រឆាំងព័ត៌មានក្លែងក្លាយដែលមិនមែនជារឿងអាចធ្វើតែឯងបានទេជាពិសេសពីរង្វង់អ្នកសារព័ត៌មាន»៕
