ម្ចាស់មេដាយមាសស៊ីហ្គេម ឆ្នាំ២០២៣ ព្រំ សំណាង និងដៃគូប្រកួត។ រូបថត សហការី
ភ្នំពេញៈ ម្ចាស់មេដាយមាសស៊ីហ្គេម ឆ្នាំ២០២៣ ព្រំ សំណាង បានបង្ហាញការតាំងចិត្តខ្ពស់ ក្នុងការដណ្តើមយកជ័យជម្នះលើកីឡាកររបស់អ៊ុយក្រែន Viadyslav សម្រាប់ការជួបគ្នា ជាលើកដំបូង នៅពហុកីឡដ្ឋានជាតិ នាល្ងាចម៉ោង៧ ថ្ងៃទី១១ ខែតុលានេះ ហើយកីឡាករជើងខ្លាំងរបស់កម្ពុជា ៤ នាក់ទៀត រួមមាន ឈុត សេរីវ៉ាន់ថង, ឃីម បូរ៉ា, អេលីត សាន់ និង ទូច ដេវីត ក៏ត្រូវបានដាក់ឱ្យប្រកួតប្រជែងគ្នា ដើម្បីដណ្តើមយកឡានដ៏ថ្មីសន្លាង ក្នុងព្រឹត្តិការណ៍ដ៏ធំ មិនធ្លាប់មាននេះផងដែរ។
សម្រាប់ការបង្ហាញខ្លួន ក្នុងព្រឹត្តិការណ៍ «ប៊ូសស្ដ្រង ជួយគុនខ្មែរ អ្នកខ្លាំងពូកែឱ្យឡាន» ដែលសង្វៀនប្រដាល់បាយ័ន ទើបបង្កើតឱ្យមានឡើងនេះ ព្រំ សំណាង បានទទួលស្គាល់ថា រូបគេពិតជាមានការឈឺចាប់ទៅនឹងការរិះគន់របស់អ្នកគាំទ្រមួយចំនួន ជុំវិញការប្រកួតចាញ់ម្ចាស់ខ្សែក្រវាត់របស់អាមេរិក Banasak Pawell កាលពីថ្ងៃទី៣០ ខែកញ្ញា ហើយនេះជាអ្វីដែលរូបគេ ត្រូវប្រឹងប្រែងយកជ័យជម្នះកីឡាករ Viadyslav នាការប្រកួតលើកនេះ ដើម្បីស្តារប្រជាប្រិយ និងភាពល្បីល្បាញឡើងវិញ។
ព្រំ សំណាង បាននិយាយ ក្នុងសន្និសីទកាសែត កាលពីព្រឹកថ្ងៃទី១០ ខែតុលាថា៖ «ដោយសារតែពួកគាត់ស្រឡាញ់ និងជឿជាក់លើខ្ញុំពេក ទើបធ្វើឱ្យគាត់ខកបំណង នៅពេលខ្ញុំប្រកួតចាញ់ ដោយគាត់បាន comment ស្តីបន្ទោសដល់ខ្ញុំ ប៉ុន្តែខ្ញុំមិនបានខឹងនឹងពួកគាត់ទេ។ ផ្ទុយទៅវិញ ខ្ញុំមានតែខំប្រឹងហ្វឹកហាត់ ដើម្បីតបស្នងដល់ពួកគាត់វិញ ហើយខ្ញុំសន្យាថា ការប្រកួតលើកនេះ ខ្ញុំនឹងធ្វើឱ្យបានល្អ ដើម្បីគុនខ្មែរ»។
ដោយឡែក សម្រាប់ការប្រកួត ដែលកាន់តែមានភាពទាក់ទាញខ្លាំងបំផុតនោះ គឺការប្រកួតប្រជែងគ្នា ដណ្តើមយកឡានដ៏ថ្មីសន្លាងរវាងកីឡាករជើងខ្លាំងរបស់កម្ពុជា ឈុត សេរីវ៉ាន់ថង, ឃីម បូរ៉ា, អេលីត សាន់ និង ទូច ដេវីត ដោយអ្នកទាំង៤នេះ ត្រូវឆ្លងឱ្យផុតពីការប្រកួតជាមួយកីឡាករបរទេសសិន ទើបមានឱកាស ក្លាយជាបេក្ខភាព ប្រកួតផ្តាច់ព្រ័ត្រយកឡាន។
តាមការប្រកាស នៅក្នុងសន្និសីទកាសែត នៅផ្សារទំនើបអូឡាំព្យា កាលពីព្រឹកថ្ងៃអង្គារនោះ បានបញ្ជាក់ថា ការប្រកួតដណ្តើមយកឡាននេះ គឺសម្រាប់តែកីឡាករកម្ពុជា ឈុត សេរីវ៉ាន់ថង, ឃីម បូរ៉ា, អេលីត សាន់ និង ទូច ដេវីត ប៉ុណ្ណោះទេ ចំណែកកីឡាករបរទេស ដែលជាដៃគូរបស់អ្នកទាំង៤ នេះ មិនបានគិតចូលឡើយ បើទោះបីជាពួកគេ ទទួលបានជ័យជម្នះលើកីឡាករកម្ពុជាក៏ដោយ។
ចំពោះរូបមន្ត និងលក្ខខណ្ឌនៃការប្រកួតវិញ គឺបើសិនជាកីឡាករកម្ពុជា ឈ្នះកីឡាករបរទេសទាំង៤នាក់ ឬឈ្នះ៣នាក់ នោះគណៈកម្មការ នឹងធ្វើការរាប់នូវចំនួនអ្នកបោះឆ្នោតទៅលើពួកគេ ដែលត្រូវបានធ្វើឡើង តាមរយៈផេចហ្វេសប៊ុក «Boostrong» ចូល១សប្តាហ៍ហើយ។ មានន័យថា បើបេក្ខភាព២នាក់ ដែលទទួលបានសំឡេងបោះឆ្នោតច្រើនជាងគេ នឹងត្រូវឡើងទៅប្រកួតផ្តាច់ព្រ័ត្រ។
ទន្ទឹមនឹងនេះ បើកីឡាករកម្ពុជា ឈ្នះកីឡាករបរទេសត្រឹម២នាក់ គឺអ្នកទាំង២នោះ ត្រូវឡើងទៅប្រកួតផ្តាច់ព្រ័ត្រ ដណ្តើមយកឡានតែម្តង ដោយមិនចាំបាច់រាប់ការបោះឆ្នោតរបស់អ្នកគាំទ្រទេ ហើយបើសិនជា ក្នុងចំណោមកីឡាករកម្ពុជាទាំង ៤ នាក់នេះ ឈ្នះកីឡាករបរទេសបានតែ១នាក់ គឺម្នាក់នោះ នឹងទទួលបានឡានតែម្តង។
សម្រាប់ការប្រកួតគូអន្តរជាតិ ដណ្ដើមយករថយន្ដ ក្នុងប្រភេទទម្ងន់៦០គីឡូក្រាមនេះ កីឡាករ ទូច ដេវីត ត្រូវជួបអ្នកប្រដាល់ចិន Wang YueYue រីឯ អេលីត សាន់ ត្រូវប៉ះកីឡាករជើងចាស់របស់ថៃ Rungrawee Banchamek ហើយ ឈុត សេរីវ៉ាន់ថង ត្រូវប្រកួតជាមួយប្រេស៊ីល Italo Freitas ខណៈ ឃីម បូរ៉ា ត្រូវតទល់ជាមួយថៃ Chatchai PK Saenchai។
ជាមួយការប្រកួតនេះ គឺទាំង ឈុត សេរីវ៉ាន់ថង, ឃីម បូរ៉ា, អេលីត សាន់ និង ទូច ដេវីត សុទ្ធតែបានអះអាងថា បានត្រៀមខ្លួនរួចរាល់១០០ភាគរយ ហើយពួកគេសុទ្ធតែបានតាំងចិត្តខ្ពស់ ក្នុងការយកឈ្នះកីឡាករបរទេស ដើម្បីមានឱកាសឡើងទៅប្រកួតយកឡាន ប៉ុន្តែអ្នកទាំង៤ ក៏បានសុំឱ្យអ្នកគាំទ្រ បោះឆ្នោតដល់ពួកគេផងដែរ ដើម្បីក្លាយជាបេក្ខភាព២នាក់ចុងក្រោយ ត្រូវឡើងទៅប្រកួតផ្តាច់ព្រ័ត្រ។
ម្ចាស់មេដាយមាសស៊ីហ្គេម ឆ្នាំ២០២៣ ឈុត សេរីវ៉ាន់ថង បាននិយាយថា៖ «នេះជាការប្រកួតឡានដ៏ធំមួយ ហើយខ្ញុំតាំងចិត្តថា ត្រូវប្រកួតឱ្យអស់ពីសមត្ថភាព ដើម្បីដណ្តើមយកជ័យជម្នះលើជើងខ្លាំងមកពីប្រេស៊ីល ហេតុនេះសូមពុកម៉ែបងប្អូនបោះឆ្នោតឱ្យខ្ញុំផង ដើម្បីផ្តល់កម្លាំងចិត្តបន្ថែមដល់រូបខ្ញុំ ដោយខ្ញុំសន្យាថា នឹងខំប្រឹងប្រែងប្រកួតឱ្យអស់ពីសមត្ថភាព ដើម្បីគុនខ្មែរ និងប្រទេសយើងទាំងអស់គ្នា»។
ជាមួយគ្នានេះ ម្ចាស់មេដាយមាស បឺត សង្ឃឹម ក៏ត្រូវបានដាក់ឱ្យប្រកួតមិត្តភាពអន្តរជាតិ ជាមួយអ្នកប្រដាល់ចិន Guo Chen នៅក្នុងព្រឹត្តិការណ៍នេះផងដែរ ចំណែកជើងខ្លាំងកំពុងមានឈ្មោះបោះសំឡេង ពេជ្រ សម្បត្តិ ដែលធ្លាប់ទទួលបានឡានពីកម្មវិធី «ប៊ូសស្ដ្រង ជួយគុនខ្មែរ អ្នកខ្លាំងពូកែឱ្យឡាន» មុនគេនោះ ក៏ត្រូវដាក់ឱ្យប្រកួតជាមួយកីឡាករម៉ាឡេស៊ី Elias Ghazali នាព្រលប់ថ្ងៃទី១១ ខែតុលានេះដូចគ្នា។
ចំណែកលោក Dosch Christoper តំណាងក្រុមហ៊ុនភេសជ្ជៈ Boostrong ដែលជាអ្នកឧបត្ថម្ភធំក្នុងព្រឹត្តិការណ៍នេះ បានថ្លែងថា៖ «នេះជាការប្រកួតដណ្តើមយកឡានទី២ ពី Boostrong។ កន្លងមក យើងធ្លាប់បានជួយជ្រោមជ្រែង និងគាំទ្រដល់គុនខ្មែរច្រើនបំផុត គឺជួយកីឡាករគុនខ្មែរឱ្យមានឡាន មានផ្ទះ ពិសេសបាននាំយកគុនខ្មែរ ទៅប្រកួតនៅទ្វីបអឺរ៉ុប និងប្រទេសបារាំងផងដែរ ហើយប៊ូសស្ត្រង ប្តេជាចិត្តថា នឹងបន្តជួយគុនខ្មែរ ដើម្បីជាការលើកទឹកចិត្ត និងធ្វើឱ្យវិស័យគុនខ្មែរ កាន់តែល្បីល្បាញពាសពេញពិភពលោក»៕
